قازاقستان رەسپۋبليكاسىنىڭ ءاربىر ازاماتى ۇيدەگى ءورت قاۋىپسىزدىگىن جەتە سەزىنۋى ءتيىس. دەگەنمەن، ونى ءبىلۋ – ءبىر بولەك تە، ال ءتۇسىنۋ – مۇلدەم باسقاشا، دەپ حابارلايدى Qamshy.kz اقپارات اگەنتتىگى.

وكىنىشكە قاراي، ءورت قاۋىپسىزدىگىنە جاۋاپسىز قاراۋ، ەلەكتر جابدىقتارى مەن پەشتەردى پايدالانۋ ەرەجەلەرىن بۇزۋ قالادا كۇن سايىن ورىن الاتىن اپاتتاردىڭ نەگىزگى سەبەپتەرى بولىپ قالا بەرەدى.

جىلىتۋ ماۋسىمىنىڭ باستالۋىنا دەيىن ءبىر اي بۇرىن الماتى قالاسى توتەنشە جاعدايلار دەپارتامەنتىنىڭ جەكە قۇرامى اۋماقتاعى بارلىق ۇيلەردى تولىقتاي ارالاپ شىققان ەدى. ال جىلىتۋ ماۋسىمى اياسىندا دەپارتامەنت قىزمەتكەرلەرى قالا تۇرعىندارىمەن اپتا سايىن كەزدەسۋلەر وتكىزىپ كەلەدى. كەزدەسۋ بارىسىندا تۇرعىنداردى كوبىنەسە ءوز ۇيلەرىندەگى پەشتەردىڭ ءورت قاۋىپسىزدىگى جاعدايى الاڭداتاتىنى انىقتالدى.

جالپى، دەپارتامەنت جەكەمەنشىك تۇرعىن سەكتورىندا ورنالاسقان 145 مىڭنان استام تۇرعىن ءۇيدى ەسەپكە الدى. جازاتايىم وقيعا بولعان 20 مىڭنان استام ۇيلەر قايتادان تەكسەرىلدى. ءۇي يەلەرىنە ءورت قاۋىپسىزدىگى ەرەجەلەرىن ساقتاۋ تۋرالى جادىنامالار بەرىلدى. سونداي-اق، 8395 ادامدى قامتىعان 486 جينالىس وتكىزىلدى.

"ءار ۇيگە قاۋىپسىزدىك" ناۋقانى اياسىندا الماتى قۇتقارۋشىلارى پەشپەن جىلىتىلاتىن جەكەمەنشىك ۇيلەرگە كومىرقىشقىل گازىن انىقتايتىن دابىل قۇرىلعىلارىن ورناتتى. بۇل قۇرىلعىلار نەگىزىنەن الەۋمەتتىك جاعدايى از قامتىلعان وتباسىلارعا جانە قارت ادامداردىڭ ۇيلەرىنە قويىلدى.

ۋىتتى زاتتاردىڭ رۇقسات ەتىلگەن كونسەنتراسياسى مولشەرىنەن اسىپ كەتكەن جاعدايدا، كومىرقىشقىل گازىن انىقتايتىن دابىل قۇرىلعىسى ىسكە قوسىلىپ، تۇرعىندارعا قاۋىپتىلىك تۋرالى اپاتتىق-دىبىستىق سيگنال ەستىلەدى. بۇگىنگى تاڭدا مۇنداي قۇرىلعىلار قالا بويىنشا 136 جەكەمەنشىك ۇيگە ورناتىلدى.

2019 جىلدىڭ 9 اقپانىندا الماتى گارنيزونىنىڭ جەكە قۇرامى جپق-ى، اۋداندىق اكىمدىكتەر، «نۇر وتان» پارتياسى جانە ق ر قىزىل جارتى اي قوعامىنىڭ ەرىكتىلەرىمەن بىرلەسىپ، 8 مىڭ 364 تۇرعىن ءۇيدى تەكسەرىپ، ءورت قاۋىپسىزدىگى ەرەجەلەرىن ساقتاۋ تۋرالى 10 مىڭنان استام جادىناما تابىستالدى.

الماتى قالاسىنىڭ توتەنشە جاعدايلار دەپارتامەنتى قىزمەتكەرلەرى تاراپىنان جەكەمەنشىك تۇرعىن ۇيلەردە ءورتتىڭ الدىن الۋ شارالارىنا قاتىستى جۇمىستار جىلىتۋ ماۋسىمىنىڭ اياعىنا دەيىن جالعاساتىن بولادى.

ۇسىنعان: نازەركە لابيحان