ءتورت بالاسى بار وتباسىنىڭ ءبىر ايلىق جالپى تابىسى 114 مىڭ 448 تەڭگەگە جەتەدى.

ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ كوپبالالى وتباسىلارداعى ءار بالاعا 20 789 تەڭگە قاشاننان باستاپ تولەنەتىنىن مالىمدەدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

ساپاربايەۆتىڭ ايتۋىنشا، كۇنكورىس دەڭگەيى 1 شىلدەگە 14 مىڭ 849 تەڭگە بولسا، شىلدەدەن باستاپ 20 789 تەڭگەگە كوتەرىلەدى. ياعني، 1 شىلدەدەن باستاپ اتاۋلى الەۋمەتتىك كومەكتى الاتىندار سانى 260 مىڭعا ادامعا كوبەيىپ، قازىرگى 571 مىڭنان 830 مىڭ ادامعا دەيىن وسەدى.

"ماسەلەن، ءتورت بالاسى بار جالعىزباستى وتباسىن الايىق. 1 شىلدەگە دەيىن 63 مىڭ تەڭگە اتاۋلى الەۋمەتتىك كومەكتى الاتىن بولسا، شىلدەدەن باستاپ 40 مىڭ تەڭگەگە كوبەيىپ، 103 مىڭ 945 تەڭگەگە دەيىن جەتەدى. ال قوسىمشا تولەمدەردى ەسەپتەگەن كەزدە، بۇل وتباسىنىڭ ءبىر ايلىق جالپى تابىسى 114 مىڭ 448 تەڭگەنى قۇرايدى"، - دەدى جاڭا مينيستر ۇكىمەت وتىرىسىندا.

سونىمەن قاتار، شىلدەدەن باستاپ وتباسىنىڭ جيىنتىق تابىسىن ەسەپتەگەن كەزدە، كوپبالالى وتباسىلارعا، "كۇمىس القا"، "التىن القا" يەگەرلەرىنە، مۇگەدەك بالالارعا تولەنەتىن جاردەماقىلار مەن شاكىرتاقى ەسەپكە الىنبايدى.

"بۇعان قوسا، تۇرمىسى تومەن وتباسىنىڭ بالالارىنا بەرىلەتىن جاردەماقى مولشەرى دە وزگەرەدى. ەگەر 1 شىلدەگە دەيىن ول 4 مىڭ 834 تەڭگە بولسا، 1 شىلدەدەن باستاپ ءار بالاعا 20 789 تەڭگە تولەنەدى. بۇل جاردەماقى 18 جاسقا دەيىن، ەگەر بالالار جوعارى وقۋ ورىندارىندا وقيتىن بولسا، 23 جاسقا دەيىن تولەنەدى"، - دەدى ساپاربايەۆ.

سونداي-اق، مينيستر الەۋمەتتىك كومەكتى تاعايىنداعان كەزدە، حالىقتى بەكەردەن بەكەر ساندالتپاس ءۇشىن سۇرالاتىن قۇجاتتار سانى ازاياتىنىن اتاپ ءوتتى. 

"مۇنىڭ ءبارى ەلەكتروندى تۇردە جۇزەگە اسادى. ەگەر كەيبىر مالىمەتتەر جوق بولسا، اتا-اناعا كەلۋدىڭ قاجەتى جوق. جەرگىلىكتى جەرلەردە جۇمىسپەن قامتۋ ورتالىقتارى، اكىمشىلىكتەر ءتيىستى مەملەكەتتىك ورگاندارعا سۇراۋ جاساپ، وزدەرىنە قاجەت مالىمەتتى الاتىن بولادى"، - دەدى ول.

ونىڭ ايتۋىنشا، وڭىرلەردەگى وتباسىلاردىڭ قاجەتتىلىگىن، تۇرمىسىن انىقتاۋ ءۇشىن الەۋمەتتىك كارتالار جاسالادى. وسىلايشا، ءار وتباسىعا تالداۋ جاسالىپ، ەڭ مۇقتاجدارىنا مەملەكەتتەن كومەك كورسەتىلەدى.

ۇسىنعان: نازەركە لابيحان