"بۇگىن ءۇشىنشى كۇن، تاس قاراڭعى، سۋىق ۇيدە وتىرمىز". استاناداعى ءورت وقيعاسىنان زارداپ شەككەن تۇرعىندار وسىلاي دەپ، جەرگىلىكتى بيلىكتەن جاردەم سۇراپ وتىر. جەكەمەنشىك جاتاقحانالاردىڭ بىرىندە بولعان توتەنشە جاعداي كەزىندە بالالار تەرەزەدەن سەكىرىپ كەتكەن. ءقازىر اۋرۋحانادا جاتىر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.  

وقيعا 9 اقپان، سەنبى كۇنى كەشكى ساعات 8-دەن اسا بولعان. استانانىڭ بايقوڭىر اۋدانى، ويىل كوشەسىندە. الدىمەن جارىق ءوشىپ قالعان. ءجيى بولىپ تۇراتىن جاعدايعا بويى ۇيرەنگەن تۇرعىندار ەلەكتر جارىعىنىڭ جانۋىن كۇتىپ وتىرعاندا ءتۇتىننىڭ ءيىسى شىعىپتى. ءورت ءبىرىنشى قاباتتا كىرە بەرىستەگى تۇرمىستىق بولمەدەن تۇتانعان. قۇتقارۋشىلار دا دەر كەزىندە جەتىپتى. 
 
“الدىندا ەلەكتر سىمىنىڭ تۇيىقتالۋى باستالىپ، تۇتىندەنىپ، ءورت شىقتى. كوريدوردا وت شاشىراي باستادى. ەسىكتى جابا سالدىم دا، ەكى نەمەرەمدى، بالالاردى الىپ تەرەزەدەن شىقتىق”، - دەيدى جاتاقحانا تۇرعىنى گۇلميرا شىعانبايەۆا.

قويۋ ءتۇتىننىڭ ءيىسى عيماراتتىڭ ءىشىن  الىپ كەتكەن. دۇرلىككەن تۇرعىندار بالالارمەن بىرگە  جاتاقحانانىڭ ەكىنشى قاباتىنان سەكىرگەن.  وقيعا كەزىندە ءتورت بالاعا ءيىس ءتيىپ، اۋرۋحاناعا ءتۇستى. سول تورتەۋدىڭ ءبىرى - ايدىن راحىمجانوۆ. بالعىن سول كۇنى وقيعانى ءالى ۇمىتا الار ەمەس.   

“ءبىز ەكىنشى ەتاجدان سەكىردىك. سوسىن مامام ايتتى، كومەكتەسىڭدەر دەپ. اعايلار كەلىپ، ءبىزدى كوتەرىپ الىپ شىعاردى. سوسىن دارىگەرگە باردىم”، - زارداپ شەككەن ايدىن راحىمجانوۆ.

زارداپ شەككەن 4 بالانىڭ ەكەۋى ۇيلەرىنە شىعارىلعان. ال 2012 جانە 2013 جىلعى تۋعان  ەكى كىشكەنتاي ءالى دارىگەرلەردىڭ باقىلاۋىندا. مامانداردىڭ سوزىنشە، بالالارعا ءيىس تيۋمەن قاتار، ولار  قاتتى ۇرەيلەنىپ قالعان. سول ءۇشىن ناۋقاستارمەن پسيحولوگتار جۇمىس ىستەۋدە. 

“بالالاردىڭ جاعدايى تۇراقتى. ءقازىر ەكى بالا جاتىر. ۇلكەندەۋ ەكى بالانىڭ جاعدايى دۇرىستالدى، اتا-اناسى الىپ كەتتى ۇيىنە. قالعان ەكەۋى جامان ەمەس، ءبىر ەكى كۇننىڭ ىشىندە ۇيلەرىنە كەتەدى”، - دەيدى №2 قالالىق بالالار اۋرۋحاناسىنىڭ باس دارىگەرى ءبىرجان دوسمايلوۆ.

وسى وقيعانىڭ الدىندا دا جۋىردا جاتاقحانادا ءورت شىعىپتى.  سول كەزدە ءمان-جايدى كورگەن پاتەر جالداۋشىلار ءوز كۇشتەرىمەن اعاشتان باسپالداق جاساپ، ەۆاكۋاسيالىق جول دايىنداپ قويعان ەكەن. "سونىڭ ارقاسىندا امان قالدىق"، دەيدى. 

“جۇما كۇن ەدى، ەرىنبەي، اسىعىپ تۇرسام دا ۇستىنە تراپ قويىپ، جاعداي بولسا، سەكىرەسىڭدەر دەپ قويىپ كەتكەم. ءسويتىپ ءبارى سول جاقتان قاشىپ شىققان، ونىڭ ۇستىنە سول كۇنى ايەلىمنىڭ ءسىڭىلىسى كەلگەن، تاعى ءبىر كىسى قوناققا كەلگەن، ونىڭ ەكى بالاسى. ءوزىمنىڭ بەس بالام بار، ءبارى تەرەزەدەن شىقتى”، - دەپ ايتتى جاتاقحانا تۇرعىنى جاندار الييەۆ.

سەنبى كۇننەن بەرى بۇل مەكەن جايدا نە جارىق، نە جىلۋ، نە سۋ جوق. جاقىندا عانا پاتەراقىنى تولەگەن تۇرعىندار جاعدايىمىز قيىنداپ كەتتى دەپ ناليدى.  

“سول كۇنى  ساعات 8-دەن باستالعان ورتتەن تاڭعى 6-عا دەيىن وسى جەردە جۇردىك. ءبىزدى ەشقانداي جىلى جەرگە اپارعان جوق. جاعدايىمىز جاسالعان جوق. بۇگىن ءۇشىنشى كۇن، سۋىق ۇيدە وتىرمىز. بالالاردى تۋىستارىمىزعا اپاردىق. بالالار ساباققا بارا المادى”، - دەيدى جاتاقحانا تۇرعىنى گۇلميرا شىعانبايەۆا.

ءار بولمەنى جالعا بەرىپ وتىرعان جاتاقحانا يەسى دە ءالى توبە كورسەتپەگەن. "كەلەمىن" دەپ جەتە الماي جاتقان كورىنەدى. ءبىز دە تەلەفون سوعىپ، حابارلاسا المادىق.

ۇسىنعان: نازەركە لابيحان