قازاقستاندى الەمگە تانىتقان ءوزىن "قازاقپىن" دەيتىن ناعىز پاتريوت گەنناديي گولوۆكين مەكسيكالىق بوكسشى ساۋل "كانەلو" الۆارەسپەن ءۇشىنشى كەزدەسۋ وتكىزۋگە دايىن. ءبىراق قارسىلاسىنا ۋلتيماتۋم قويماقشى، - دەپ حابارلايدى Qamshy.kz اقپارات اگەنتتىگى WorldBoxingNews-گە سىلتەمە جاساپ.

جۋرناليست فيل دجەيدىڭ ايتۋىنا قاراعاندا، گولوۆكين ءوزىن "جەڭىلدىم" دەپ سانامايدى جانە كانەلو تارتىپ العان بەلبەۋلەردى قايتارۋدى جوسپارلاعان ەكەن.

قوس بوكسشىنىڭ وكىلدەرى كەلىسسوزدەردى ءبىر كەزدەسكەننەن-اق شەشىپ تاستامايتىنى ايدان انىق. سەبەبى، گولوۆكين جەكپە-جەكتى لاس-ۆەگاستان باسقا جەردە ۇيىمداستىرۋدى تالاپ ەتىپ وتىر. 

نيۋ-يورك، لوس-اندجەلەس جانە تەحاس شتاتىندا دا جەكپە-جەك ۇيىمداستىرۋعا بولادى ەكەن. قوس بوكسشىنىڭ كەزدەسۋىنە ەۋروپا ەلدەرىنىڭ بىرىندە جابىلاتىن شاتىرى بار فۋتبول ستاديون دا لايىقتى بولۋى مۇمكىن.

باسىلىم مالىمەتىنشە، GGG DAZN ستريمينگتىك سەرۆيسىمەن كەلىسىمشارت تۋرالى كەلىسىمگە كەلگەن. ول تۋرالى كەلەسى اپتانىڭ باسىندا رەسمي تۇردە جاريالاناتىن بولادى.

گولوۆكين رينگكە مامىر نەمەسە ماۋسىم ايىندا قايتا ورالادى دەپ كۇتىلەدى. ال كەلىسىمشارتتا كەم دەگەندە ەكى جەكپە-جەك وتكىزەدى دەلىنگەن. ءبىراق الداعى ۋاقىتتا بەس نەمەسە التى جەكپە-جەككە دەيىن ارتۋى مۇمكىن. ول قازان ايىندا بەس جىل بويى 11 جەكپە-جەكتە قىزمەت كورسەتۋ كەلىسىمشارتىنا قول قويعان بولاتىن.

ەسكە سالا كەتسەك، YouTube-تاعى Counter Punch Boxing كانالىنىڭ اۆتورى ناقتى دەرەككوزگە سۇيەنە وتىرىپ، قازاقستاندىق  گەنناديي گولوۆكين مەن مەكسيكاندىق ساۋل "كانەلو" الۆارەس ءۇشىنشى كەزدەسۋ تۋرالى كەلىسىمگە كەلدى دەگەن ەدى. 

اۆتوردىڭ اقپاراتىنا سۇيەنسەك، ول كەزدەسۋ 2019 جىلدىڭ قىركۇيەك ايىندا ماحيكونىڭ "استەكا" ستاديونىندا وتەدى. 

"ارينە، وعان دەيىن ءبارى كۇرت وزگەرۋى مۇمكىن. سەبەبى، بۇل - بوكس. گولوۆكين جەڭىلۋى مۇمكىن، ول "كانەلوعا" دا قاتىستى جورامال. ءبىراق ءدال قازىرگى جاعداي مىنانداي: گەنناديي DAZN-بەن كەلىسىمشارتقا قول قويدى جانە قىركۇيەكتە "كانەلومەن" جەكپە-جەككە شىعادى. سوندىقتان، ءبىر شايقاس بولارى انىق. 

ەگەر بۇل اقپاراتتى ناقتى قانداي دەرەككوزدەن العانىمدى ايتسام، ءسوزسىز، سوزىمە سەنەتىن بولاسىزدار. بۇل – ناعىز سەنىمدى دەرەككوز. مۇنى ايتقان ادام ءدال سول جەكپە-جەككە قاتىسى بار، سول شايقاستا قىزمەت اتقاراتىن ادام. سوندىقتان، بۇل اقپاراتقا ەش كۇمان بولماسىن" - دەپ سوزىنە سەندىرگىسى كەلدى اۆتور.

ۇسىنعان: ماقپال سەمباي