"قارا مايور" اتىمەن تانىمال بوريس كەرىمبايەۆ 71 جاسىندا باقيلىق بولدى دەپ جازادى Qamshy.kz اقپارات اگەنتتىگى. بۇل تۋرالى شوقان سىزدىق ۇلى ءوزىنىڭ فەيسبۋك پاراقشاسىنا جازدى. 

"قوش بول اعا!

— "گرۋ - قاتالدىققا ۇيرەتەتىن مەكتەپ. مەن سول مەكتەپتىڭ ايلا ءتاسىلىن نازىك جۇرەگىممەن قابىلداپ، جۇرەك قالاۋىمەن نازىك جۇرەگىممەن سوعىستىم"، دەگەن. "قارا مايور" اعامنىڭ بۇگىن تاڭ الدىندا نازىك جۇرەگى توقتادى. "بالام، ەلىم باردا ۇلىلىق ەسكەرۋسىز قالمايدى"، دەپ ەدى سوڭعى كەزدەسكەندە. "اسپانداي بەرمە، جەردەن ۇزاپ كەتەسىڭ. جەردەن ۇزاپ كەتسەڭ، ەلدەن ۇزاپ كەتەسىڭ. ەلدەن ۇزاپ كەتسەڭ، بارساكەلمەسكە كەتەسىڭ"، دەپ ۇرىسىپ-ۇرىسىپ الۋشى ەدى. بۇگىن مىنە اڭىز ادام بوريس توكەن ۇلى كەرىمبايەۆ كەلمەستىڭ كەمەسىنە ءمىنىپ بارساكەلمەسكە اتتانىپ كەتتى. قوش بول اعا!، - دەپ جازدى شوقان سىزدىق ۇلى. 

ايتا كەتسەك، كەشە قورعانىس ءمينيسترى نۇرلان ەرمەكبيەۆ اۋرۋحانادا جاتقان بوريس كەرىمبايەۆتىڭ پالاتاسىنا بارىپ كوڭىلىن سۇراپ، ونى  اسكەري بارلاۋدىڭ "التىن ۇكى" بەلگىسىمەن ماراپاتتاعان بولاتىن. 

***

بوريس توكەن ۇلى كەرىمبايەۆ 1948 جىلى 12 قاڭتاردا الماتى وبلىسى جامبىل اۋدانىندا دۇنيەگە كەلگەن. 1970 جىلى ۆ.ي.لەنين اتىنداعى تاشكەنت اسكەري ۋچيليششەسىن ءتامامداعان. 1980-1983 جىلدارى اۋعان سوعىسىنا قاتىسىپ ارنايى تاپسىرمالاردى ورىندايتىن مۇسىلمان باتالونىنىڭ كومانديرى بولدى.

ساۋاتتى باسشىلىقتىڭ ارقاسىندا باتىر كومانديردىڭ ساربازدارى از شىعىنعا ۇشىراپ، كوبىنەسە جەڭىسكە جەتىپ وتىرعانىن جۇرتشىلىق جاقسى بىلەدى. ونىڭ ەرلىگى اڭىزعا اينالىپ «قارا مايور» دەگەن لاقاپ اتى كۇللى ايماققا جايىلدى.

«سپەسناز گرۋ سسسر» دەگەن كىتاپتاعى ءتىزىم بويىنشا ءتورتىنشى ورىندى نىق يەلەنگەن قازاق جىگىتىن سول كەزدەگى كەڭەستىك ساياساتتىڭ ءوزى وسىلاي جوعارى كوتەرىپ مويىنداعان. 1992 جىلى دەنساۋلىعىنا بايلانىستى پولكوۆنيك شەنىمەن وتستاۆكاعا شىقتى. باتىر تۋرالى «قارا مايور» ءفيلمى ءتۇسىرىلدى.

ۇسىنعان: اسەل بولات قىزى