قازىرگى تاڭدا كوپتەگەن قىز-كەلىنشەكتەرگە كەڭەس بەرىپ جۇرگەن تانىمال پسيحولوگ، مەديتاتور زارينا حانتورە وقىرماننىڭ كوكەيىندە جۇرگەن بىرنەشە ساۋالدارعا جاۋاپ بەرۋ ءۇشىن Qamshy.kz اقپارات اگەنتتىگى تىلىشىسىمەن سۇحباتتاستى. سول سۇحباتتى تولىعىمەن وقىرمان نازارىنا ۇسىنامىز.
–پسيحولوگيا الەمىنە قالاي كەلدىڭىز؟
–مەنىڭ پسيحولوگيا الەمىنە كەلگەنىمە بيىل – ون ءبىرىنشى جىل. پسيحولوگ مامان رەتىندە ءتورتىنشى جىل جۇمىس ىستەپ جاتىرمىن. بىلايشا ايتقاندا، پسيحولوگيا الەمىنە اداسىپ كەلدىم. ءوزىمدى ءبىراز ۋاقىت بويى تاپپاي قينالىپ ءجۇردىم. نەگىزى ادام بالاسى اقىلدان،تاننەن، جاننان تۇرادى عوي. ۇنەمى مەنىڭ جانىمنىڭ ىشىندە ءبىر قۋىس ورىن تۇراتىنداي بولدى. ونى ەشتەڭە قاناعاتتاندىرا المادى. كىشكەنتايىمنان انامنان ايىرىلدىم. اكەنىڭ تاربيەسىندە بولدىم. وسىلاي كوپ ۋاقىت ىزدەنىستە ءجۇردىم.ءسويتىپ ءجۇرىپ اۋرۋعا ۇشىرادىم. دەنەمدە راك كلەتكالارى وياندى. اۋىرىپ ءجۇرىپ كۇيزەلىسكە ءتۇستىم. كۇيزەلىستە ءجۇرىپ ۇيقىسىزدىققا شالىندىم. وسى كەزدە "پسيحولوگقا بارۋىم كەرەك" دەپ شەشتىم. ليۋدميلا افاناسيەۆا دەگەن پسيحولوگپەن كەزدەسىپ، ءبىراز ساباق الدىم. سول كەزدە تۇسىنگەنىم –مەنىڭ كۇيزەلىسىم جانىمدى تۇسىنبەگەندىكتەن ەكەن. وسىلاي جانتانۋ ىلىمىنە كەلىپ، جانىم تىنىشتىق تاپتى.
–ءسىزدىڭ الدىڭىزعا قىز-كەلىنشەكتەر كوبىنە قانداي ماسەلەمەن كەلىپ جاتادى؟
–مەنىڭ الدىما كوبىنە كۇيەۋىمەن قارىم-قاتىناسىن تۇزەگىسى كەلەتىندەر، ەنەسىمەن وتباسى اراقاتىناسىن جاقسارتقىسى كەلگەندەر، قارىزعا باتىپ كەتكەن كىسىلەر كوپ كەلەدى. بارلىعىنا شامام كەلىپ، ءبىلىمىم جەتكەنشە، پسيحولوگيالىق كومەك بەرۋگە تىرىسامىن.
–ءدىن مەن پسيحولوگيا ەگىز ۇعىم با؟
–مەن اۋەلى پسيحولوگيا سالاسى ارقىلى دىنگە كەلدىم. ءوزىمنىڭ ءبىر جاراتۋشى قۇدايىمنىڭ بار ەكەنىن سول كەزدە ۇعىندىم. پسيحولوگيانىڭ ارتىن قازساڭىز – ءدىن.
–قازىرگى تاڭدا كوپتەگەن پسيحولوگتار ءوز ساباقتارىندا باتىستىڭ پسيحولوگياسىن ۇسىنىپ جاتادى. بۇعان كوزقاراسىڭىز قانداي؟
–مەن بىرەۋ ءۇشىن جاۋاپ بەرە المايمىن. اركىمنىڭ ىشىندە نە بار، ءوزى قانداي سەنىمدە، تەك سول تۋرالى ايتادى. مىسالى: قىزىل ءجىپ تاعىپ ءجۇرۋ تىل-كوزدەن قورعايدى دەۋ، ول قاتە پىكىر. ءبىزدى تەك قورعايتىن – ءبىر اللا عانا.
–مارافونىڭىزدا باعالى سىيلىقتار ۇسىنىپ جاتاسىز، نە سەبەپتى؟
–باسىندا مارافوندى باستاندا جولداسىم تەگىن وتكىز دەگەن بولاتىن. ءبىراق، تەگىن كەلگەن دۇنيەنىڭ ەش ءقادىرى بولمايدى. مارافوننان جينالعان اقشانى ءاردايىم ۇتىسقا قويامىن. ۇيدە وتىرعان قىز-كەلىنشەكتەرگە موتيۆاسيا بولسىن دەيمىن. "مىسالى، ول قىز 100 مىڭ تەڭگە ۇتىپ السام، كويلەك الامىن نەمەسە اناما سىيلىق الامىن" دەگەن ارمانىن ىسكە اسىرسىن دەيمىن. اللاعا شۇكىر، مەنى اللا تاعالا باي، قۋاتتى ەتتى. بۇل جەردە باعالى سىيلىقتاردى قىز-كەلىنشەكتەرگە سىيلىق رەتىندە تاراتامىن.
–ەلىمىزدە قىز بالالاردى كەلىندىككە دايىندايتىن ينستيتۋت اشۋ ويىڭىزدا بار ما؟
–يا، اشۋ كەرەك دەپ ويلايمىن. قىز بالا جوعارعى وقۋ ورنىندا وقىپ، كاسىبي ءبىلىم الىپ جاتادى. ال ولارعا كەلىن بولۋدىڭ قىر-سىرىن ەشكىم ۇيرەتپەيدى. بولاشاقتا ءاربىر بويجەتكەندى ءومىرىنىڭ بەلەستەرىنىڭ ءبىرى كەلىندىككە دايارلاۋ ءىس وتە كەرەك دەپ ويلايمىن.
–ەنەلەرگە ارناپ سەمينار وتكىزۋ ويىڭىزدا بار ما؟
–ءوزىم جاقىندا ەنە بولدىم. الداعى ۋاقىتتا ەنەلەرگە ارناپ ۇلكەن سەمينار وتكىزسەم دەيمىن. ول جەردە كەلىنمەن قارىم-قاتىناستا قالاي بولۋ كەرەك، وتباسى قۇندىلىعىن ساقتاۋ دەگەنىمىز نە؟ مىنە، وسى نارسەلەرگە كەڭىنەن توقتالاتىن بولامىن.
سۇحباتتاسقان: اسەم مەرەكە قىزى
