قىستىڭ كوزى قىراۋدا اقتوبەلىك كوپبالالى وتباسى دالادا قالدى. تۇرعان ۇيلەرى ورتەنىپ، قىزىل جالىندا قالعان تيتتەي ءۇش بالانى اعايىنى قۇتقارعان. ابىروي بولعاندا ءبارى ءدىن امان. تەك بالالى-شاعالى وتباسىنىڭ بارار جەرى بولماي تۇر. ايتىپ كەلمەيتىن اپاتتان زارداپ شەككەن بايتوبەتوۆتەردىڭ جاعدايى تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.

قىزىل جالىن مىنە، بالالاردىڭ ويىن بولمەدەن شىققان. ءورت شىققاندا ۇيدە قالعان ءۇش بالا كورشى بولمەدە تەلەديدار قاراپ وتىرىپتى. ابىروي بولعاندا ولاردى قوجايىننىڭ اعايىنى قىزىل جالىننان امان الىپ قالعان.

مۇرات پەن اينۇر التى بالاسىمەن تۋىستارىنىڭ ۇيىنە تۇنەپ شىققان. ورتتەن ورتاسىنا تۇسكەن باسپاناسىنا قاراپ ەكەۋى قوسىلا ەگىلىپ ءجۇر. بىلتىر جازدا عانا جاڭالاپ، جوندەپ العان ەكەن. ەڭ باستىسى، بالا-شاعاسىنىڭ امان قالعانىنا شۇكىر دەيدى ەرلى-زايىپتىلار. 

«باراتىن جەرىمىز جوق. بىرەۋدىڭ ۇيىندە قاشانعى تۇرامىز؟ اپاسىنىڭ ۇيىنە قوندىق كەشە. 1-2 كۇن تۇرارمىز، بالالاردىڭ ساباعى قالدى جايىنا. بۇلاردىڭ كىتابى دا، كيىمى دە جوق. ۇستەرىندەگى كيىمدى سۇراپ-سۇراپ ارەڭ دەگەندە كيىندىرىپ اكەلدىم»، - دەيدى تۇرعىن اينۇر بايتوبەتوۆا.

ءورت تۇتانعاندا ۇيدە ەرەسەكتەردەن ەشكىم بولماعان. اينۇر 11 جاستاعى قىزى مەن 3 ايلىق ءسابيىن دارىگەرگە كورسەتۋگە ەمحاناعا كەتكەن. ال وتاعاسى جۇمىستا بولىپتى. كوزدى اشىپ-جۇمعانشا سۋىق حابار جەتكەن. ۇيدە قالعان قىزى مەن ەكى ۇلدى قاينىسى قۇتقارعان. ال ءبىر بالاسى ساباقتا بولىپتى. ءۇيدىڭ تۇڭعىشى كۇلگە اينالعان بولمەسىن كورىپ، ءالى وز-وزىنە كەلە الار ەمەس.

اسەماي بولات:

«كىتاپتارىمنىڭ ءبارى ورتەنىپ كەتكەن، كيەتىن كيىمدەرىم دە جوق ەندى. وسى كىتاپ، كيىمدەردى الۋعا كومەكتەسسە دەپ سۇرايمىن. ءۇيىمدى رەمونتتاپ بەرسە، ءوزىمنىڭ بولمەمدى رەمونتتاپ بەرسە ەكەن...».

اكىمدىكتەگىلەر كوپ بالالى وتباسىنىڭ جاعدايىنان حاباردار. ءۇيدىڭ قوجايىنى ءورت قاۋىپسىزدىگىن ساقتاماعان دەپ وتىر. مۇنداي جاعدايلاردا جەرگىلىكتى بيۋدجەتتەن قارجى قاراستىرىلماعانىن ءتۇسىندىردى. دەگەنمەن، دالادا قالدىرماي، كومەك كورسەتەمىز دەدى. ءارى ءبىر رەتتىك كومەك بەرىلەدى ەكەن. 

«قولدانىستاعى زاڭدارعا سايكەس بيۋدجەت تاراپىنان كومەك بۇعان وتەپ بەرۋ نەمەسە ءۇي سالىپ بەرۋ ونداي قاراستىرىلماعان. ءقازىر ەندى ول ادامداردى دالاعا تاستاماۋدىڭ امالى، مۇمكىندىگىنشە قىس كەزىندە ەڭ باستىسى پاتەر، ۋاقىتشا پاتەرمەن كومەكتەسۋ ماسەلەسىن قاراستىرىپ جاتىرمىز»، - دەيدى قالالىق ازاماتتىق قورعانىس جانە توتەنشە جاعدايلار ءبولىمىنىڭ باسشىسى.

بايتوبەتوۆتەردىڭ بالالارى وقيتىن مەكتەپتىڭ باسشىلىعى دا وتباسىنا قول ۇشىن سوزۋعا دايىن. وقۋ قۇرالدارىن بەرىپ، كيىم-كەشەكتەرىن بۇتىندەيمىز دەپ وتىر. ال كوپ بالالى وتباسىنىڭ بۇلىنگەن ءۇيىمىزدى جوندەۋگە كومەك بولسا ەكەن دەگەن تىلەكتەرى بار.

ۇسىنعان: نازەركە لابيحان