اۋىل شارۋاشىلىعى ءمينيسترىنىڭ بۇرىنعى ءبىرىنشى ورىنباسارى ارمان ەۆنييەۆ مەملەكەتتىك قىزمەتتەن كەتەتىن مالىمدەدى دەپ جازادى Qamshy.kz اقپارات اگەنتتىگى. بۇل تۋرالى بۇرىنعى ول ءوزىنىڭ فەيسبۋك پاراقشاسىنا جازدى.
"وسىعان دەيىنگى وقيعالار ۇكىمەتتىڭ وتستاۆكاعا كەتۋىنە اكەلىپ سوققانى بەلگىلى. بولعانى بولىپ، بوياۋى ءسىڭدى. ءبىراق بۇل جايت ءبىراز ماسەلەردى ويلانىپ، وز-وزىمە سۇراق قويۋعا مۇمكىندىك بەرىپ وتىر. مۇمكىن باسقا ادامدار دا وزىنە "بۇل جايت مەنىڭ ومىرىمە قانداي وزگەرىس ەنگىزەدى؟"، دەپ سۇراق قويىپ وتىرعان شىعار.
بىرىنشىدەن، مەن ۇكىمەت جۇمىسىنىڭ ناتيجەسىنە ءاربىر مەمقىزمەتكەر جاۋاپتى دەپ ەسەپتەيمىن. ونىڭ قاتارىندا مەن دە بارمىن. مەن بار كۇشىمدى سالىپ جۇمىس ىستەگەن سەكىلدىمىن. ءتىپتى ءوزىمنىڭ مۇمكىندىكتەرىمنەن دە ارتىق جۇمىس ىستەدىم. مەنىڭ اكەم مەنى "كەز-كەلگەن جۇمىسىڭنىڭ ناتيجەسىمەن ماقتاناتىنداي بول" دەپ ۇيرەتكەن. ال ناتيجەسى جوق نەمەسە ناتيجەسى ادام ۇيالتاتىنداي بولسا، جۇمىستى جالعاستىرۋدىڭ قانداي قاجەتتىلىگى بار؟ بۇل جۇمىستىڭ قانداي ماڭىزدىلىعى بار؟
ەكىنشىدەن، مەن ءوز ەلىمنىڭ پاتريوتى رەتىندە ەلىمنىڭ كوركەيىپ، دامۋىنا ۇلەس قوسقىم كەلەدى. ەڭ بولماعاندا مەنىڭ 5 ايلىق نەمەرەم دامىعان ءارى تابىستى ەلدە ءومىر سۇرگەنىن قالايمىن. ەندى مەن ءقازىر وسىنداي قارقىندا، ناتيجەسىز جۇمىس ىستەي الامىن با؟ نەمەسە "بارلىعى ماعان بايلانىستى ەمەس"، دەۋ اقتالۋعا سەبەپ بولا الا ما؟
ۇشىنشىدەن، مەن وسى سەكىلدى سۇراقتاردى وزىمە قويعاننان سوڭ مەملەكەتتىك قىزمەتتەن كەتىپ قالدىم. الايدا ءبىر جىلدان سوڭ قايتا ورالدىم، سەبەبى جوبانى باسقارۋ جۇمىس ىستەيدى جانە ونى دۇرىس قولدانا بىلسەڭ جاقسى ناتيجەگە قول جەتكىزۋگە بولاتىنىن دالەلدەگىم كەلدى. سونداي-اق ۇكىمەتتىڭ جۇمىسىنا جوبالىق ءتاسىلدى ەنگىزۋ دۇرىس ءارى باتىل شەشىم بولدى. ءبىر وكىنىشتىسى بۇل ءتاسىل ودان ءارى دامي المادى.
ال جوبانى دۇرىس باسقارۋدىڭ نەگىزگى ءۇش قاعيداسى بار: SMART-ماقساتتار، جاۋاپتى تۇلعانى بەلگىلەۋ، SCRUM (كۇندەلىكتى جانە ۇزدىكسىز) جانە سەرىكتەستىك. ەگەر وسى ءۇش قاعيدا ورىندالاتىن بولسا مەملەكەت باسشىسىنىڭ تاپسىرماسى مۇلتىكسىز ورىندالاتىنىنا سەنىمدىمىن. ءبىز وسى ءتاسىلدى ءبىزدىڭ بيلىككە ەندى عانا ەنگىزە باستاعان كەزدە، باسقا دامىعان ەلدەر باسقارۋدىڭ جاڭاشا ءتاسىلىن قولدانىپ جاتتى. دامىعان ەلدەردىڭ باسقارۋ جۇيەسىندەگى تاسىلدەردى سانالاپ ايتپايىن. سەبەبى ءالى ۋاقىتى كەلمەدى.
ءتۇيىن: بەلگىلى ءبىر جوبانى تالقىلاۋ ءۇشىن كوپتەگەن دوڭگەلەك ۇستەلدەر مەن كەزدەسۋلەر وتكىزۋگە كوپ ۋاقىت جوعالتۋدى، سالىق تولەۋشىلەردىڭ اقشاسىن ءجون-جوسىقسىز وڭدى-سولدى شاشۋدى توقتاتۋ كەرەك. مەن وداندا مۇنداي شارالاردان بولەك ىسپەن اينالىسا بەرگەنىم دۇرىس"، دەيدى ارمان ەۆنييەۆ.
اۋدارعان: اسەل بولات قىزى
