پارلامەنت ءماجىلىسىنىڭ دەپۋتاتى،  بۇرىنعى ەڭبەك جانە حالىقتى الەۋمەتتىك قورعاۋ ۆيسە-مينيسترى نۇرجان التايەۆ "ءبىر بالانى باعۋعا ايىنا 20 مىڭ تەڭگە جەتكىلىكتى" دەگەن ءسوزىن ءتۇسىندىردى، دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"20 مىڭ تەڭگە سوماسى ايتىلعاندا، استانادا انالاردىڭ الەۋمەتتىك جاردەماقىنى ءار بالاعا 20 مىڭ تەڭگەگە كوتەرۋ تالابى ەسكە ءتۇستى. قارجى ءمينيسترىنىڭ پىكىرىن بىلەسىزدەر، بۇل ماسەلەنى كوميسسيا قاراپ جاتىر. سوندىقتان وسى جاردەماقى بىردەن ەسىمە ءتۇستى. "ۇنەمدەپ جاراتسا، بۇل قاراجات جەتكىلىكتى بولا ما؟" دەگەن وي كەلدى. بەس بالانىڭ اكەسى رەتىندە 100 مىڭ تەڭگە قوسىلىپ وتىرسا، بۇل وتباسىلىق بيۋدجەتكە جاقسى كومەك بولار ەدى. وسىنداي وي بولعان"، - دەدى التايەۆ.

جانۇياسى جايلى ءسوز قوزعاعان ول ايەلىنىڭ دەكرەت دەمالىسىندا ەكەنىن ايتتى.

♦دەپۋتات: ءبىر بالاعا 20 مىڭ تەڭگەنى جەتكىزۋگە بولادى

"كەنجە بالامىز ءالى ەمىزۋلى. مەن تابىس جاعىن ويلايمىن. اقشا جەتپەي جاتاتىن دا كەزدەر بولادى، بۇل بارلىق وتباسىندا بولاتىن جاعداي. ءوز بيۋدجەتىڭدى ەسەپتەۋىڭ كەرەك. بۇل جاعدايدا كوبىنە وتباسىلاردا ايەلدەر پىسىق كەلەدى، ءبىز دە دە سولاي. ال مەنىڭ مىندەتىم – اقشا تابۋ. ايەلىم بۇل ماسەلەگە مۇقيات قارايدى، قايدا ءارى قالاي جاراتۋ كەرەك ەكەنىن بىلەدى"، - دەدى التايەۆ. 

"ايەلىم سىزدەرگە سۇحبات بەرسە، ناقتىراق تۇسىندىرەر ەدى. مەنىڭ مىندەتىم - تابۋ. بەس بالانىڭ اتا-اناسى اتانساق، ءبىز ولارعا جاۋاپتىمىز. مەن ەر ادام رەتىندە كوبىرەك جاۋاپكەرشىلىك ارقالايمىن"، - دەدى دەپۋتات. 

ول جۇمىسىنىڭ كوپتىگىنە بايلانىستى قوناققا سيرەك باراتىنىن ايتتى. 

"ءبارىن ەسەپتەيمىز، كوممۋنالدىق قىزمەت اقىسى وتباسى بيۋدجەتىنىڭ ءبىرشاما بولىگىن جۇمساۋعا كەتەدى. ءار بولمەدەگى جارىقتى وشىرۋگە تىرىسامىز، سۋدى بوسقا اعىزبايمىز، ازىق-تۇلىكتى بازاردان ارزانىراعىن الامىز"، - دەپ ءبولىستى وتباسى بيۋدجەتىن ۇنەمدەۋ جولىن دەپۋتات. 

ەسكە سالايىق، بۇرىنعى ەڭبەك جانە حالىقتى الەۋمەتتىك قورعاۋ ۆيسە-مينيسترى نۇرجان التايەۆ تاياۋدا عانا پارلامەنت ءماجىلىسىنىڭ دەپۋتاتى بولعان ەدى. ول اۋىل شارۋاشىلىعى ماسەلەلەلەرى بويىنشا كوميتەت قۇرامىنا ەندى.

ۇسىنعان: نازەركە لابيحان