بۇل تۋرالى بەلارۋس باسشىسى 1 ناۋرىز كۇنى مالىمدەدى دەپ حابارلايدى Qamshy.kz اقپارات اگەنتتىگى forbes.kz سايتىنا سىلتەمە جاساپ. 

بەلارۋس پرەزيدەنتى الەكساندر لۋكاشەنكو رەسەيمەن ءبىرىڭعاي ۆاليۋتا ەنگىزۋ جانە ءبىرىڭعاي ەميسسيالىق ورتالىق قۇرۋ باستاماسىن قولدايدى. بۇل تۋرالى مەملەكەت باسشىسى جۇما كۇنى مينسكتە وتكەن "ۇلكەن اڭگىمەدە" مالىمدەدى.

بەلورۋس باسشىسى "ماسكەۋ سويلەيدى" راديوستانسياسىنىڭ باس ديرەكتورى ۆلاديمير مامونتوۆتىڭ وداقتىق مەملەكەت تۋرالى سۇراعىنا جاۋاپ بەرۋ بارىسىندا ءبىرىڭعاي ۆاليۋتا جايلى ءسوز قوزعادى. لۋكاشەنكو سوڭعى كەزدە قوعامدا ءبىرىڭعاي ۆاليۋتا جايلى ءجيى ايتىلىپ جۇرگەنىن جانە ول جۇيەنىڭ ەنگىزىلۋىنە قارسى ەمەستىگىن اتاپ ايتتى. 

- بۇگىن بىزگە ۆاليۋتا ۇسىندى. قولدايمىز! ارينە، ول رۋبل بولادى، – دەپ مالىمدەدى بەلورۋس مەملەكەتىنىڭ باسشىسى.

پرەزيدەنت ول ۆاليۋتانىڭ بەلورۋستىڭ دا، رەسەيدىڭ دە ءرۋبلى ەمەس، ورتاق ۆاليۋتا بولۋى كەرەكتىگىن باسا ايتتى. سونىمەن قاتار، ءبىرىڭعاي ەميسسيالىق ورتالىقتىڭ قاي جەردە بولاتىنىن دا انىقتاپ الۋ قاجەت. 

- مينسكتە مە؟ جوق، سمولەنسكتە. ونىڭ قايدا بولاتىنى ماڭىزدى ەمەس. مەيلى، رەسەي پرەزيدەنتىنىڭ وتانى - پيتەردە-اق بولسىن. ول مەنىڭ سۇيىكتى قالام،  – دەدى ءوز سوزىندە لۋكاشەنكو.

بەلورۋس پرەزيدەنتىمەن بولعان "ۇلكەن اڭگىمە" 1 ناۋرىز كۇنى مينكستە ءوتتى. الەكساندر لۋكاشەنكومەن كەزدەسۋگە، شامامەن، ەكى جۇزدەي  جۋرناليست، ساراپشى، شەنەۋنىك كەلدى.