/مامامىزدى ساعىندىق، ءا.../
«وسى سەنى-اي! اناۋ كورشىنىڭ قىزىن قاراشى!؟ وي، كەرەمەت قوي، شىركىن! ءبارىن ىستەيدى! تاماق تا جاسايدى، ءۇي دە جينايدى!... توقىما دا توقيدى! ساباعىن دا وقىپ، ويناپ تا ۇلگەرەدى! ال، سەن ءبىر ءشايدىڭ ىدىسىن «ون» ساعات جۋاسىڭ! ونىڭ وزىنە ىدىستاردىڭ ءبارىن شاعىپ ءبىتتىڭ! قولىڭا تيگەن ىدىستاردىڭ ءبارى نەگە "قاناتتانىپ" كەتەدى وسى؟»...
ءيا، كىشكەنتاي كەزدە انام وسىلاي ۇرساتىن! سەبەبى، راسىندا بەس تال كەسەنى "ون" ساعات جۋاتىنمىن. ونىڭ وزىنە، مەن جۋعان ىدىستاردىڭ شەتى كەتىك بولىپ شىعاتىن. سەبەبى، ايىر-كۇرەك ۇستاپ، اكەمنىڭ جانىندا سىرتتا كوپ جۇرگەندىكتەن، "كەزدەيسوق" ىدىس جۋۋ "باقىتى" بۇيىرىپ قالسا، ءشوپ لاقتىرىپ، وتىن تاسىعانداي "گۇرسىلدەتىپ" ىستەيتىنمىن دە، اقىرى وسىنداي بولاتىن. تۇيەسىڭ دەپ تە ۇرساتىن.
سوندا ويلايتىنمىن... «ءاي، شىركىن، سول كورشىنىڭ قىزىنىڭ قاي جەرى ارتىق؟ قالاسا، سول قىز قىزدارى بولسىنشى... ەرتىپ "اپكەلەيىن بە وسى"...» ال، كورشىنىڭ قىزىمەن ويناي قالساڭ «ءتۇھ، مامام ۇرسا بەرەدى. سەنى ماقتاي بەرەدى ماعان. «ول ءبارىن ىستەيدى، تاماق تا جاسايدى، كىر دە جۋادى، ويناپ تا ۇلگەرەدى، ساباعىن دا جاقسى وقيدى» - دەپ... مەن وعان «سەنى ماعان ماقتايدى» دەپ، ءبىر كۇلىپ الاتىنبىز. وسى سوزدەردى ەستىگەندە، «كىم - كىمدى الداپ ءجۇر» دەپ ويلايتىنمىن.
باقسام، جاقسى بولسىن دەگەندەرى ەكەن عوي. «جاقسىدان ۇيرەن، جاماننان جيرەننىڭ» تاجىربيەگە اسىپ جاتقانى وسى ەكەن-اۋ... بالالىقپەن شالا تۇسىنگەن ەكەنبىز.
ءقازىر سول كورشىنىڭ قىزى دا، مەن دە ادام بولدىق. سول سوزدەردىڭ دە "ەڭبەگى" بار ما دەپ قويامىن كەيدە. "ءقازىر مەن جۋاتىن ىدىستار سىنبايدى، كەتىكتەرى دە جوق، ىدىستار "ۇشپايدى" ءقازىر، توقىما دا توقىپ ءجۇرمىن، نەشە ءتۇرلى تاماقتار ءپىسىرىپ ۇيرەندىم، اناۋ-مىناۋدى وقىپ ءجۇرمىن، اينالاما بارىنشا كومەكتەسەمىن... تاعىسىن تاعى... ماما-اۋ، سول "تۇيەڭىز" بۇگىندە تىرباڭداپ ءومىر ءسۇرىپ جۇرگەن ادامدار قاتارىنا قوسىلدى. ماما-اۋ، مەن كىشكەنتاي "ءداۋ" بولدىم... ماما-اۋ، كورشىنىڭ قىزى راسىندا كەرەمەت ەكەن عوي! ماما-اۋ، قاشان كەلىپ ءدامدى تاماعىمنان ءدام تاتاسىز؟..." دەگىم كەلەدى...
پىسى: ...كەيدە ابايسىزدا "ادەيى" قولىمنان كەز كەلگەن ىدىستى ءتۇسىرىپ العىم كەلەدى. سولاي ىشىڭدەگى وكپەڭ، مۇڭىڭ، نازىڭ شىعاتىنداي...
سىزگە دە اناڭىز كورشىنىڭ قىزىن ۇلگى ەتۋشى مە ەدى؟ بۇگىندە ءسىز دە بالاڭىزعا كورشىنىڭ بالاسىن ايتىپ، ۇرساتىن شىعارسىز، ءا؟
ماقپال سەمباي
