تۇزدى شامادان تىس تۇتىنۋ قان قىسىمىن جوعارىلاتىپ، جۇرەك-قان تامىرلارى اۋرۋلارى مەن ينسۋلت ءقاۋپىن ارتتىرادى. بۇل تۋرالى قازاقستاندا تۇز تۇتىنۋدى ازايتۋ جونىندەگى سەميناردا ايتىلدى.

قوعامدىق دەنساۋلىق ساقتاۋ ۇلتتىق ورتالىعىنىڭ باسشىسى ايجان ەسماعامبەتوۆا:

- دۇنيەجۇزىلىك دەنساۋلىق ساقتاۋ ۇيىمىنىڭ زەرتتەۋى بويىنشا قازاقستان تۇزدى كوپ تۇتىناتىن ساناۋلى ەلدەر قاتارىنا جاتادى. بىزدە تۇزدى تۇتىنۋ تاۋلىگىنە – 17 گرامم. بۇل ۇسىنىلعان نورمادان 3، 4 ەسە ارتىق. ءبىراق ددۇ-نىڭ دەرەگىنشە، تاۋلىكتىك نورما 5 گرامنان اسپاۋى ءتيىس. سوندىقتان قازاقستاندا تۇزدى تۇتىنۋدى ازايتۋ ەلىمىز ءۇشىن وتە ماڭىزدى، - دەيدى. 

ال قازاقستانداعى ددس ۇيىمىنىڭ تۇراقتى وكىلى سكەندەر سىلا ادامدار تۇتىناتىن تۇزدىڭ كوپ بولىگى دۇكەننەن ساتىپ الىناتىن تاماق ونەركاسىبى ونىمدەرىندە جاسىرىلعان دەيدى. ونىڭ ايتۋىنشا، تۇزدى كوپ تۇتىنۋ قازاقستانداعى ادام ءولىمىنىڭ نەگىزگى سەبەپتەرى بولعان گيپەرتونيا جانە جۇرەك-قان تامىرلارى اۋرۋلارىنا اكەلەدى. ادامدار تۇتىناتىن تۇزدىڭ 70-75 پايىزى وڭدەلگەن ونىمدەردە جاسىرىلعان. قالعان 20-25 پايىزىن قازاقستاندىقتار تاماق دايىنداعاندا جانە داستارحان باسىندا قوسادى، - دەيدى سكەندەر سىلا.