حح عاسىردىڭ 60-70 جىلدارى تيمۋر سەگىزبايەۆ، سەيىلدا بايشاقوۆ، قۇرالبەك وردابايەۆتاي فۋتبول ساڭلاقتارىن  كەڭەس وداعىنىڭ ايتۋلى ماماندارى مەن ميلليونداعان جانكۇيەرلەرى مويىنداعانى بەلگىلى. تاۋەلسىزدىك العان 27 جىلدا قازاقتان ەۋروپانى ايتپاعاندا، ازيانى تامساندىرعان ءبىر قازاق فۋتبولشىسىنىڭ شىقپاعانى بۇل سالانىڭ كوشى تۇزەلمەي تۇرعانىنا ايقىن دالەل.  ءبىزدىڭ سپورت  فۋنكسيونەرلەرى شيرەك عاسىردا  رەسپۋبليكا فۋتبولىنىڭ ءتيىمدى دامۋ جۇيەسىن قالىپتاستىرا المادى. سىرتتان لەگيونەر شاقىرۋمەن قازاق فۋتبولىنىڭ كوسەگەسى كوگەرمەيتىنى اۋەلدەن بەلگىلى ەدى. ءبىز شيرەك عاسىردا ءوزىمىزدىڭ ۇلتتىق كادرلارىمىزدى دايارلاي المادىق. شەتتەن باپكەر شاقىرۋمەن مەملەكەتتىڭ ميلليونداعان قارجىسىن جەلگە ۇشىردىق. سول «قوناقتار» قازاق فۋتبولىنا قانداي پايدالى جۇيە قالدىردى، دەگەن ساۋالعا ءدال ءقازىر ەشكىم جارىتىپ جاۋاپ بەرە المايدى.

ءبىزدىڭ فۋتبول وسى سالانى تەرەڭ بىلمەيتىن پىسىقتاردىڭ اينالشىقتاپ جۇرەتىن «قازاندىعىنا» اينالدى. سونىڭ سالدارىنان قازاقتىڭ فۋتبول شارۋاشىلىعىن اياعىنان تىك كوتەرۋگە قابىلەتتى نەبىر ازاماتتار سولاردىڭ تاساسىندا قالىپ جاتىر.

ءيا، ۇلتتىق قۇراماسى قاۋقارسىز قازاق ەلىنىڭ  ەكى بالاسى ءقازىر ەۋروپادا دوپ تەۋىپ ءجۇر.

19 جاستاعى ەركەبۇلان سەيداحمەت رەسەيدىڭ «ۋفا» كلۋبىنىڭ شابۋىلشىسى. 2017 جىلى ەركەبۇلاندى پەتەربوردىڭ «زەنيتى» شاقىرعان بولاتىن. ءبىراق فيفا-نىڭ ەرەجەسىنە وراي «زەنيت» جاسى  18-گە تولماعان بوزبالانى قۇرامىنا قوسا المادى. ەركەبۇلان قازاقستاننىڭ جاسوسپىرىمدەر، جاستار قۇرامالارىندا ءوزىن جاقسى قىرىنان تانىتىپ، بىلتىر ۇلتتىق قۇراما ساپىندا ۆەنگرياعا قارسى ويىندا الاڭعا شىقتى. بۇل ويىندا ءبىزدىڭ بالا گول سوقتى. ودان كەيىن اندوررا قاقپاسىنا دوپ ەنگىزىپ، قالىڭ تىلەۋلەستەرىن دۋ ەتكىزىپ ەدى. ۇزاماي لاتۆيامەن باسەكەدە قاتتى جاراقات الىپ، ساپتان شىعىپ قالدى.

جامبىل فۋتبول مەكتەبىنىڭ تۇلەگى ەركەبۇلان سەيداحمەتتىڭ ەندىگى ماقساتى – رەسەي ماماندارىن مويىنداتىپ، ءارى قاراي ەۋروپا اسۋ.

19 جاستاعى دىنمۇحاممەد كاشكەن بولسا، ءقازىر يسپانيانىڭ «كاسابلانكا» كلۋبىنىڭ جاستار كومانداسىندا ويناپ ءجۇر. دىنمۇحاممەد قازاقستان جاستار قۇراماسىنىڭ كاپيتانى بولدى. ءمادريدتىڭ «اتلەتيكو» كلۋبىنىڭ اكادەمياسىنان ءتالىم العان تالاپكەر. فۋتبول ويىنى ەرەكشە دامىعان يسپانيا ماماندارىنىڭ نازارىن اۋدارعان دىنمۇحاممەد بالامىز وسى بەتىنەن تانباسا، الاش جۇرتىنىڭ اياقدوپتاعى ماقتانىشىنا اينالادى، دەگەن ءۇمىتىمىز بار.

قازاق بالۋاندارى مەن بوكسشىلارى، بۇلارعا قوسا ءالجانداي باسكەتبولشىمىز، جانىبەك ساۋرانبايەۆتاي ۆولەيبولشىمىز، ءامين تۇياقوۆتاي جەلاياعىمىز، مارات ساتىبالدييەۆتەي ۆەلوجۇيرىگىمىز ەۋروپادان اسىپ، الەم جانكۇيەرلەرىن سان مارتە مويىنداتتى ەمەس پە! ەندەشە، ەندىگى كەزەك ەركەبۇلان مەن دىنمۇحاممەد سەكىلدى الا دوپ قۋعان باۋىرلاردىكى.

قىدىربەك رىسبەك