Almaty TV كاسىپكەرلىكتى دامىتۋعا ارنالعان «Made in Almaty» اتتى جاڭا جوبانى ىسكە قوسادى. ءار شىعارىلىم زاۋىتتان شاعىن سەحقا دەيىنگى ارالىقتاعى كاسىپورىنداردىڭ كرەاتيۆتى جانە قارقىندى دامۋ جولىن نازارعا الماق. 

«Made in Almaty» جوباسىنىڭ ماقساتى – قالادا وندىرىلگەن وتاندىق ونىمدەردى كورسەتىپ، ونىڭ ساپاسى مەن باسەكەگە قابىلەتتىلىگى جانە وتاندىق ونەركاسىپ سالاسىن دامىتۋعا اتسالىسىپ جۇرگەن ادامداردىڭ كۇندەلىكتى جۇمىسى جايلى ايتۋ. بۇگىندە الماتىدا جۇمىسپەن قامتىلعانداردىڭ 85 پايىزدان استامى شوب سالاسىندا جۇمىس ىستەيدى. تەك سوڭعى جىلدا ونى دامىتۋ ءۇشىن بيۋدجەتتەن 53،1 ملرد تەڭگە ءبولىندى. 

وسىنداي تابىستى دامىپ كەلە جاتقان كاسىپورىنداردىڭ ءبىرى – عيمارات، الەۋمەتتىك ينفراقۇرىلىم جانە ونەركاسىپ قۇرىلىسىندا قولدانىلاتىن كابەل جانە سىم ونىمدەرىن شىعاراتىن زاۋىت. تەك ءبىر ايدىڭ ىشىندە كەشەن 120 توننادان استام دايىن ءونىم شىعارادى. قىرعىزستان مەن ءازىربايجانعا ەكسپورت جولعا قويىلدى. الداعى ۋاقىتتا ەۋروپا ەلدەرىنە ەكسپورتتاۋ جوسپارلانعان.

«بۇل سالادا جۇمىس ىستەگەنىمە 20 جىلدان اسسا دا ماعان جۇمىس بارىسىنداعى ءار ءسات قىزىقتى. ءقازىر جاس مامانداردى وقىتىپ جاتىرمىز. بولاشاقتا زاۋىتتى ۇلكەيتىپ، مۇمكىندىكتەردى ءۇلعايتىپ، جۇمىس ورنىن كوبەيتۋدى جوسپارلاپ وتىرمىز»، – دەدى زاۋىتتىڭ باس ينجەنەرى ازاتبەك قۋانىشبەك ۇلى.

بۇگىندە الماتى يندۋستريالدى ايماعىندا 11،6 مىڭ جۇمىس ورنى اشىلىپ، 485 ملرد تەڭگەنىڭ 67 جوباسى جۇزەگە اسىرىلۋدا. بيىل 3 مىڭعا جۋىق جۇمىس ورنىن قۇرۋدى قاجەت ەتەتىن، قۇنى 197 ملرد تەڭگە تۇراتىن 15 جوبانى ىسكە قوسۋ جوسپارلانۋدا. كابەل-سىم بۇيىمدارىن شىعاراتىن زاۋىت ارقىلى جەرگىلىكتى كاسىپورىنداردىڭ مەملەكەت قولداۋىمەن قالاي ءوسىپ، دامىپ، قالا ەكونوميكاسىنا عانا ەمەس، بۇكىل ەلگە پايدا اكەلەتىنىن كورۋگە بولادى.

ايتا كەتەيىك، بۇعان دەيىن «Almaty TV» تەلەارناسى «جۇمىسشى ماماندىقتارى» جىلىندا الماتى قالاسىنىڭ كوممۋنالدىق قىزمەتكەرلەرىنە، قۇرىلىسشى، فەلدشەر جانە ت.ب. كەيىپكەرلەرگە ارنالعان «شاھار شىرايى» اتتى ارنايى جوبانى ىسكە قوسقان ەدى. جۋىردا «الماتى اۋداندارى»، «الماتى كوشەلەرى» جانە «كەرى بايلانىس» سياقتى ءبىرقاتار جاڭا باعدارلامالار جارىق كورەدى. سونداي-اق جاڭالىقتار «ەكونوميكا جاڭالىعى» جانە «قالا تىنىسى» ايدارلارىمەن تولىقتى.