ەلىمىزدە دۇنيەدەن وتكەن ءاربىر ادام زەينەتاقى قورىنداعى قارجىسىنىڭ ەسەبىنەن جەرلەنەدى.

ال، قايتىس بولعان كىسىنىڭ جيناقتالعان اقشاسى بولماسا، ونى اقتىق ساپارعا شىعارىپ سالعان تۋىستارىنا ۇكىمەت تاراپىنان ءبىر رەتتىك ەڭ تومەنگى جاردەماقى قاراستىرىلعان ەكەن. ەگەردە، مارقۇم ءومىرىنىڭ سوڭىنا دەيىن ەڭبەكتەنىپ وتسە، زەينەتاقى قورىنىڭ وكىلدەرى سالىمشىنىڭ ەت جاقىندارىنا جيناقتالعان سومانى تولىق وتەپ الۋعا مۇمكىندىك بار، دەيدى. الايدا، ءىس جۇزىندە ول اقشانىڭ جۇزدەن ءبىر بولىگى عانا تولەنەدى ەكەن. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.

دۇنيەدەن وتكەن ادامنىڭ زەينەتاقى قورىنا جيعان قارجىسى تۋىستارىنا تولىق قايتارىلادى. بۇل زاڭمەن بەكىتىلىپ، تايعا تاڭبا باسقانداي انىق ەتىپ كورسەتىلگەن. الايدا، قوعام بەلسەندىسى جۇمامۇرات ءشامشى بۇل ويمەن مۇلدەم كەلىسپەيدى. سەبەبى، ونسىز دا قايعىدان قارا جامىلعان وتباسى زەينەتاقى قورىنداعى قارجىنى الۋعا بارعان كەزدە، ول سومانىڭ كولەڭكەسىن دە كورمەيسىڭ، دەيدى. قور وكىلدەرى "قايتىس بولعان ادامنىڭ جيعان-تەرگەنى مەملەكەت مەنشىگىنە ءوتىپ كەتتى" دەپ جاۋاپ بەرەتىن كورىنەدى.

“وكىنىشكە قاراي ول قىپ-قىزىل وتىرىك. مەنىڭ ءبىر اپايىم ءومىر باقي جۇمىس ىستەگەن. سول كىسى زەينەتكەرلىككە جەتپەي 58 جاسىندا دۇنيەدەن وزىپ كەتتى. جالعىز ۇلى بار ەدى بارىپ سۇراعان عوي دەپ بارسا كەشىرەسىز ءسىز ول ادام ەمەسسىز بۇل مەملەكەتتىك بيۋدجەتكە ءوتىپ كەتەدى دەپ ءبىر تيىندا بەرمەگەن. سول سەكىلدى بىزدە كۇندە ءبىر زاڭ شىعادى دا ءبىراق ول ورىندالمايدى وكىنىشكە قاراي"، - قوعام بەلسەندىسى جۇمامۇرات ءشامشى.

ال، زەينەتاقى قورى وكىلدەرىنىڭ سوزىنە سەنسەك ەلىمىزدە ومىردەن وتكەن ادامنىڭ جيعان-تەرگەنى ەسەبىنەن ءبىر رەتتىك جاردەماقى قاراستىرىلعان. ال، قوردالانعان قارجىنى تولىق قايتارىپ الۋ ءۇشىن تۋىستارى 6 ايدان سوڭ، ەت جاقىنىنىڭ قايتىس بولعانى جونىندەگى قۇجات پەن مۇراگەرلىك انىقتاماسىن وتكىزىپ، اقشانى الۋ جونىندە ءوتىنىش بەرۋ قاجەت ەكەن. سوندىقتان قوعام بەلسەندىسىنىڭ ءسوزى نەگىزسىز، - دەيدى. 

"بجزق جيناقتالعان ازاماتتاردىڭ جيناقتارى وسيەت بويىنشا نەمەسە مۇراگەرلىككە قالدىرىلادى، ەگەر ازامات قايتىس بولعان جاعدايدا.قارجىلىق جىلعا بەلگىلەنگەن اەك 52،4 مولشەرى ول ازاماتتى جەرلەۋ راسىمدەرىن اتقارعان ازاماتقا بەرىلەدى. بۇل بۇگىنگى كۇندە 132 مىڭ 300 تەڭگەنى قۇرايدى"، دەپ ايتادى "بجزق" اق استانا فيليالىنىڭ ديرەكتورى مۇرات ءشارىپوۆ.
      
ءدام-تۇزى تاۋسىلىپ، ومىردەن وزعان كىسى ەگەر دە ەش جەردە تۇراقتى جۇمىس ىستەمەسە ولاردىڭ تۋىستارىن دا وكىمەت جارىلقاۋسىز قالدىرمايدى. مينيسترلىك وكىلدەرىنىڭ ءسوزى وسىعان سايادى. مەملەكەتتىك قىزمەتكەرلەر، ءتىپتى، ەڭبەگى ەلەنگەن سوعىس ارداگەرلەرى دە دۇنيەدەن وتكەن جاعدايدا جەرلەۋىنە قوماقتى قاراجات قاراستىرىلعانىن ايتادى.              

"بۇگىنگى كۇنى 19 جىلى ونىڭ مولشەرى 39 مىڭ 643 تەڭگە. ق ر زەينەتاقىمەن قامسىزداندىرۋ زاڭىنا سايكەس ۇلى وتان سوعىسىنا قاتىسۋشىسى نەمەسە مۇگەدەگى قايتىس بولعان جاعدايدا ونىڭ وتباسىنا نەمەسە جەرلەۋدى جۇزەگە اسىراتىن ازاماتتارعا وسى بيۋدجەت تۋرالى زاڭىندا بەلگىلەنگەن اەك كورسەتىلگەن 36،6 نەمەسە 92 مىڭ 415 تەڭگە كولەمىندە جاردەماقى تاعايىندالادى. اتالعان جاردەماقىلار تەك ءبىر رەت تاعايىندالادى"، - دەيدى ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون باسقارما باسشىسى جادىرا داۋلەتحانوۆا.        
    
ەسەسىنە جەرلەۋ ءراسىمىنىڭ شىعىنى تولىق مەملەكەت تاراپىنان وتەلەتىن تۇلعالاردىڭ دا ساناتى بەلگىلى بولدى. ولاردىڭ قاتارىنا قوعامنىڭ دامۋىنا ۇلەس قوسقان قايراتكەرلەر كىرەدى. و دۇنيەلىك بولعان ونداي كىسىلەرگە استانادا جاڭادان بوي كوتەرگەن ۇلتتىق پانتەوننان جەر بۇيىرادى. ال، قاراپايىم حالىق ادامداردى تاپقا بولمەي، دۇنيەدەن وتكەن جاعدايدا تولىق زەينەتاقى قورىنداعى قارجى وتباسىنا كومەك رەتىندە بەرىلۋى قاجەت دەگەن پىكىردە.  

"جەرلەۋ راسىمدەرىنە بەرىلۋى قاجەت. سەبەبى، كىم بىلەدى ءومىر جولىمىز قانداي بولاتىنىن. قارجىمىزدىڭ بالا-شاعامىزعا قالعانى دۇرىس. ويتكەنى، ونى ادال ەڭبەگىمىزبەن تاپقان تابىسىمىز عوي".
"ادام قايتىس بولعاننان كەيىن، ونىڭ جيناعان قارجىسى كوپ بالالى وتباسىلارعا، تۋىستارىمىزعا بەرىلۋى ءتيىس. ول اقشا وكىمەتكە كەتپەۋ كەرەك".   

ءدىن وكىلدەرى بولسا، قوعامدى باي مەن كەدەي دەپ ەكىگە جارىپ، ولارعا جەرلەنەتىن ارنايى جەر ازىرلەۋ، جيناعان قارجىسىنا قاراي كومۋ دۇرىس ەمەس دەگەن پايىمدا.

"ول قازا بولعاننان كەيىن، ءوزىنىڭ جيعان-تەرگەن دۇنيەسىمەن جانازالانىپ شىعارىلادى. ەكىنشى جاڭاعى ميراسقورلارىمەن ءوزىنىڭ اعايىن-تۋىس بالا-شاعاسى. ءۇشىنشى جاۋاپتى سول جەرگە ادامدار. نە بولماسا ەل بولىپ، اعايىن بولىپ، كورشى قولاڭ بولىپ شىعارىلادى. تاعى ايتىپ وتەمىن، قاراجاتتى جانازاعا اكەپ تىرەۋگە بولمايدى"، - دەيدى "نۇر استانا" مەشىتىنىڭ نايب يمامى بەكزات اوجىگىتوۆ.

قوعام بەلسەندىلەرى جەرلەۋ تۋرالى زاڭ قابىلداندى، ەندى سونىڭ ورىندالۋىنا كوڭىل ءبولۋىمىز قاجەت دەگەن پىكىردە . ويتكەنى، ءقازىر كوپشىلىك زاڭ جوبالىرى قاعاز جۇزىندە بار، ءىس جۇزىندە ونىڭ قولدانىستا ەكەنى بىلىنبەيدى، - دەيدى.         

ۇسىنعان: نازەركە لابيحان