2019 جىلدىڭ 13 اقپانىندا الماتى قالاسىنداعى «العاباس-6» ىقشاماۋدانىنىڭ تۇرعىنى ءدال ۇلىنىڭ تۋعان كۇنىندە ليفت شاحتاسىنا قۇلاپ قايتىس بولدى.  كورشىلەرىنىڭ ايتۋىنشا، اۋعان سوعىسىنىڭ ارداگەرى تالعات جاستىقبايەۆ ىستەمەي تۇرعان ليفت شاحتاسىنا ساعات 16:20-دە قۇلاعان، الايدا دەنەسى تەك 21:00-دە ءبىر-اق تابىلدى. وقيعانىڭ جالپى قالاي بولعانىن Qamshy.kz اقپارات اگەنتتىگى تىلشىسىنە 144ء-ۇيدىڭ پودەزدەرىنە جاۋاپ بەرەتىن تۇرعىن ايدانا شۇيىنشالييەۆا بايانداپ بەردى.

ايدانا شۇيىنشالييەۆانىڭ ايتۋىنشا، وقيعا 144ء-ۇيدىڭ 1 پودەزىندە بولعان. مارقۇم ەر ادام 6-قاباتتا تۇرادى ەكەن. ونىڭ نەدەن قايتىس بولعانىن ءبىلۋ ءۇشىن تۇرعىندار ۆيدەوباقىلاۋدى كورگەن. ۆيدەودان كورسەتىلگەندەي، ەر ادام جالعىز ءوزى سىرت كيىمسىز شىعىپتى. الايدا قايدا شىققانى بەلگىسىز. ونىڭ ۇستىنە كەشە ۇلىنىڭ تۋعان كۇنى بولعان.

«ول كىسى 144ء-ۇيدىڭ 1ء-شى پودەزىندە تۇرادى. بىلتىر 2 پودەزگە تولىق ۆيدەوباقىلاۋ قويعىزعانبىز. ءتىپتى ءليفتتىڭ ىشىندە دە بار. وقيعا جايلى ەستي سالا بىردەن ۆيدەوباقىلاۋعا جاۋاپ بەرەتىن ماماندارعا حابارلاستىم. سەبەبى تۇسىنىكسىز جاعداي ەدى: جاڭاعى ەر ادام ءليفتتىڭ ىشىنەن ەمەس، شاحتادان تابىلدى. ەر ادام 21:00-دە تابىلدى. سول ۋاقىتتان 23:00-گە دەيىن جاتقان جەرىندە جاتتى. سەبەبى تج كوميتەتىنە حابارلاستىق، ولار كەلمەدى. ول جەردەن مارقۇمدى تەك سولار الىپ شىعۋى كەرەك ەكەن. ال ول كىسىلەر 23:00-دەن وتە كەلدى. ايتۋلارىنشا، شاقىرۋ 23:00-دە تۇسكەن. ول جاقتا پوليسيا قىزمەتكەرلەرى دە ءجۇردى. ال ۆيدەوباقىلاۋ وكىلى دە  العاشىندا كەلۋدەن باس تارتتى. پوليسيا ارقىلى شىقتىق»، - دەدى 144ء-ۇيدىڭ تۇرعىنى.

ۇلىنىڭ تۋعان كۇنى بولعاندىقتان ۇيىنە تۋعان-تۋىستارى جينالعان. ءبارى دەرلىك تالعاتتى سىرتقا شىعىپ كەتتى دەپ ويلاپتى. الايدا 4 جارىمنان بەرى ورالماعان اكەسىن ۇلى ىزدەۋگە كىرىسەدى. بۇل ۋاقىتتا كورشىلەرى ءليفتتىڭ ىستەمەي تۇرعانىنا بايلانىستى ارنايى ماماندارعا دا حابارلاسىپ قويعان ەدى. ولار كەشكى 21:-دە كەلدى. ءارى ەر ادامنىڭ ليفت شاحتاسىندا جاتقانىن دا بايقاعان سول ماماندار بولدى. تەك توتەنشە جاعدايلار كوميتەتى كەلمەيىنشە، ەر ادامدى شاحتادان الىپ شىعۋدان باس تارتتى.

«سەنەسىزدەر مە، الگى كىسى انا شاحتادا نەشە ساعات بويى جاتقان. بۇل مارقۇمنىڭ جاقىندارىن ابدەن اشۋلاندىردى. ءتىپتى سوڭى توبەلەسكە ۇلاسىپ كەتەردەي بولدى. سەبەبى ءبارى شاراسىز ەدى. اقىرى ۆيدەوباقىلاۋ ماماندارى دا، تج قىزمەتكەرلەرى دە كەلدى. ۆيدەودان كورگەنىمىزدەي، انا كىسى ءليفتتى شاقىراتىن نۇكتەنى باسقان. ول كەلمەگەن سوڭ، ءبىراز كۇتتى دە، باسپالداقپەن ءتۇسىپ كەتتى. ءبىراق نەگە ەكەنى بەلگىسىز، قايتادان كوتەرىلدى. ءليفتتى تاعى شاقىردى، كەلمەگەن سوڭ ءتۇسىپ كەتتى. ءدال وسىلاي ول كىسى ءۇش  رەت ءتۇسىپ، ءۇش رەت كوتەرىلدى. ۆيدەودان داۋىس ەستىلمەيدى، سوندىقتان نە سەبەپتى كوتەرىلگەنى بەلگىسىز. "بالكىم ءليفتتىڭ قوزعالعان داۋسىن ەستىپ، ىستەدى" دەگەن ويمەن كوتەرىلگەن بولار. سوڭعى كوتەرىلگەنىندە شاحتانىڭ ەسىگىن اشتى. ال ول ەسىك وپ-وڭاي اشىلا كەتتى. نەگىزى ليفتتەردىڭ ەسىگىنە ءتىپتى كۇشى تاسىپ تۇرعان ادامنىڭ كۇشى جەتپەۋى ءتيىس ەدى عوي. جوق، ەسىك اشىلىپ كەتتى. ول كىسى تومەنگە قارايمىن دەي بەرگەندە اياعى شالىنىپ، قۇلاپ ءتۇستى. ول كەزدە ساعات 16:20-نى كورسەتىپ تۇردى»، - دەدى ايدانا شۇيىنشالييەۆا.

ياعني، 16:20-دا ليفت شاحتاسىنا قۇلاعان ەر ادامنىڭ ءولى دەنەسىن ول جەردەن تەك تۇنگى 23:00-دە الىپ شىققان. 9 ساعاتقا جۋىق جاتقان تالعاتتى دارىگەرلەر دە قۇتقارا المادى. ال ءدال ۇلىنىڭ تۋعان كۇنىندە كەلگەن اجال مارقۇمنىڭ جاقىندارىن قاتتى ەسەڭگىرەتىپ جىبەردى.  

رەسمي اقپاراتتى ءالى ەشبىر ورگان بەرگەن جوق. الاتاۋ اۋدانى اكىمدىگى تۇستەن كەيىن حابارلاسۋدى سۇراسا، الماتى قالاسى ءىىد باسپا ءسوز حاتشىسى سالتانات ازىربەك اۋىزشا تۇسىنىكتەمە بەرۋدەن باس تارتىپ، بولعان وقيعانى جازباشا تۇردە پوشتامىزعا جىبەرۋگە ۋادە بەردى. ازىرگە قايعىلى جاعدايعا كىمنىڭ جاۋاپتى ەكەنى بەلگىسىز.