ونىڭ ايتۋىنشا، ەلوردادا تۇرعىن ۇيمەن قامتاماسىز ەتۋ بويىنشا جالعا بەرىلەتىن جانە كرەديتتىك تۇرعىن ءۇي باعىتتارى بار. ماسەلەن، جالعا بەرىلەتىن تۇرعىن ءۇي بويىنشا وتكەن 2018 جىلى 180 پاتەر پايدالانۋعا بەرىلسە، 2019 جىلى 700-دەن استام پاتەر ءوز يەسىن تابادى. كرەديتتىك تۇرعىن ءۇي باعىتى بويىنشا 2018 جىلى 481 پاتەر ۇلەستىرىلگەن بولسا، 2019 جىلى 900-دەن استام پاتەر پايدالانۋعا بەرىلمەك.

«دەمەك بيىل 1600-دەن استام وتباسى باسپانالى بولادى. ەگەر وسى قارقىنمەن كەزەك جىلجىسا، بۇگىنگى كۇنى كەزەكتە تۇرعان 45 مىڭىنشى تۇرعىن كەمى 25 جىلدان كەيىن باسپانالى بولادى. تۇرعىن ءۇي كەزەگىندەگىلەردىڭ ءتىزىمى 45 مىڭمەن توقتامايتىنىن تاعى قوسىڭىز. وسىلايشا استانالىقتاردىڭ باسپانا ماسەلەسىن بيۋدجەت قارجىسىنا، كوممۋنالدىق تۇرعىن ءۇي قورىنىڭ ەسەبىنەن شەشۋ مۇمكىن ەمەس دەپ كەسىپ ايتۋعا بولادى»، - دەدى نۇركەنوۆ.

ەندى نە ىستەمەك كەرەك؟! ماسەلەنى شەشۋدىڭ قانداي جولدارى بار، - دەگەن ازاماتتار ساۋالىنا:
«اكىمدىك كوپتىڭ كوكەيىندە جۇرگەن باسپانا ماسەلەسىن شەشۋ مەحانيزمدەرىن قاراستىرىپ جاتىر. سونىڭ ىشىندە كەزەكتە تۇرعان تۇرعىنداردىڭ الەۋمەتتىك وسال توپتارىنا بەلگىلى ۋاقىتتان كەيىن ساتىپ الۋ قۇقىعىمەن پاتەرلەردى جالعا بەرۋ مۇمكىندىگى ۇسىنىلاتىن بولادى. وسى ارقىلى وتباسى تاپقان اقشاسىن پاتەر يەسىنىڭ قالتاسىنا ەمەس، ءوز مەنشىگىنە وتەتىن باسپانا ءۇشىن قۇيۋعا مۇمكىندىك الادى»، - دەدى استانا اكىمىنىڭ ورىنباسارى.

بۇعان قوسا، اكىمدىك تۇرعىن ءۇي سەرتيفيكاتتارىنىڭ سانىن 100-دەن 2 مىڭعا ۇلعايتقانىن تاعى ءبىر قايتالاپ ءوتتى. تۇرعىن ءۇي سەرتيفيكاتتارى اتالعان توپتارعا تۇرعىن ءۇي الۋ ءۇشىن 1 ملن تەڭگە كولەمىندە العاشقى سۋبسيديالىق جارنا رەتىندە بولىنەدى. سەرتيفيكات نەسيەگە باسپانا الۋ ءۇشىن الدىن الا تولەم قارجىسى رەتىندە قايتارىمسىز نەگىزدە بەرىلەدى.

2018 جىلى مەديسينا قىزمەتكەرلەرىنە، مۇعالىمدەر پەن پوليسەيلەرگە «7-20-25» باعدارلاماسى بويىنشا 1 ملن تەڭگەلىك 100 تۇرعىن ءۇي سەرتيفيكاتى ۇلەستىرىلگەن بولاتىن.

ايتا كەتەيىك، نۇرلان نۇركەنوۆ وسى جىلعى 15 اقپاندا استانا اكىمىنىڭ ورىنباسارى قىزمەتىنە تاعايىندالعان بولاتىن. ول ەلوردانىڭ دەنساۋلىق ساقتاۋ، ىشكى ساياسات، جاستار ساياساتى مەن اقپارات، مادەنيەت جانە سپورت سالاسىنا قاتىستى ماسەلەلەرگە جاۋاپ بەرەدى.

جومارت ايتقازىنىڭ Facebook پاراقشاسىنان