«التىن كورسە، پەرىشتە جولدان تايادى» دەگەن ماقال بۇل پرەزيدەنتتى اينالىپ وتكەن سەكىلدى. ول پرەزيدەنتتەن بۇرىن بيزنەسمەن، ميلليونەر ءارى تابىستى سپورتشى. ءبىراق «جولدان تايعان جوق». مۇنىڭ دالەلى نەدە دەسەڭىزدەر، اسىپ-تاسقان بايلىعى بولا تۇرا، اناسى ەسكى ۇيدە تۇرادى. جو-جوق، اناسىن قۇرمەتتەمەگەنى، جاقسى كورمەگەنى ەمەس، كۇيەۋى ەكەۋى كىرپىشىن ءوز قولدارىمەن قالاعان قارا شاڭىراقتا قالۋدى قارت انا ءوزى شەشكەن ەكەن. ال پرەزيدەنت اناسىنا ءجيى بارىپ تۇرادى، جاي عانا بارىپ قويمايدى. ۇستىندەگى كوستيۋم-شالبارىن شەشىپ، قاراپايىم فۋتبولكا كيىپ بارادى، ءۇي تىرلىكتەرىن ءوز قولىمەن اتقارادى. اناسى دايىنداعان تاعامدى جەپ، قولىنان قويۋ شاي ىشەدى. ۇستىنەن كوستيۋم-شالبارىن عانا ەمەس، «پرەزيدەنت» دەگەن لاۋازىمىن تۇگەل شەشەدى. جالپى انانىڭ قاراپايىم بالاسىنا اينالادى.

موڭعول ەلىنىڭ باسشىسى ءبىر سۇحباتىندا: «اناما ەشقاشان رەسمي كيىممەن بارمايمىن، ونىڭ كوزىنشە قالتامنان كوپ اقشا شىعارعان دا ەمەسپىن. بۇل كىسى ۇكىمەتتەن الاتىن از زەينەتاقىسىن ۇنەمدەپ، كەلەسى ايعا دەيىن جەتكىزۋگە ۇيرەنگەن ادام»، - دەگەن ەكەن.

موڭعوليا پرەزيدەنتتىنىڭ اناسى تۇراتىن كوشە

موڭعوليا پرەزيدەنتى حالتمااگيين باتتۋلگانىڭ اجەسى س.دولجينسۇرەن حان-ۋۋل اۋدانىنداعى ياارماگ كوشەسىندە تۇرادى. ياارماگ تۋۋل وزەنىنىڭ وڭتۇستىك جاعاسىندا ورنالاسقان موڭعول استاناسىنداعى ەڭ كونە داڭعىلداردىڭ ءبىرى.

مىنە، موڭعوليا پرەزيدەنتى باتتۋلگا وسى كوشەدە تۋىپ وسكەن.

بۇگىندە دولجينسۇرەن اجەيدىڭ جاسى 90-دا، ءبىر قىزى مەن ەكى ۇلدى تاربيەلەپ وسىرگەن انا. ۇلدارىنىڭ ءبىرى – بۇگىندە ەل باسقارىپ وتىرعان حالتمااگيين باتتۋلگا. ءىنىسى – سپورتشى. ال اجەيدىڭ 3 بالاسىنان 21 نەمەرەسى بار ەكەن.

2018 جىلى دولجينسۇرەن گۋاي (گۋاي – موڭعولداردىڭ ۇلكەن كىسىگە دەگەن قۇرمەتىن كورسەتەتىن كيەلى ءسوزى) «جار» («سۋپرۋگا») اتتى تەلە باعدارلاماعا ءتۇستى. وندا موڭعول پرەزيدەنتىنىڭ تۋىپ وسكەن ءۇيى كورسەتىلدى.

ءارى اجەي ءوزىنىڭ مارقۇم كۇيەۋى مەن بالالارىنىڭ بالالىق شاعى جايلى ايتىپ بەردى. باعدارلاما سوڭىندا دلجينسۇرەن گۋاي مەن ونىڭ بالالارى، اراسىندا باتتۋلگا دا بار، ءدامدى تاعامدار ازىرلەدى.

موڭعول تىلىندەگى باعدارلامانىڭ YouTube ارناسىنداعى نۇسقاسى تومەندە...

موڭعول پرەزيدەنتى جايلى 10 فاكت

1 موڭعول پرەزيدەنتى – شىعارماشىلىق ادامى، سۋرەتشى. جەرگىلىكتى سۋرەتشىلەر اسسوسياسياسىنىڭ مۇشەسى.

2 جاس شاعىندا دزيۋدو ءارى سامبومەن اينالىستى، موڭعوليا قۇراماسىنىڭ مۇشەسى بولدى. الەم باتتۋلگانى العاش سپورتشى رەتىندە تانىدى. 1989 جىلى سامبودان الەم چەمپيونى اتاندى. سپورتشىنىڭ جەڭىسىن وتانى دا باعالادى – بيلىك وعان ءتورت بولمەلى پاتەر سىيلادى.

3 1990 جىلى ول بيزنەسكە تابان تىرەدى. ءوزىن تابىستى كاسىپكەر رەتىندە كورسەتە ءبىلدى. سينگاپۋردان ۆيدەوكامەرالار اكەلىپ، ولاردى ەكى ەسە قىمبات باعامەن ساتا الدى. ال بۇگىنە باتتۋلا موڭعوليانىڭ ەڭ باي ادامدارىنىڭ قاتارىندا. ونىڭ بايلىعى 1،2 ميلليارد دوللارعا باعالاندى.

4 ءارى مەملەكەت باسشىسى ۇلان-باتىرعا جاقىن ماڭعا بيىكتىگى 40 مەتر بولاتىن شىڭعىس حاننىڭ اتتى ەسكەرتكىشىن سالدىردى. ول ەلدەگى ەڭ ۇلكەن، ەڭ ءىرى ەسكەرتكىشتىڭ ءبىرى سانالدى.

5 بيزنەس پەن ساياساتتا مول تابىسقا جەتكەنىمەن، باتتۋلگا سپورتتان الىستامادى. اپتاسىنا ءۇش مارتە بىرنەشە ساعات ۋاقىت سپورتزالدا وتكىزەدى.

6 ساياساتقا 2004 جىلى ارالاستى. موڭعول پارلامەنتىنىڭ دەپۋتاتى اتاندى. ۋاقىت وتە كەلە ترانسپورت ءمينيسترى، ودان كەيىن اۋىل شارۋاشىلىعى جانە ونەركاسىپ ءمينيسترى لاۋازىمدارىن يەلەندى.

7 مينيستر بولعان ۋاقىتىندا جەمقورلىقپەن ايىپتالدى.

8 شەتەلدىك باق-تار باتتۋلگانى ساياساتكەردەن گورى باتىرعا كوبىرەك ۇقساتتى.

9 باتتۋلگا شلياپا كيگەندى جاقسى كورەدى، روك ستيلىندەگى اندەردى تىڭدايدى.

10 ءبىر سۇحباتىندا اكەسىنىڭ كوزىنشە الكوگولدى سۋسىنداردى ىشپەيتىنىن ايتقان، ال شىن مانىسىندە، ول اكەسى مەن باۋىرى سەكىلدى مۇلدە ىشپەگەن، ىشپەيدى دە.