قازاقستاننىڭ ەنەرگەتيكا ءمينيسترى الماسادام ساتقالييەۆ "قازاقستان رەسپۋبليكاسى ەنەرگەتيكا مينيسترلىگىنىڭ كەيبىر بۇيرىقتارىنىڭ كۇشى جويىلدى دەپ تانۋ تۋرالى" 27 قاڭتارداعى بۇيرىققا قول قويدى. كۇشى جويىلعان قۇجاتتار تىزبەسىنە مۇناي ونىمدەرىنىڭ باعاسىن مەملەكەتتىك رەتتەۋگە قاتىستى بۇيرىقتار كىردى.

اتاپ ايتقاندا، باعانى مەملەكەتتىك رەتتەۋ بەلگىلەنەتىن مۇناي ونىمدەرىنىڭ تىزبەسىن بەكىتۋ تۋرالى بۇيرىقتىڭ، باعانى مەملەكەتتىك رەتتەۋ بەلگىلەنگەن ستاسيونارلىق اۆتوجانارماي قۇيۋ ستانسيالارى ءۇشىن مۇناي ونىمدەرىن بولشەك ساۋدادا وتكىزۋگە شەكتى باعالاردى بەلگىلەۋ تۋرالى بۇيرىقتىڭ جانە باسقالاردىڭ كۇشى جويىلدى.

ەنەرگەتيكا مينيسترلىگىندە مەملەكەتتىك رەتتەۋدىڭ كۇشىن جويۋ قازاقستانداعى بەنزين مەن ديزەل وتىنىنىڭ باعاسى الەمدەگى ەڭ تومەن باعالاردىڭ ءبىرى بولىپ قالا بەرەتىندىگىمەن نەگىزدەلەدى. بۇل، سونىڭ ىشىندە كورشى ەلدەرمەن ايتارلىقتاي باعا الشاقتىعىنا اكەلەدى.

ەنەرگەتيكا ءمينيسترى 28 قاڭتاردا جۋرناليستەردىڭ سۇراقتارىنا جاۋاپ بەرە وتىرىپ، رەتتەۋدىڭ جويىلۋىنا بايلانىستى ديزەل وتىنى مەن بەنزين باعاسىنىڭ ءوسۋى اقپان ايىندا كۇتىلەتىنىن ايتتى. الايدا ۇكىمەت باعانىڭ كۇرت ءوسۋى بولمايدى دەپ سەندىرەدى.

سونىمەن قاتار، 23 قاڭتاردا ەنەرگەتيكا ءمينيسترىنىڭ، ۇقك ءتوراعاسىنىڭ، قارجى ءمينيسترىنىڭ جانە ىشكى ىستەر ءمينيسترىنىڭ مىندەتىن اتقارۋشىنىڭ قازاقستان اۋماعىنان، ونىڭ ىشىندە ەاەو-عا مۇشە مەملەكەتتەرگە بەنزيندى، ديزەل وتىنىن جانە مۇناي ونىمدەرىنىڭ جەكەلەگەن تۇرلەرىن اۆتوموبيل كولىگىمەن اكەتۋگە تىيىم سالۋدى ەنگىزۋ تۋرالى بىرلەسكەن بۇيرىعى قابىلداندى.

سونداي-اق، ەاەو سەق تن 2710 12 كودتارىمەن مۇناي ونىمدەرىن تەمىر جول كولىگىمەن اكەتۋگە تىيىم سالىنادى. ەرەكشەلىككە جەتكىزۋ جوسپارلارىنا سايكەس بەنزين ەكسپورتى، سونداي-اق 2025 جىلعى 1 اقپاننان 2025 جىلعى 29 ناۋرىزعا دەيىنگى كەزەڭگە گۋمانيتارلىق كومەك كورسەتۋ شەڭبەرىندە مۇناي ونىمدەرىن ەكسپورتتاۋ كىرەدى.