الماتى وبلىسىندا «نۇرلى جول» باعدارلاماسى شەڭبەرىندە سوڭعى ءتورت جىلدا 36 مەكتەپ، ءۇش بالاباقشا، ءۇش قازاندىق، 244 كم ينجەنەرلىك جۇيەلەر سالىندى. ينۆەستيسيانىڭ جالپى سوماسى 79،6 ملرد. تەڭگەنى قۇرايدى، 22،7 مىڭ جۇمىس ورنى قۇرىلعان. بۇل تۋرالى بۇگىن ءوزىنىڭ ەسەپ بەرۋ جيىنىندا الماتى وبلىسىنىڭ اكىمى اماندىق باتالوۆ ايتتى.

«نۇرلى جول» باعدارلاماسىنىڭ ارقاسىندا وبلىستىڭ ترانزيتتىك الەۋەتى ارتىپ، اۆتوكولىك جولدارىنىڭ ساپاسى جاقساردى.

وبلىس باسشىسى جىل سايىن وڭىردە جولداردى جوندەۋ مەن ولاردى كۇتىپ ۇستاۋعا 30 ملرد. تەڭگەدەن استام قارجى بولىنەتىنىن ايتتى.

جيىندا ءسوز بولعانداي، بيىلعى جىلى «تالدىقورعان - وسكەمەن»، «ءۇشارال - دوستىق»، «كۇرتى - بۋرىلبايتال»، «ۇزىناعاش - وتار» سياقتى اۆتوجولداردى جاڭعىرتۋ جوبالارى باستالعان. سونداي-اق «التىن وردا» بازارى اۋماعىنداعى جول 10 جولاققا دەيىن كەڭەيتىلۋدە.

«وسى جوبالاردىڭ وزىنە 2019 جىلى 50،6 ملرد. تەڭگە ينۆەستيسيا يگەرىلەدى، 4،5 مىڭ جۇمىس ورنى قۇرىلىپ، وندا وبلىس تۇرعىندارى جۇمىس ىستەيتىن بولادى»، - دەدى ءسوزىن قورىتىندىلاپ ا. باتالوۆ.