قازاقستان قارجى مينيسترلىگىنىڭ مەملەكەتتىك كىرىستەر كوميتەتى حالىقارالىق تاسىمالداردى جۇزەگە اسىرۋ كەزىندە تاسىمالداۋشىلار مەن باسقا دا مۇددەلى تاراپتاردى قىسقى كەزەڭدەگى اۋا رايىنا بايلانىستى اۆتوجولدارداعى قوزعالىس شەكتەۋلەرىن ەسكەرۋگە شاقىردى.
قولايسىز اۋا رايى جاعدايلارىنا بايلانىستى اسىرەسە قازاقستان-قىتاي شەكاراسىندا، اۆتوموبيل وتكىزۋ پۋنكتتەرىنىڭ وتكىزۋ مۇمكىندىگى تومەندەۋى مۇمكىن. بۇل وڭىردە تومەن تەمپەراتۋرا مەن قاتتى جەلگە بايلانىستى جۇڭگو تاراپىنىڭ بەلسەندىلىگى ازايۋى ىقتيمال.
سونىمەن قاتار قازاقستان ۇكىمەتى مەن جۇڭگو حالىق رەسپۋبليكاسى ۇكىمەتى اراسىنداعى قازاقستان-قىتاي مەملەكەتتىك شەكاراسى ارقىلى وتكىزۋ پۋنكتتەرى تۋرالى كەلىسىمگە سايكەس، ەكى ەلدىڭ مەرەكەلىك كۇندەرىندە وتكىزۋ پۋنكتتەرىنىڭ جۇمىسى ۋاقىتشا توقتاتىلادى.
جاقىن ارادا قازاقستاننىڭ تاۋەلسىزدىك كۇنىن مەرەكەلەۋگە بايلانىستى 2024 جىلعى 16-17 جەلتوقسان ارالىعىندا قازاقستان-قىتاي شەكاراسىنداعى اۆتوموبيل وتكىزۋ پۋنكتتەرىندە ادامداردى، كولىك قۇرالدارىن جانە جۇكتەردى وتكىزۋ جۇزەگە اسىرىلمايدى.
قازاقستان-قىتاي شەكاراسىنداعى تەمىرجول وتكىزۋ پۋنكتتەرى شتاتتىق رەجيمدە جۇمىسىن جالعاستىرادى.
وسىعان بايلانىستى، كوميتەت تاسىمالداۋشىلارعا مارشرۋتتاردى الدىن الا تۇزەتىپ، وتكىزۋ پۋنكتتەرى جۇمىسىنىڭ كەستەسىندەگى ىقتيمال وزگەرىستەردى ەسكەرۋدى ۇسىنادى.
– كوميتەت وتكىزۋ پۋنكتتەرى جۇمىسىنىڭ وزگەرۋىنە جەدەل دەن قويۋ جانە تاسىمالداۋشىلاردى ۋاقىتىلى حاباردار ەتۋ ءۇشىن كورشى ەلدەردىڭ قۇزىرلى ورگاندارىمەن بەلسەندى ىنتىماقتاستىق جاساپ جاتىر. ۋاقىتشا قولايسىزدىقتارعا تۇسىنىستىكپەن قاراۋلارىڭىزدى سۇرايمىز، - دەلىنگەن حابارلامادا.
پىكىر قالدىرۋ