استانا قالاسىندا بۇگىن كەزەكتى ۇكىمەت ساعاتى بولىپ ءوتتى. جيىندا پرەمەر-مينيستر باقىتجان ساعىنتايەۆ 4 اقپان كۇنى استانا قالاسىندا بولعان قازالى وقيعاعا بايلانىستى  بەس بالانىڭ قازاسىنان كەيىن جاۋاپتى شەنەۋنىكتەر جازالانعانىن ايتتى دەپ جازادى Qamshy.kz اقپارات اگەنتتىگى.

سونىمەن، باقىتجان ساعىنتايەۆ بۇگىنگى جيىندا تجك ءتوراعاسىنىڭ ورىنباسارى بارات دۇزاقبايەۆتى قىزمەتىنەن بوساتتى.

-بارات وسپان ۇلى ۇزاق جىلدار بويى استانانىڭ توتەنشە جاعدايلار دەپارتامەنتىن باسقارىپ كەلدى. سوڭعى كەزدە عانا كوميتەتكە اۋىسقان، - دەدى ساعىنتايەۆ.

سونداي-اق، پرەمەر-مينيستر "ءورت قاۋىپسىزدىگى جانە ونىڭ الدىن الۋ شارالارىن تيىسىنشە اتقارمادى، باقىلاۋ جۇرگىزبەدى" دەپ  ىشكى ىستەر ءمينيسترىنىڭ ورىنباسارى يۋريي ۆيكتوروۆيچ يلينگە جانە توتەنشە جاعدايلار كوميتەتىنىڭ ءتوراعاسى ۆلاديمير بەككەرگە قاتاڭ سوگىس جاريالادى.

جازاعا ىلىككەن شەندىلەر قاتارى استانالىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى مارعۇلان توپاش ۇلى امانبايەۆپەن تولىقتى. وعان دا پرەمەر-مينيستر باقىتجان ساعىنتايەۆ قاتاڭ سوگىس جاريالادى.

«قازىرگى ۋاقىتتا قانداي ماسەلەلەردى شەشۋىمىز كەرەك؟ «باياعى جارتاس، سول جارتاس» دەگەن ءسوز بار. سۋ تاسقىنى كەلەدى، ۇيلەر سۋدىڭ استىندا قالادى، قىس كەلەدى، ۇيلەر ورتەنىپ جاتادى. ال ءبارىمىزدىڭ باياندامامىز كەرەمەت. مينيسترلەر قانداي كەمشىلىكتەردىڭ بار ەكەندىگىن ايتتى، سول تۋرالى جاۋاپ بەرۋ كەرەك. نە سەبەپتەن قارجىلاندىرۋ ماسەلەسى شەشىلمەدى؟ نەگە بەرىلمەدى، نەگە ىسكە قوسىلمادى؟ ورتكە نە سەبەپتى جول بەرىلدى؟ قانداي تەكسەرىس جۇرگىزىلىپ، نەدەي شارالار قابىلداندى؟ ول تۋرالى ءبىر اۋىز ءسوز جوق. ايتاتىندارىڭىز «ءبارى كەرەمەت، ءبارى جاقسى، قاتاڭ باقىلاۋدا». قانداي باقىلاۋدا ەكەندىگىن كورىپ وتىرمىز»، - دەپ ايتىپ ءوتتى باقىتجان ساعىنتايەۆ.

ۇسىنعان: نازەركە لابيحان