"نۇر وتان" پارتياسىنىڭ سەزىندە مەملەكەت باسشىسى نۇرسۇلتان نازاربايەۆ كوپبالالى وتباسىلارداعى ءار بالاعا 21 مىڭ تەڭگە تولەۋدى تاپسىردى. قارجى ءمينيسترى ءاليحان سمايىلوۆ اتالعان كومەكتى كىمدەر الاتىنىن ءتۇسىندىردى. بۇل تۋرالى Qamshy.kz اقپارات اگەنتتىگى  Sputnik قازاقستان ءتىلشىسىنىڭ دەرەگىنە سۇيەنىپ حابارلايدى.

"ەلباسى ايتقانداي، تۇرمىسى ناشار وتباسىلارداعى ءار بالاعا ەڭ تومەنگى كۇنكورىس دەڭگەيىنىڭ 70%-ى نەمەسە شامامەن 20 800 تەڭگە تولەنەدى. كوپبالالى وتباسى بولىپ 4 نەمەسە ودان دا كوپ بالا تاربيەلەنىپ جاتقان وتباسىلار ەسەپتەلەدى"، - دەدى ول.

ال تۇرمىسى تومەن وتباسىعا ونداعى جيىنتىق تابىستى ءار مۇشەگە بولگەن كەزدە ەڭ تومەنگى كۇنكورىس دەڭگەيىنىڭ 50%-ىنەن اسپايتىن، ياعني ءار ادامعا 15 مىڭ تەڭگەدەن از تيەتىن وتباسى جاتادى. 

"وسىنداي وتباسىلاردىڭ جيىنتىق تابىسىن ەسەپتەي كەلگەندە، ولار  جاردەماقىنىڭ 3 تۇرىنەن قاعىلادى. مۇنداي جاردەماقىنى الاتىنداردى كوبىرەك قامتۋ ءۇشىن ەرتەڭ ۇكىمەت وتىرىسىندا اتالعان ماسەلەنى كەڭىرەك تالقىعا سالامىز. سوندىقتان مۇنى سول كەزدە تولىعىراق ايتىپ بەرەمىن"،- دەدى ءاليحان سمايىلوۆ "نۇر وتان" پارتياسىنىڭ سزىنەن سوڭ جۋرناليستەرگە.

سونىمەن قاتار قارجى ءمينيسترى پرەزيدەنت حالىقتىڭ تۇرمىسىن كوتەرۋ ماقساتىندا ولارعا بەرىلەتىن الەۋمەتتىك كومەكتى كۇشەيتۋدى تاپسىرعانىن اتاپ ءوتتى.

"جالپى بيۋدجەتتەن بولىنەتىن قارجىنى الەۋمەتتىك سالاعا باعىتتاۋ جايلى كەشە-بۇگىن عانا ايتىلىپ جاتقان جوق. اسىرەسە، بۇل ماسەلە سوڭعى جىلدارى كوپ كوتەرىلدى. ءبىزدىڭ حالىقتىڭ الەۋمەتتىك كوڭىل كۇيىنە اسەر ەتەتىن جاعىمسىز جايتتاردىڭ كۇشەيۋىنە بايلانىستى الەۋمەتتىك قولداۋ كۇشەيتىلدى.

ايتاپ ايتقاندا، سوڭعى ەكى جىلدا رەسپۋبليكالىق بيۋدجەتتەن الەۋمەتتىك سالاعا بولىنەتىن شىعىندار 34%-تەن 45%-كە ءوستى. الداعى 3 جىلدا اتالعان كورسەتكىش 49%-كە ارتادى. الەۋمەتتىك سالاعا باسىمدىق بەرىلگەنى انىق كورىنىپ تۇر"، - دەدى ۆەدومستۆو باسشىسى.

ۇسىنعان: گۇلىم جاقان