كولىك ءمينيسترى مارات قارابايەۆ 2025 جىلى قوسىمشا 4 مىڭ شاقىرىم اقىلى جول ەنگىزىلەتىنىن مالىمدەدى. بۇگىندە ەلىمىزدە مۇنداي جۇيە تەك 3،2 مىڭ شاقىرىم جولدا جۇمىس ىستەپ تۇرعانىن ەسكەرسەك، اقىلى جول ۋچاسكەلەرىنىڭ سانى ەكى ەسەدەن استامعا ارتادى.
ۇكىمەت وتىرىسى بارىسىندا قارابايەۆ بيۋدجەت جۇكتەمەسىن ازايتۋ جانە جولداردىڭ ءوزىن-وزى اقتاۋىن قامتاماسىز ەتۋ ماقساتىندا قايتا جاڭارتۋ جانە جوندەۋ جۇمىستارى اياقتالعان ۋچاسكەلەردە اقىلى جول جۇيەسىن كەزەڭ-كەزەڭىمەن ەنگىزۋ جالعاساتىنىن اتاپ ءوتتى.
"قازىرگى ۋاقىتتا ەلىمىزدە 3 مىڭ 200 شاقىرىم اقىلى جول جۇيەسى جۇمىس ىستەپ تۇر. 2024 جىلى بۇل جۇيەدەن تۇسكەن كىرىس 48 ميلليارد تەڭگە بولدى. بيىل قوسىمشا 4 مىڭ شاقىرىم اقىلى جول ىسكە قوسىلادى، ولاردىڭ كىرىسى 60 ميلليارد تەڭگەگە جەتەدى، ال كەلەسى جىلى بۇل كورسەتكىش 100 ميلليارد تەڭگەگە دەيىن ءوسۋى مۇمكىن"، – دەدى ول.
سونىمەن قاتار، مينيستر اقىلى جولداردان تۇسكەن قاراجاتتىڭ ءبىر بولىگىن قۇرىلىس جۇمىستارىنا الىنعان نەسيەلەردىڭ پايىزدىق مولشەرلەمەلەرىن وتەۋگە باعىتتاۋ ماسەلەسى قاراستىرىلىپ جاتقانىن ايتتى.
پىكىر قالدىرۋ