ءوز ەسىمىن قۇپيا قالدىرۋدى ۇيعارعان تالدىقورعاندىق مەسەنات 10 بالالى وتباسىعا ءۇي سىيلادى. كوپبالالى جانۇيا وسى ۋاقىتقا دەيىن ساياجايدى پانا ەتىپ كەلگەن.  

كوپبالالى وتباسى «قىزىل تاس» ساياجايىندا ءبىر بولمەلى ەسكى ءارى تار ۇيدە تۇرىپ جاتقان. الەۋمەتتىك جاعدايى تومەن وتباسى الماتى وبلىستىق توتەنشە جاعدايلار دەپارتامەنتى ۇيىمداستىرعان ارنايى رەيد بارىسىندا انىقتالىپ وتىر. قۇتقارۋشىلار، ءتارتىپ ساقشىلارى، ەرىكتىلەر مەن قوعامدىق بىرلەستىك وكىلدەرى قالاداعى جەكە تۇرعىن ءۇي سەكتورىن ارالاپ، ءورت قاۋىپسىزدىگىن ساقتاۋ تۋرالى پاراقشالار تاراتىپ، دابىل قوندىرعىلارىن ورناتتى. شاراعا قالا باسشىسى داستان شالتابايەۆ پەن بيزنەس قاۋىمداستىق وكىلدەرى دە ءوز ۇلەسىن قوستى. 10 بالا اسىراپ وتىرعان كروپاچيەۆتار وتباسىنا كاسىپكەر وتەناي اۋىلىندا سالىنعان جاڭا بەس بولمەلى ءۇي ۇسىندى. قايعىلى وقيعالاردىڭ الدىن الۋعا باعىتتالعان رەيدكە 170 ادام قاتىسىپ، 4 مىڭنان استام پاراقشا تاراتىلدى.  

جالپى، الماتى وبلىسىندا جىل باسىنان بەرى 170 ءورت وقيعاسى تىركەلدى. 47 جاعدايدا ادامدار پەشتەن شىققان ىستان ۋلانعان. 8 ادام ءيىس ءتيىپ قايتىس بولدى.