وتكەن جىلى 60-تان استام جوعارى لاۋازىمدى شەنەۋنىك مەملەكەتكە 900-گە جۋىق باعالى سىيلىق وتكىزدى دەپ جازادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

قازاقستاننىڭ شەنەۋنىكتەرى شەتەلدىك قوناقتاردان العان باعالى سىيلىقتارىن مەملەكەتكە وتكىزىپ جاتىر.

2015 جىلى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەملەكەتتىك قىزمەتكەرلەرگە كەز كەلگەن سىيلىقتى الۋعا زاڭمەن ("سىبايلاس جەمقورلىققا قارسى ءىس-قيمىل تۋرالى"– Sputnik) تىيىم سالعان. ونى العان ادام سىيلىقتىڭ قۇنىنا، كولەمىنە قاراماستان، جازاعا، ءتىپتى قىلمىستىق جاۋاپكەرشىلىككە تارتىلۋى مۇمكىن.

قارجى مينيسترلىگىنە قاراستى مەملەكەتتىك مۇلىك جانە جەكەشەلەندىرۋ دەپارتامەنتىنىڭ ءبولىم باسشىسى ەرنۇر قايىربەكتىڭ ايتۋىنشا، 2018 جىلى مەملەكەتتىك ورگاندارداعى جوعارى لاۋازىمدى قىزمەتكەرلەر 900-گە جۋىق سىيلىقتى مەملەكەتكە وتكىزىپتى.

"وتكەن جىلدىڭ قورىتىندىسى بويىنشا 60-تان استام مەملەكەتتىك قىزمەتكەر بىزگە 900-گە جۋىق سىيلىق وتكىزدى. 800-گە جۋىق زاتتى مەملەكەتتىك ورگاندارعا تاپسىرىپ، قالعان 120-دان استامىن اۋكسيون ارقىلى ساتتىق. ناتيجەسىندە مەملەكەتكە 700 مىڭ تەڭگە پايدا ءتۇستى"، - دەدى ول.

سونداي-اق ءبولىم باسشىسى شەنەۋنىكتەردىڭ قانداي سىيلىقتاردى وتكىزگەنىن ايتىپ بەردى.

وسى ورايدا ول لاۋازىمدى قىزمەتكەرلەردىڭ باعالى نەگە وتكىزىپ جاتقانىن ءتۇسىندىردى.

"ءبىز باسشىلاردىڭ سىيلىقتى تاپسىرعان-تاپسىرماعانىن تەكسەرمەيمىز. ونى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى تەكسەرەدى. ولار 2 اەك-كە (5050 تەڭگە) دەيىنگى سوماداعى سىيلىقتى السا، ول اكىمشىلىك قۇقىق بۇزۋشىلىق بولىپ سانالادى. ال سىيلىقتىڭ باعاسى 2 اەك-تەن (5050 تەڭگە) اسسا، باسشى قىلمىستىق جاۋاپكەرشىلىككە تارتىلۋى مۇمكىن. سوندىقتان ولار "بالەسىنەن اۋلاق" دەپ باعالى سىيلىقتارىن بىزگە تاپسىرادى"، - دەدى ول.

شەنەۋنىكتەر تاپسىرعان بارلىق زات www.gosreestr.kz پورتالى ارقىلى اۋكسيون ارقىلى ساتىلادى. وعان ەلىمىزدىڭ كەز كەلگەن ازاماتى قاتىسا الادى. تەك ول حالىققا قىزمەت كورسەتۋ قىزمەتى ورتالىعىنان ەلەكتروندى سيفرلى قولتاڭباسىن السا بولعانى. كەيىن اتالعان سايتقا كىرىپ، ساتىپ العىسى كەلەتىن زاتتىڭ كەپىلدىك جارناسىن تولەۋى كەرەك.  

مىسالى، پورتالدا دۇكەندە 145 000 – 194 000 تۇراتىن Apple watch ساعاتى 66 257 تەڭگەگە، ەلىمىزدە سيرەك كەزدەسەتىن، قىمبات ۇيالى تەلەفون Huawei P9 Plus 95 179 تەڭگەگە، 290 000 تەڭگەنىڭ Garmin Fenin 5S cاعاتى 71 959 تەڭگەگە، ساۋدا ۇيىندە 167 000 تەڭگەگە ساتىلاتىن Montblanc قالامى بار بولعانى 65 453 تەڭگەگە ساتىلىپ كەتكەن.

"وتكەن جىلى سايتتاعى اۋكسيون ارقىلى 120-دان باعالى سىيلىق ساتىلدى. ياعني Apple watch ساعاتى 66 مىڭ 257 تەڭگەگە، Montblanc قالامى 65 453 تەڭگەگە، Huawei P9 plus ۇيالى تەلەفونى 95 179 تەڭگەگە، 12 دانا كادەسىي 95 200 تەڭگەگە، Garmin Fenin 5S cاعاتى 71 959 تەڭگەگە وتكەن، تاعى باسقا زاتتار ساتىلدى. ناتيجەسىندە مەملەكەتكە 700 مىڭ تەڭگە كولەمىندە پايدا ءتۇستى"، - دەدى ەرنۇر قايىربەك.

سونىمەن قاتار ءبولىم باسشىسى ساتىلماعان زاتتىڭ جويىلاتىنىن اتاپ ءوتتى.

"ءبىز اۋكسيون ارقىلى زاتتىڭ باعاسىن تومەندەتە بەرەمىز. ساتىلماسا تاعى دا مەملەكەتتىك ورگاندارعا ۇسىنامىز. ولار الماعان جاعدايدا عانا زاتتى جويامىز. ءبىراق وسى كۇنگە دەيىن مۇنداي جاعداي بولعان جوق. ويتكەنى زاتتى جويۋعا بيۋدجەتتەن اقشا بولىنەدى. ال بۇل – مەملەكەت ءۇشىن شىعىن"، - دەدى ول.

ءسوز سوڭىندا ەرنۇر قايىربەك شەنەۋنىكتەر تاپسىرعان سىيلىقتار ارنايى قويمادا ساقتالاتىنىن، قازىنا قارجىسىنان زاتتاردى ساقتاۋعا، تاسىمالداۋعا جىلىنا 6-7 ميلليون تەڭگە بولىنەتىنىن ءمالىم ەتتى.

ۇسىنعان: اسەل بولات قىزى