قالا اكىمىنىڭ قابىلدانۋىندا بولعان تۇرعىنداردىڭ كوبىسىن باسپانا ماسەلەسى مازالايدى، دەپ جازادى Qamshy.kz اقپارات اگەنتتىگى elorda.info سايتىنىڭ دەرەگىنە سۇيەنىپ.

ەلوردا باسشىسىنىڭ جەكە قابىلداۋىندا 50-گە جۋىق قالا تۇرعىنى بولىپ، ءوز ماسەلەلەرىن جەتكىزدى. اكىم قابىلداۋىنا جازىلعانداردىڭ نەگىزگى بولىگى كوپ بالالى انالار، ولاردىڭ كوتەرگەن ماسەلەلەرى - باسپانا، جۇمىس جانە ەرەكشە كۇتىمدى تالاپ ەتەتىن بالالارى ءۇشىن جاعداي جاساۋ.

باقىت سۇلتانوۆ اكىمدىككە كەلگەن ءاربىر ازاماتتى جەكە قابىلداپ، قانداي سۇراقتار مازالايتىنىن تىڭداي كەلە، ورىنباسارلارى مەن ءتيىستى باسقارما باسشىلارىنا تاپسىرما بەردى.

«مەن سىزدەردى قابىلداۋعا جانە ءار سۇراقتارىڭىزعا جاۋاپ بەرۋگە ءارقاشان ءازىرمىن. وسىندا كەلگەن ازاماتتاردى تولعاندىرعان سۇراقتار مەنى دە مازالايدى. ءبارىن قىزىقتىراتىن باسپانا ماسەلەسى جايىنا كەلسەك، قالا بويىنشا كوممۋنالدىق تۇرعىن ءۇي قورىندا باسپانا كەزەگىندە 45 مىڭنان استام ادام تۇر، ونىڭ 20 مىڭنان استامى - ءتۇرلى الەۋمەتتىك از قامتىلعان توپتارعا جاتادى»، - دەدى ب. سۇلتانوۆ.

سونىمەن قاتار قالا باسشىسى اكىمدىك تاراپىنان بەرىلەتىن تۇرعىن ءۇي سەرتيفيكاتتارىنىڭ سانىن 2 مىڭعا دەيىن ۇلعايتاتىنىن ايتىپ ءوتتى. وسى تۇستا ايتىپ وتكەن ءجون 1 ملن تەڭگەنى قۇرايتىن تۇرعىن ءۇي سەرتيفيكاتى، وتكەن جىلى 100 بيۋدجەت سالاسى قىزمەتكەرلەرىنە تابىس ەتىلدى.

«سىزدەردى جەكە قابىلداۋىم قىزمەتتىك مىندەتىنەن بولەك، الداعى ۋاقىتتا نە ىستەۋ كەرەك، قانداي شارالار قابىلداۋ قاجەتتىگىن ساراپتاۋ ءۇشىن دە ماڭىزدى. قازىرگى تاڭدا باسپانا ماسەلەسىن شەشۋ جولدارىن قاراستىرۋدامىز. سونىڭ ىشىندە كەزەكتە تۇرعان تۇرعىنداردىڭ الەۋمەتتىك وسال توپتارىنا بەلگىلى ۋاقىتتان كەيىن ساتىپ الۋ قۇقىعىمەن پاتەرلەردى جالعا بەرۋ مۇمكىندىگى ۇسىنىلادى. بۇل دەگەنىمىز ازاماتتار تاپقان اقشاسىن پاتەر يەسىنە ەمەس، ءوز مەنشىگىنە وتەتىن پاتەر ءۇشىن قۇيۋعا مۇمكىندىك الادى دەگەن ءسوز»، - دەيدى ول.

اكىمنىڭ ايتۋىنشا، باسپانا ماسەلەسىن ءار وتباسىنا جەكە تالداۋ جاساي وتىرىپ، جۇيەلى تۇردە شەشۋ قاجەت. 

«بىلتىر 180 پاتەر پايدالانۋعا بەرىلسە، بيىل 500 ەگەر قولدان كەلسە ودان دا اسىرۋعا تىرىسامىز. تاعى ءبىر ايتىپ كەتەتىن دۇنيە، قالا بيۋدجەتى ءتۇبى جوق قۇدىق ەمەس، ونىڭدا شەگى بار جانە جۇمسالۋى ءتيىس سالاسى بار. كوپ ازاماتتار اكىمدىكتە تۇرعىن ءۇي قورى بار جانە وعان بولىنەتىن بولەك قاراجات بار دەپ ويلايدى. ادام ءبىر نارسەگە قول جەتكىزۋ ءۇشىن ەڭبەكتەنۋ كەرەك. ءسىز جۇمىس ىستەڭىز، ەڭبەكتەنىڭىز، بۇل باعىتتا مەملەكەت تاراپىنان بارلىق مۇمكىندىك جاسالعان. سوندىقتان دا تەگىن ءۇي دەگەن تۇسىنىكتەن ارىلۋ قاجەت»، - دەدى قالا اكىمى.

ايتا كەتسەك، 20 اقپان كۇنى ب.سۇلتانوۆ ەلوردا حالقى الدىندا جىلدىق ەسەپ بەرگەن بولاتىن.

شاھار باسشىسى ءوز بايانداماسىن كوپ بالالى جانە از قامتىلعان وتباسىلارعا قاتىستى تۇسىنىكتەمە بەرۋدەن باستادى.

ودان بولەك قالا اكىمى  «7-20-25» تۇرعىن ءۇي باعدارلاماسىن جۇزەگە اسىرۋ ماقساتىندا استانادا ەكىنشى دەڭگەيلى بانكتەرگە 27 ملرد تەڭگەنى قۇرايتىن نەسيە بولىنگەنىن ايتىپ ءوتتى.

ۇسىنعان: نازەركە لابيحان