تالدىقورعاندا ەرەكشە ادىسپەن سۋرەت سالاتىن وقۋشى تۇرادى. ارمان كارىمجانوۆتىڭ كومىر قارىنداشپەن گيپەررەاليزم باعىتىندا سالعان سۋرەتتەرى كادىمگى فوتوسۋرەتتەن اينىمايدى.

تالدىقورعان قالاسىنداعى №2 ورتا مەكتەپتىڭ 11-سىنىبىندا وقيتىن ارمان كارىمجانوۆ سۋرەت سالۋ ونەرىنە بەس جاسىنان قىزىعا باستاعان. العاشقى كەزدە ول كوبىنە تابيعاتتى، جىل مەزگىلدەرى مەن جانۋارلاردى بەينەلەۋدى ۇناتاتىن. بىرنەشە جىلدان بەرى جاڭا گيپەررەاليزم باعىتىنا قىزىعىپ ءجۇر. جالپى «گيپەررەاليزم» گرەك تىلىنەن اۋدارعاندا تازا شىنايىلىق دەگەن ماعىنانى بىلدىرەدى. سونداي-اق، بۇل جانردى فوتورەاليزم دەپ تە اتايدى. سۋرەتشىنىڭ بەلگىلى ءبىر زاتتى نەمەسە ادامنىڭ بەينەسىن اينىتپاي ءتۇرلى قارىنداشتار مەن بوياۋلاردى قولدانا وتىرىپ قاعازعا ءتۇسىرۋىن گيپەررەاليزم دەيدى. بۇل تەرميندى اينالىمعا 1973 جىلى يسا بارحوت ەنگىزدى.

جانە بۇل باعىت وتكەن عاسىردىڭ 60-شى، 70ء-شى جىلدارى وتە قارقىن الا باستادى. قازىرگى تاڭدا الەمنىڭ ءار بۇرىشىندا وسى جانرعا بەت بۇرعان سۋرەتشىلەر قاتارى كوبەيىپ كەلەدى. وسى باعىتقا دەن قويعان ارمان كارىمجانوۆتىڭ قازىرگى تاڭدا وننان استام تۋىندىسى بار. 

جاس سۋرەتشى ەكى ءپىلدىڭ ايقاسىن، مايمىلدى، افريكالىق تايپالاردىڭ قارا ءناسىلدى ادامدارىن شەبەرلىكپەن قاعازعا تۇسىرە بىلگەن. بۇل تۋىندىلار تۋرا ءبىر ساپالى فوتواپپاراتپەن ءتۇسىرىپ، باسىپ شىعارعانداي اسەر قالدىرادى.

ارماننىڭ ايتۋىنشا، ءاربىر سۋرەتتى سالۋ ءۇشىن 70 ساعاتقا دەيىن ۋاقىت كەتەدى. اسىرەسە ادام بەينەسىن سالۋ وتە قيىن دەيدى. ادام بەتىنىڭ تەرىسىن، ونداعى ءاربىر نۇكتە، ءاجىم، كوز، كوڭىل-كۇيىن سالۋ ۇلكەن سابىرلىقتى قاجەت ەتەدى. جاس تالانتتىڭ دجيم كەرري، يەن ماككەلەن سىندى گولليۆۋد جۇلدىزدارىنىڭ پورترەتىن دالمە-دال كەلتىرۋى - وسىنىڭ دالەلى.

«ءوزىنىڭ قۇلاققابىن كيىپ الىپ، اسەرلى مۋزىكا تىڭداپ، سۋرەت سالۋعا كىرىسكەندە ءبىز كەدەرگى جاساماۋعا تىرىسامىز»، - دەيدى سۋرەتشىنىڭ اناسى. 

سونداي-اق اناسى ۇلىنا قاجەت بارلىق قۇرال-جابدىقتارمەن قامتاماسىز ەتۋگە تىرىسادى. باقىتگۇل كارىمجانوۆانىڭ ايتۋىنشا، بۇل وڭاي نارسە ەمەس. 

«فابەركاست دەگەن قارىنداشتاردى العانبىز. بۇل گەرمانيالىق قارىنداش گەرمانيادان كەلەدى. قاعازدارى بۇل جەردە ساتىلمايدى. فورمات ا3، ا2 عانا ساتىلادى. ال بىلاي ۇزىن، ءداۋ قاعازدار ساتىلمايدى»، - دەيدى ول.

بيىل مەكتەپ بىتىرەتىن ارمان ساۋلەتشى بولعىسى كەلەدى. قۇرىلىس سالاسىندا ءوز قولتاڭباسىن قالدىرماق ماقساتى بار. ول ءۇشىن كۇن-تۇن دەمەي دايىندالىپ، ءوز-وزىن قامشىلاۋدا. جاس سۋرەتشى ءوز تۋىندىلارىن حالىقارالىق كورمەلەرگە ۇسىنىپ، بايقاۋلارعا قاتىسۋدا.