ءابىلقايىر سقاقوۆ الەۋمەتتىك مەديسينالىق ساقتاندىرۋ قورىنىڭ باسشىسى قىزمەتىنەن كەتتى.

پاۆلودار وبلىسىنىڭ بۇرىنعى اكىمى ۇيىمدى 2023 جىلدىڭ قىركۇيەگىنەن باسقاردى. سقاقوۆ قور باسشىسى قىزمەتىنەن كەتكەنىن الەۋمەتتىك جەلىدەگى پاراقشاسىندا حابارلادى.

"بۇگىن مەن "الەۋمەتتىك مەديسينالىق ساقتاندىرۋ قورى" اق باسقارما ءتوراعاسى قىزمەتىنەن رەسمي تۇردە كەتتىم. بۇل مەنىڭ الدىن الا ويلانىپ شىعارعان بايسالدى شەشىمىم. مۇنداي ماڭىزدى ۇيىمدى باسقارۋ – ۇلكەن جاۋاپكەرشىلىك. مەن ءۇشىن دەنساۋلىق ساقتاۋدى قارجىلاندىرۋ سالاسىنداعى مەملەكەتتىك ساياساتتى جۇزەگە اسىرۋ ۇلكەن مارتەبە بولدى"، – دەپ جازدى سقاقوۆ. 

سونداي-اق ول قوردىڭ بارشا ۇجىمىنا قولداۋى مەن جۇمىسىنا العىس ءبىلدىردى. بۇل رەتتە ول ۇيىم جۇمىسىن قاداعالاعان جۋرناليستەرگە، دەپۋتاتتارعا جانە بارشا قازاقستاندىقتارعا العىسىن ايتتى.

"ماسەلەلەردى اشىق تالقىلادىق، اڭگىمەمىز كەيدە قىزۋ بولعانىمەن، ءبىزدى – ءمامس-تى جاقسارتۋ دەگەن ماقسات بىرىكتىردى"، – دەدى ول.