استانادا قالا اكىمى باحىت سۇلتانوۆتىڭ توراعالىعىمەن قالا تۇرعىندارىنىڭ ءومىر ءسۇرۋ ساپاسىن جاقسارتۋ جونىندەگى جۇمىس توبىنىڭ وتىرىسى ءوتتى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنە سىلتەمە جاساپ.
«سوڭعى ۋاقىتتا اۋداندىق اكىمدىكتەر مەن سالالىق باسقارمالار ازاماتتاردى قابىلداۋ جۇمىستارىن جۇرگىزدى. ناتيجەسىندە اسا مۇقتاج وتباسىلاردىڭ دەرەكتەر بازاسى جاسالدى، ءار وتباسىنىڭ پورترەتىن ءتۇزىپ، ناقتى قاجەتتىلىكتەرى مەن پروبلەمالارىن كورىپ وتىرمىز. ءبىرىنشى كەزەڭدە شۇعىل تۇردە ازىق-تۇلىك، كومىر، مەكتەپ كەرەك-جاراقتارىمەن قامتىلىپ، ءاقپاراتتىق-تۇسىندىرۋ كەڭەستەرى وتكىزىلدى. دەمەۋشىلەر مەن ەرىكتىلەر اۋداندار اكىمدىكتەرىنىڭ ۋاقىتشا تۇراقتار مەن جەكەمەنشىك ءۇي قۇرىلىستارىندا گاز تالداۋىشتارىن ورناتۋ جونىندەگى باستامالارىن قولدادى. ءاربىر وتباسىن قولداۋ بويىنشا جەكە شارالار جوسپارى ازىرلەندى»، – دەپ اتاپ ءوتتى باقىت سۇلتانوۆ.
ازاماتتاردى قابىلداۋ كەزىندە كوتەرىلگەن ءتۇيىندى ماسەلەلەردىڭ ءبىرى – تۇرعىن ءۇيدىڭ قولجەتىمدىلىگى.
«اسقار كەمەڭگەر ۇلى، سىزگە ەسكى ءارى اۆاريالىق تۇرعىن ۇيلەردى بۇزۋ جانە ۇلەسكەرلەرگە كومەك كورسەتۋ ءۇشىن قۇرىلعان ينستيتۋتتاردى بىرىكتىرۋ ەسەبىنەن قوسىمشا رەسۋرستار ىزدەستىرۋدى تاپسىرامىن (انىقتاما رەتىندە: «ەلوردا دامۋ» ج ش س – «نۇرلى جەر» تۇرعىن ءۇي قۇرىلىسى باعدارلاماسى مەن اۆاريالىق تۇرعىن ۇيلەردى بۇزۋ جوباسى شەڭبەرىندە جوبالاردى ىسكە اسىرادى، «ەلوردا قۇرىلىس» ج ش س – پروبلەمالى نىسانداردىڭ قۇرىلىسىن اياقتاۋدى ۇيىمداستىرۋمەن اينالىسادى، سونداي-اق «نۇرلى جەر» تۇرعىن ءۇي قۇرىلىسى باعدارلاماسىنا سايكەس جاڭا تۇرعىن ءۇي كەشەندەرىنىڭ قۇرىلىسىنا قاتىسادى). وسى ەكى باعىتتى مىسالعا الا وتىرىپ، بيۋدجەت قاراجاتىن تاۋىپ، شەت ايماقتاردى ەسكى جانە اپاتتى ۇيلەردى بۇزۋ باعدارلاماسىنا، مۇمكىن، استانانىڭ شەتىندە ورنالاسقان قازىرگى قايتا جاڭارتۋ باعدارلاماسىنا قوسىمشا ازىرلەۋ جولىمەن قوسۋ كەرەك. ءبىز از قامتىلعان وتباسىلاردى جانە كومەككە اسا مۇقتاج، ونىڭ ىشىندە كوپ بالالى وتباسىلاردى مۋنيسيپالدىق تۇرعىن ۇيمەن قامتاماسىز ەتۋىمىز كەرەك»، – دەدى اكىم.
«سونىمەن بىرگە، ءبىز حالىقتىڭ الەۋمەتتىك وسال توپتارى ءۇشىن مۋنيسيپالدىق جالعا بەرىلەتىن تۇرعىن ۇيگە قولجەتىمدىلىك ماسەلەسى وتكىر تۇرعانىن تۇسىنەمىز. ازاماتتاردىڭ تابىسى پاتەر الۋعا نەسيە الۋ ءۇشىن جەتكىلىكسىز بولعاندىقتان، ءبىز بۇگىنگى كۇنى قالالىقتاردىڭ ۋاقىتشا تۇراقتاردا، 15-20 مىڭ تەڭگەگە بولمە جالداپ، جاتاقحانالار نەمەسە زاڭسىز قۇرىلىستاردا تۇرىپ جاتقانىن كورىپ وتىرمىز»، - دەپ ءسوزىن جالعاستىردى.
اكىم «جۇمىسپەن قامتۋدىڭ جول كارتاسى»، «بيزنەستىڭ جول كارتاسى» باعدارلامالارىنىڭ مۇمكىندىكتەرىن پايدالانا وتىرىپ، قيىندىقتارعا تاپ بولعان ءاربىر وتباسىعا الەۋمەتتىك قولداۋ مەن اتاۋلى الەۋمەتتىك كومەك كورسەتۋدى تاپسىردى. بۇل رەتتە، ول قالالىقتاردىڭ تولەم قابىلەتتىلىگى دەڭگەيىن ارتتىرۋ قاجەتتىگىنە باسا نازار اۋداردى.
«ماليكا ەرلان قىزى، كوپ بالالى وتباسى مۇشەلەرىن جوعارى اقى تولەنەتىن جۇمىسپەن قامتاماسىز ەتۋ مۇمكىندىگىن قاراستىرۋدى تاپسىرامىن. بىلىكتىلىگى جەتكىلىكسىز بولعان جاعدايدا، كەيىننەن قالا ءۇشىن ماڭىزدى باسىم باعىتتارعا جۇمىسقا ورنالاستىرۋ ارقىلى بىلىكتىلىگىن ارتتىرۋدى قامتاماسىز ەتۋ قاجەت. سونداي-اق قولدا بار اقپاراتتىڭ نەگىزىندە تۇرعىن ءۇي سەرتيفيكاتتارىن تاپسىرۋ مۇمكىندىگىن قوسا الىپ، كومەك كورسەتۋ ءۇشىن رەسۋرستاردى جۇمىلدىرۋ الگوريتمىن جاساۋدى تاپسىرامىن»، – دەدى باقىت سۇلتانوۆ.
اۋدان اكىمدەرىنە اكىمدىك باسقارمالارىنىڭ باسشىلارىمەن بىرگە قالا باسشىسى بۇرىن جاريالانعان «اشىق ەسىك اپتالىعى» اياسىندا ازاماتتارمەن جەكە كەزدەسۋلەردى جالعاستىرۋدى تاپسىردى.
«كوپ بالالى وتباسىلار مەن باسقا دا ازاماتتار ايتقان بارلىق سۇراۋلار مەن وتىنىشتەردى تالداپ جەدەل جۇيەگە كەلتىرۋ كەرەك جانە جۇمىس توبىنىڭ قاراۋىنا ۇكىمەتكە جولداۋ قاجەت»، – دەپ مالىمدەدى اكىم.
ايتا كەتەيىك، سوڭعى مالىمەتتەر بويىنشا، بۇگىنگى تاڭدا استانادا 4 جانە ودان دا كوپبالا تاربيەلەپ وتىرعان 10095 وتباسى تۇرادى.
ۇسىنعان: گۇلىم جاقان
