تاجىكستان ازاماتىنا عاشىق بولعان بويجەتكەن 16 جاسىندا مەكتەپتى بىتىرە سالىپ، دۋشانبەگە جىگىتىمەن بىرگە قاشىپ كەتكەن، دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىنە سۇيەنىپ.
قازاقستاننىڭ سىرتقى ىستەر مينيسترلىگى قىزمەتكەرلەرى 19 جىل بۇرىن ءىزىم-عايىم جوعالعان قازاقستاندىق قىزدى تاجىكستان استاناسىنان ىزدەپ تاپتى. بۇل تۋرالى ۆەدومستۆونىڭ رەسمي وكىلى ايبەك سمادياروۆ بريفينگ كەزىندە حابارلادى.
قاڭتار ايىنىڭ باسىندا سىرتقى ىستەر ءمينيسترى مىندەتىن اتقارۋشى بەيبىت اتامقۇلوۆقا اتىراۋ قالاسىنىڭ دەپۋتاتى ءوتىنىش جازعان. ول ءبىر ايەلدىڭ 19 جىل بۇرىن جوعالىپ كەتكەن قىزىن ءالى كۇنگە دەيىن ىزدەپ جۇرگەنىن ايتىپتى. سول كەزدە 16 جاستاعى قىز تاجىكستان ازاماتىنا عاشىق بولىپ، مەكتەپتى بىتىرە سالىسىمەن جىگىتىمەن بىرگە دۋشانبەگە كەتىپ قالادى.
"ءبىزدىڭ ەلشىلىك اۋقىمدى جۇمىس اتقاردى. قولىمىزدا 19 جىل بۇرىنعى سۋرەت پەن اسەل دەگەن ەسىم عانا بار ەدى. ونى ءبىر اي بۇرىن دۋشانبەدەگى ديپلوماتتارىمىز ىزدەپ تاپتى"، - دەپ حابارلادى سىرتقى ساياسات ۆەدومستۆوسىنىڭ وكىلى.
تاجىكستانداعى كونسۋل كولىكپەن كەتىپ بارا جاتىپ، جول شەتىندە ىزدەستىرىلىپ جاتقان قازاقستاندىققا ۇقساس ايەلدى كورىپ قالادى. ول قازاق ءتىلىن بىلمەسە دە، ورىس تىلىندە ەسىمى اسەل ەكەنىن ايتقان.
"كونسۋل تۋىستارىنىڭ سۋرەتى مەن ۆيدەوسىن كورسەتكەندە، ول جارتى ساعات كوز جاسىن تىيا الماي جىلاپ، قاتتى ەسەڭگىرەپ قالدى. وز-وزىنە كەلە الماي قويدى. ءبىز ونى ەلشىلىككە الىپ كەلىپ، قايتار بيلەتىنە اقشا جيناپ، قازاقستانعا ورالۋ ءۇشىن كۋالىك بەردىك. ءسويتىپ، ول وتكەن جۇمادا دۋشانبە - الماتى - اتىراۋ باعدارىمەن ۇشىپ كەلدى، ءقازىر تۋىستارىنىڭ قاسىندا"، - دەدى ايبەك سمادياروۆ.
وسى ۋاقىت بويى اسەل ەشبىر قۇجاتسىز تاجىكستاندا تۇرىپ جاتقان. 19 جىل ىشىندە تاجىك كۇيەۋىمەن اجىراسىپ ۇلگەرىپتى. ءقازىر اتىراۋ بيلىگى ايەلگە قۇجاتتارىن رەسىمدەۋگە كومەكتەسىپ جاتىر.
ۇسىنعان: نازەركە لابيحان
پىكىر قالدىرۋ