الماتى قالاسىندا المالى اۋداندىق سوتىندا 2018 جىلدىڭ 29 جەلتوقسانىندا بولعان جول اپاتىنا كىنالى ۇلتى دۇنگەن كار يلياستىڭ سوتى جۇرۋدە، - دەپ جازادى Qamshy.kz اقپارات اگەنتتىگى.

ءۇش ادامنىڭ ءومىرىن قيعان جانتۇرشىگەرلىك جول اپاتىنا كىنالى كار يلياس بۇگىنگى سوت وتىرىسىندا وقيعانىڭ قالاي بولعانىن بۇگە-شۇگەسىنە دەيىن ايتىپ بەردى.

♦اتىشۋلى يلياس كار وقيعا ورنىنان نە سەبەپتى قاشىپ كەتكەنىن ءتۇسىندىردى

سوت وتىرىسىندا مارقۇم شولپان ەلگەزەكوۆانىڭ اعاسى كىنالى تاراپتىڭ 4 ميلليون تەڭگە كولەمىندە مورالدىق وتەماقى تولەگەنىن ايتتى. ال جول اپاتىندا امان قالعان اكتريسا ايزادا ساتىبالدييەۆانىڭ كۇيەۋى باقىت بەدەلحان ءوزىنىڭ تاراپىنان كىنالىنىڭ ۇستىنەن سوتقا ارىز جازباعانىن ايتتى.

«مەن ءۇشىن ەڭ باستىسى – ايزادانىڭ اماندىعى. اللاعا شۇكىر، ايزادا امان قالدى، بۇگىندە بەتى بەرى قاراپ كەلەدى. ءبىراق بولعان وقيعا مۇلدەم ەسىندە جوق. كىنالى ازاماتقا كەشىرىم بەرۋ كەرەكتىگىن ءوزى ايتىپ وتىر. «ولارعا كەشىرىم بەرەتىن بولساق، مەن ەرتەرەك ساۋىعامىن، ولار ماعان جاقسى تىلەكتەر ايتاتىن بولادى...» دەيدى. ءبىراق، ول ءوزىنىڭ ەكى قۇربىسى مەن تاكسي جۇرگىزۋشىسىنىڭ سول تۇندە قازا تاپقانىن بىلمەيدى. بۇل وقيعا ونىڭ ەسىندە جوق. «نە سەبەپتى مەن سول ءتۇنى اباي - سەيفۋللين كوشەلەرىنىڭ قيىلىسىندا ءجۇردىم؟ قايدا بارا جاتتىم؟ مەنىڭ قاسىمدا تاعى كىمدەر بولدى؟».-دەپ سۇرايدى. باسىنان قاتتى سوققى العاندىقتان ءقازىر وعان ۋايىمداۋعا، جامان نارسەلەردى ويلاۋعا بولمايدى. سوندىقتان، «تاكسيدە تەك سەن عانا بولدىڭ، تاكسي جۇرگىزۋشىسى دە امان» دەپ ايتۋعا تۋرا كەلدى»، - دەيدى باقىت بەدەلحان.

ونىڭ ايتۋىنشا، ايزادا ساتىبالدييەۆانى اۋرۋحانادان شىعارعاننان كەيىن ءۇش كۇننەن سوڭ قايتادان اۋرۋحاناعا جاتقىزىپتى. "ۇيدە دۇرىس كۇتىنە الماعاندىقتان تولىقتاي ساۋىعىپ كەتۋى ءۇشىن وسى دۇرىس شەشىم" دەپ قابىلداعان ەكەن. باقىت بەدەلحان ءوز سوزىندە بۇگىندە اكتريسانىڭ جاعدايى جاقسارىپ كەلە جاتقانىن ايتتى. سونداي-اق مارقۇم قۇربىسى شولپان ەلگەزەكوۆا جايىندا سۇرايدى ەكەن.

«شوپيك نەگە حابارلاسپايدى؟ ول ۇنەمى حابارلاساتىن ەدى عوي، ودان نەگە ەش حابار جوق؟» دەپ سۇرايدى. كەيىن «شولپاندى تۇركياعا ىسساپارمەن كەتىپتى، سەنىڭ جاعدايىڭدى ەستىمەگەن بولار» دەپ الداۋسىراتتىق»، - دەيدى اكتريسانىڭ جارى.

بەلگىلى بولعانىنداي، اپات بولعان كۇنى شولپان ەلگەزەكوۆا استانادان كەلىپ قۇربىلارىمەن باس قوسىپ وتىرىپتى. كەيىن ولار شولپاننىڭ ۇيىنە قاراي بەت العان بولاتىن، جول اپاتى سول كەزدە ورىن الدى.

«29-ى كەشكىسىن ايزادا شىمكەنتتەگى كارى اناسىنا بارىپ، جاڭا جىلدا سول كىسىنىڭ قاسىندا بولۋدى جوسپارلاعان ەدى. ال شولپان سول كۇنى استاناعا ۇشىپ كەتۋ كەرەك بولاتىن. ءبىراق،  وسىلاي بولدى، جازاتايىم جاعداي عوي»، - دەيدى باقىت بەدەلحان.

جوعارىدا اتاپ وتكەنىمىزدەي اكتريسا مەن ونىڭ جارى باقىت بەدەلحان كىنالى ازاماتتىڭ ۇستىنەن ارىز جازباعان.

«ول ءوزىنىڭ قىلمىسىن مويىندادى، كولىكتى سوققانىن، سونىڭ سالدارىنان ءۇش ادامنىڭ قازا تاپقانىن مويىنداپ وتىر. مەن باسىندا-اق ءسوز العاندا ەشنارسە دە سۇرامايتىنىمدى ايتقانمىن، بارلىعىن دا وزدەرىنىڭ ۇياتىنا قالدىردىم. كىنالى ازاماتتىڭ تۋىستارى ايزاداعا بارىپ، ونى كوردى، كەشىرىم سۇراپ، مورالدىق وتەماقى تولەيتىندەرىن ايتتى. ايزادانىڭ ءوزى دە وعان كەشىرىم بەرەيىك دەپ وتىر. مەن ءۇشىن، ەڭ باستىسى، ايزادا ساۋىعىپ كەتسە بولدى.

ال سول جول اپاتىندا قازا تاپقان مارقۇمداردىڭ تۋىستارىن دا تۇسىنەمىن، ولار ادام جوعالتىپ وتىر، وتە قيىن جاعداي»، - دەپ ايتتى باقىت بەدەلحان.

ەستەرىڭىزگە سالا كەتەيىك، وتكەن جىلدىڭ 29 جەلتوقسانىندا الماتى قالاسىنداعى اباي سەيفۋللين كوشەلەرىنىڭ قيىلىسىندا Gelendwagen جانە Mitsubishi كولىكتەرى سوعىسىپ، ءۇش ادام – شولپان ەلگەزەكوۆا، دينارا حاميتوۆا جانە باقىتنۇر قۇناپيا ۇلى – قازا تاپقان بولاتىن. العاشقىدا Gelendwagen جۇرگىزۋشىسى يلياس كار ماس كۇيىندە رۋلگە وتىرىپ ساعاتىنا 120 كم جىلدامدىقپەن كەلىپ جەڭىل اۆتوكولىكتى سوعىپ ءوتتى دەگەن اقپارات تاراعان بولاتىن. تەرگەۋ جۇمىسى بارىسىندا كىنالى ازامات يلياس كاردىڭ ماس بولماعانىن كورسەتتى، سونداي-اق كىنالى ازامات سوتتا وزىنە تاعىلعان «ماس بولدى» دەگەن ايىپپەن كەلىسپەيتىندىگىن ايتتى.