قازاقستاندىق بوكسشى گەنناديي گولوۆكين (38-1-1، 34 كو) تاياۋ كۇندەرى ورتا سالماقتا WBO تۇجىرىمى بويىنشا الەم چەمپيونى دەمەتريۋس اندرادەمەن (27-0، 17 كو) شارشى الاڭدا جۇدىرىقتاسۋعا مۇمكىندىك الىپ قالۋى عاجاپ ەمەس. بۇل تۋرالى بۇكىلالەمدىك بوكس ۇيىمىنىڭ (WBO) پرەزيدەنتى فرانسيسكو ۆالكارسەل BoxingScene باسىلىمىنا بەرگەن سۇحباتىندا مالىمدەدى، - دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ. 

اقپاندا جاڭارتىلعان رەيتينگتە گەنناديي گولوۆكين ورتا سالماقتا بۇكىلالەمدىك بوكس ۇيىمىندا (WBO) كوش باستادى. وسىلايشا، ول دەمەتريۋس اندرادەنىڭ (27-0، 17 كو) يەلىگىندەگى WBO بەلبەۋىنە مىندەتتى قارسىلاس بولادى دەگەن ءسوز.

"بالكىم ءبىز ىرىكتەۋ كەزدەسۋىن وتكىزەمىز، يا بولماسا گولوۆكيندى اندرادەگە مىندەتتى قارسىلاس ەتەمىز. ءبىز وسى ماسەلەنى 21 اقپانعا دەيىن شەشۋىمىز كەرەك"، - دەدى ۆالكارسەل.

وسىعان دەيىن رەيتينگتە WBO بۇرىنعى چەمپيونى بيللي دجو سوندەرس ءبىرىنشى تۇرعان، الايدا ۇلىبريتانيالىق بوكسشى ەكىنشى ورتا سالماققا كوتەرىلدى.

قاڭتاردا گولوۆكين DAZN ستريمينگتىك جۇيەسىمەن جانە FOX پەن Showtime ارنالارى ارقىلى ترانسلياسيا جۇرگىزۋ ءۇشىن Premier Boxing Champions جوباسىنىڭ وكىلدەرىمەن كەلىسسوزدەر جۇرگىزدى. DAZN وكىلدەرى قازاقستاندىققا اندرادەمەن جەكپە-جەك ۇسىندى، كەيىن ساۋل الۆارەسپەن (51-1-2، 34 كو) ءۇشىنشى كەزدەسۋ وتكىزۋ ۇسىنىسى دا بولعان.

ايتا كەتەيىك، WBO بەلبەۋى - گولوۆكين كاسىپقوي بوكستا الا الماعان جالعىز تيتۋل. ول بىرنەشە رەت سوندەرسپەن كەلىسسوزدەر جۇرگىزدى، الايدا جەكپە-جەك ۇيىمداستىرۋ مۇمكىن بولمادى.

ۇسىنعان: نازەركە لابيحان