«7-20-25» باعدارلاماسىنىڭ قاتىسۋشىلارى «نۇرلى جەر» مەملەكەتتىك باعدارلاماسى بويىنشا سالىنعان تۇرعىن ءۇيدى ساتىپ الۋ مۇمكىندىگىن الدى دەپ حابارلايدى Qamshy.kz اقپارات اگەنتتىگى «باسپانا» يپوتەكالىق ۇيىمىنا سىلتەمە جاساي وتىرىپ. تۇرعىن ۇيلەردى وتكىزۋ قاعيدالارىنا ءتيىستى وزگەرىستەر 2019 جىلدىڭ باسىندا كۇشىنە ەندى.

بۇعان دەيىن «نۇرلى جەر» باعدارلاماسى بويىنشا سالىنعان تۇرعىن ۇيلەر اكىمدىكتەردە كەزەكتە تۇرعاندار مەن قازاقستان تۇرعىن ءۇي قۇرىلىس جيناق بانكىنىڭ سالىمشىلارى اراسىندا ءبولىنىپ كەلگەن ەدى.

مەملەكەتتىك تۇرعىن ءۇيدىڭ باعالارى نارىققا قاراعاندا ارزان ءارى وڭىرلەردە كوپتەپ سالىنادى. ءبىر شارشى مەترىنىڭ باعاسى استانا، الماتى (قالا ماڭىنداعى ايماقتاردى  قوسا العاندا)، اتىراۋ جانە اقتاۋ قالالارىندا 180 مىڭ تەڭگە، باسقا وڭىرلەردە 140 مىڭ تەڭگە قۇرايدى. مىسالى، استانادا كولەمى 60 شارشى مەتردى قۇرايتىن ەكى بولمەلى پاتەردى 10،8 ملن تەڭگەگە الۋعا بولادى. ونى 25 جىلعا العاندا اي سايىنعى تولەم 61 مىڭ تەڭگەدەن اسپايدى.

 «7-20-25» ارقىلى «نۇرلى جەر» باعدارلاماسىنىڭ ۇيلەرىن الۋ ايتارلىقتاي جەڭىل. ونىڭ ءبىر سەبەبى، اكىمدىككە كەزەككە تۇرۋ نەمەسە اي سايىن دەپوزيتكە اقشا جيناۋدىڭ ەش قاجەتى جوق. پاتەردى تاڭداپ، «7-20-25» باعدارلاماسىنا قاتىسۋشى بانككە تۇرعىن ءۇي قۇنىنىڭ 20 پايىزىن العاشقى جارنا رەتىندە سالسا جەتكىلىكتى.

«نۇرلى جەر» باعدارلاماسىنىڭ ينديكاتورلارىنا سايكەس اعىمداعى جىلى 20 مىڭعا جۋىق پاتەر سالۋ جوسپارلانىپ وتىر. ەڭ كوپ پاتەر الماتىدا (3170)، شىمكەنتتە (1981)، استانادا (1873) جانە قوستاناي وبلىسىندا (1794) بەرىلەتىن بولادى.