بەلارۋس پرەزيدەنتى الەكساندر لۋكاشەنكونىڭ رەسەيمەن بىرگە ءبىرىڭعاي ورتاق ۆاليۋتا ەنگىزۋگە قارسى ەمەستىگى تۋرالى ايتقان مالىمدەمەسىنەن كەيىن قازاقستاننىڭ دا ساياساتكەرلەرى مەن ساراپشىلارى پىكىر بىلدىرە باستادى.
"قازاقستان ءۇشىن بۇل ۇلكەن دابىل"، دەپ جازدى دوسىم ساتپايەۆ ءوزىنىڭ الەۋمەتتىك جەلىدەگى پاراقشاسىندا.
–جاعدايدىڭ باسقا جاعىنان قاراساق، ماسكەۋ "باتكانى" جانشىپ تاستاعان سياقتى. ءسويتىپ، ونى تاقتان تايدىرىپ، ورنىنا رەسەيشىل الدەبىرەۋدى الماستىرۋ وڭاي بولادى دەگەندى استارلاپ ايتتى-اۋ. البەتتە، اقشالاي "مايشەلپەك" بەرۋگە دە ۋادە بەردى. ولاي بولماسا، "باتكا" كەرى ءجۇرىس جاساۋى مۇمكىن عوي. ءبىراق بۇل تاقىرىپتى كرەملدىڭ ءوزى كوتەرىپ وتىرعانىن ونىڭ جۇزىنەن-اق بايقاۋعا بولادى. ءبارىبىر ول تىنىم تابا الار ەمەس.
ءبىرىڭعاي ورتاق ۆاليۋتا تۋرالى اڭگىمەنىڭ جالپاق جۇرتقا جاريا ەتىلىپ جاتقانى ءبىرىنشى رەت ەمەس. كەلەسى كەزەڭدە مەنىڭ ويىمشا، ەاەو-نىڭ وزگە قاتىسۋشىلارىنا قىسىم جاساۋ باستالادى. ەڭبەك ميگراسياسى تۇرعىسىنان قاراعاندا، تىكەلەي رەسەيگە باعىنىشتى قىرعىزستان، تاجىكستان مەن ارمەنيا اناعۇرلىم قيىن جاعدايدا قالادى. قازاقستانعا دا قىسىم كورسەتىلە باستايدى.
ەگەر ەاەو بەلسەندى تۇردە ەميسسيوندىق ورتالىعى بار شاعىن سسسر-عا اۋىساتىن بولسا، بۇل ءبىزدىڭ ەگەمەندىگىمىزگە جانە ۇلتتىق قاۋىپسىزدىگىمىزگە اشىق قاۋىپ-قاتەر تونەدى دەگەن ءسوز. ودان ءارى جاعداي ۋشىعادى. سىرتقى ساياساتتا ماسكەۋدەن كەلىسىم الۋ، ءبىرىڭعاي قورعانىس كەڭىستىگىن قالىپتاستىرۋ، ورتاق اقپاراتتىق الاڭ، قوس ازاماتتىق جانە ت.ب.
ايتپاقشى، وسى اتالعان باپتىڭ بىرنەشەۋى بۇدان بۇرىن دا ەاەو-نى قۇرۋ جوباسىنىڭ ءبىرىنشى نۇسقاسىندا بولعان.
كرەمل ەرتە مە، كەش پە، ايتەۋىر ءبىر كۇنى بولاتىن قازاقستانداعى بيلىكتىڭ اۋىسۋىنا دايىندالىپ جاتىر نەمەسە ءدال ءقازىر ءىستى اسىقتىرۋى ىقتيمال. ويتكەنى، ءدال ءقازىر ەلىمىزدىڭ باسىندا ەاەو-نىڭ قولداۋشىسى وتىر. ناقتى ايتقاندا ولار بيلىكتەگى ءوزىنىڭ "بەسىنشى كولونناسىن" بەلسەندى تۇردە قالىپتاستىرىپ ءارى قولداۋ ارقىلى قازاقستاننىڭ ىشكى ساياساتىنا ارالاسا باستايدى...
اۋدارعان: ماقپال سەمباي
پىكىر قالدىرۋ