كۇنى كەشە عانا استانا قالاسىنىڭ اكىمدىگى كوپ بالالى انالارعا جيىن وتكىزۋدەن باس تارتىپ، ولاردى جەكە-جەكە قابىلدايتىندارىن مالىمدەگەن. ءبىراق بۇعان كەلىسپەگەن ولار استانا كونسەرت زالىنا جينالىپ، قالا اكىمىن اشىق سۇحباتقا شاقىردى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.
الدىمەن حالىقتى قابىلداۋدان باس تارتقان اكىمدىك، 1 ساعاتتان اسا ۋاقىتتان كەيىن جينالعانداردى اكت زالعا كىرگىزىپ، تىنىشتىق ساقتاۋىن سۇرادى. استانا قالاسىنىڭ اكىم باقىت سۇلتانوۆ بۇل جولى ساحناعا ءوزى شىعىپ، ءسوز سويلەدى.
«سۇراقتارىڭىزدى قاراۋ ءۇشىن ارنايى اشىق ەسىك جاريالادىق. ءبىراق بىلاي شۋلاپ، جينالىپ، قاتتى ايتقاندارىڭىز دۇرىس ەمەس. سوندىقتان ءار ماسەلە شەشىلىپ، ءار وتباسىنىڭ جاعدايى قارالادى. ۋادە بەرىپ وتىرمىن. ءتيىستى باعدارلامالار، شارالار بارلىق وبلىستاردا ازىرلەنىپ جاتىر. بۇل ءبىر كۇندە شەشىلەتىن ماسەلە ەمەس»، - دەدى سۇلتانوۆ.
الايدا اكىمنەن ناقتى جاۋاپ الا الماعان كوپ بالالى انالار "ماسەلەمىز شەشىلمەيىنشە كەتپەيمىز" دەپ اكت زالدان شىقپايتىندارىن مالىمدەدى.
ەسكە سالا كەتەيىك، 4 اقپاندا استاناداعى اۋدانداردىڭ بىرىندە كەنەتتەن شىققان ورتتەن 2006، 2008، 2013، 2015 جانە 2018 جىلعى 5 قىز بالا قازا تاپتى. وقيعا بولعان ساتتە ولاردىڭ اتا-انالارى ۇيدە بولماعان.
وسى وقيعادان كەيىن جەر-جەردە كوپ بالالى انالار باس كوتەرىپ، مەملەكەت باسشىسى نۇرسۇلتان نازاربايەۆتان باسپانا مەن الەۋمەتتىك جاعدايلارىن كوتەرۋدى تالاپ ەتە باستادى.
ۇسىنعان: اسەل بولات قىزى
