«گەندەرلىك زورلىق-زومبىلىققا قارسى بەلسەندى ءىس-قيمىلدىڭ 16 كۇنى» حالىقارالىق اكسياسى اياسىندا ءاليحان بوكەيحانوۆ ۋنيۆەرسيتەتىندە «تۇرمىستىق زورلىق-زومبىلىققا قارسى تۇرۋ: ماسەلەلەر مەن شەشىمدەر» تاقىرىبىندا وبلىستىق كونفەرەنسيا ءوتتى. ءىس-شارانى «جانۇيا ورتالىعى» قوعامدىق قورى اباي وبلىسىنىڭ ىشكى ساياسات باسقارماسىنىڭ قولداۋىمەن ۇيىمداستىردى.

جيىنعا اباي وبلىسىنىڭ ىشكى ساياسات باسقارماسى باسشىسىنىڭ ورىنباسارى ارمان جەماگۋلوۆ، وبلىستىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى پوليسيا پودپولكوۆنيگى باۋىرجان ساداقبايەۆ، سونداي-اق ءاليحان بوكەيحانوۆ جانە شاكارىم ۋنيۆەرسيتەتتەرىنىڭ پروفەسسور-وقىتۋشىلار قۇرامى، وبلىستىق ءماسليحات دەپۋتاتتارى، ايەلدەردى زورلىق-زومبىلىقتان قورعاۋ جونىندەگى ينسپەكتورلار جانە ب ا ق وكىلدەرى قاتىستى.

كونفەرەنسيانىڭ نەگىزگى ماقساتى – تۇرمىستىق زورلىق-زومبىلىق ماسەلەلەرىنە نازار اۋدارۋ عانا ەمەس، ايەلدەر مەن بالالارعا ارنالعان ءقاۋىپسىز جانە قولداۋلى ورتا قۇرۋ جولدارىن تالقىلاۋ.

ءىس-شارا بارىسىندا ارنايى شاقىرىلعان ساراپشىلار «تۇرمىستىق زورلىق-زومبىلىقتىڭ ماسەلەلەرىن شەشۋدەگى مەملەكەتتىڭ ءرولى»، «ەڭبەك جانە وتباسىلىق-نەكە زاڭناماسى ارقىلى تۇرمىستىق زورلىق-زومبىلىق قۇرباندارىنىڭ قۇقىقتارىن قورعاۋ»، «وتباسىلىق كەلىسپەۋشىلىكتەردى شەشۋدە پسيحولوگيالىق قولداۋ ورتالىقتارىنىڭ ءرولى» تاقىرىپتارىندا باياندامالار جاسادى.

پەداگوگيكا عىلىمدارىنىڭ كانديداتى نازيگۇل گازيزوۆا كونفەرەنسيانىڭ ماڭىزدىلىعىنا ەرەكشە نازار اۋداردى.

«تۇرمىستىق زورلىق-زومبىلىق تەك ءبىزدىڭ وڭىردە ەمەس، بۇكىل الەمدە وزەكتى ماسەلە بولىپ وتىر. بۇل پروبلەمانى شەشۋ ءۇشىن جيىندار مەن تالقىلاۋلاردىڭ ءجيى ءوتۋى ماڭىزدى. قوعامداعى ايەلدەر مەن بالالاردىڭ قاۋىپسىزدىگىن قامتاماسىز ەتۋگە باعىتتالعان ۇسىنىستاردىڭ ناتيجەسىندە وڭ وزگەرىستەرگە قول جەتكىزە الامىز دەپ سەنەمىن» – دەدى ول.

پوليسيا دەپارتامەنتىنىڭ وكىلى باۋىرجان ساداقبايەۆ تۇرمىستىق زورلىق-زومبىلىق ماسەلەلەرىنىڭ جىل سايىن ارتىپ كەلە جاتقانىن اتاپ ءوتتى.

«زورلىق-زومبىلىق جاعدايلارىنىڭ الدىن الۋ ءۇشىن تەك قۇقىق قورعاۋ ورگاندارى عانا ەمەس، بۇكىل قوعام بولىپ كۇش بىرىكتىرۋىمىز قاجەت. وكىنىشكە وراي، كەي جاعدايلاردا زارداپ شەككەندەر ۇيىنە ورالا الماي، داعدارىس ورتالىقتارىنا ءماجبۇرلى تۇردە جۇگىنەدى. بۇل ماسەلەنى شەشۋ ءۇشىن زاڭنامانى جەتىلدىرۋ مەن ءتۇسىندىرۋ جۇمىستارىن كەڭەيتۋ قاجەت» – دەدى سپيكەر.

قاتىسۋشىلارعا «اشىق ميكروفون» فورماتى ۇسىنىلىپ، ءوز پىكىرلەرىن بىلدىرۋگە مۇمكىندىك بەرىلدى. تۇرمىستىق زورلىق-زومبىلىققا قاتىستى ماسەلەلەردى شەشۋ بويىنشا ناقتى ۇسىنىستار ايتىلىپ، بولاشاق جوسپارلارعا ەنگىزۋگە بولاتىن تىڭ يدەيالار تالقىلاندى.

كونفەرەنسيا سوڭىندا وبلىستىق ىشكى ساياسات باسقارماسى تاراپىنان ءىس-شاراعا بەلسەندى قاتىسقان سپيكەرلەرگە العىس حاتتار تابىستالدى. ءىس-شارا بارلىق قاتىسۋشىلاردىڭ ۇلكەن قولداۋىنا يە بولىپ، زورلىق-زومبىلىققا قارسى كۇرەستىڭ جاڭا قادامدارىنا جول اشتى. قوعامدا ايەلدەر مەن بالالاردىڭ قاۋىپسىزدىگىن قامتاماسىز ەتۋ ءۇشىن زورلىق-زومبىلىققا «نولدىك توزىمدىلىك» قاعيداتىن قالىپتاستىرۋ – مەملەكەتتىڭ باستى مىندەتتەرىنىڭ ءبىرى.