بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى «Nur Otan Trends» پىكىرتالاس الاڭىنىڭ كەزەكتى وتىرىسىندا ايتتى. اتالعان ءىس-شارادا پارتيانىڭ 2030 جىلعا دەيىنگى «باقۋاتتى قوعام: ونجىلدىقتىڭ 10 ماقساتى» اتتى جاڭا باعدارلاماسى تالقىلاندى.

ماۋلەن اشىمبايەۆ باعدارلامادا پارتيانىڭ الداعى ون جىلعا ارنالعان كۇن ءتارتىبى كورسەتىلگەنىن ايتتى.

– مەملەكەت باسشىسى ءوزىنىڭ بەس الەۋمەتتىك باستاماسىندا، وتكەن جىلدىڭ قازان ايىنداعى قازاقستان حالقىنا ارناعان جولداۋىندا جانە سەزدە سويلەگەن سوزىندە حالىقتىڭ ءال-اۋقاتىن ءوسىرىپ، تۇرمىس ساپاسىن ارتتىرۋعا باعىتتالعان ەلىمىزدىڭ جاڭا الەۋمەتتىك دوكتريناسىن باياندادى. سوندىقتان پارتيانىڭ جاڭا باعدارلاماسى ەلباسىنىڭ وسى دوكتريناسىن جۇزەگە اسىرۋعا باعىتتالىپ وتىر، – دەدى ول.

سونداي-اق «Nur Otan» پارتياسى ءتوراعاسىنىڭ ءبىرىنشى ورىنباسارى باعدارلاما نەگىزىندە ناقتى ءۇش قاعيدا كورسەتىلگەنىن تىلگە تيەك ەتتى.

– ءبىرىنشى قاعيدا، باعدارلاما ماقساتتارىنىڭ ازاماتتاردىڭ ءال-اۋقاتىن ارتتىرۋعا تىكەلەي باعىتتالۋى. ەكىنشى قاعيدا، ينكليۋزيۆتىلىكپەن قامتاماسىز ەتۋ. قازىرگى تاڭدا قوعام ينكليۋزيۆ دەگەندى كوبىنە مۇمكىندىگى شەكتەۋلى جاندارعا قولداۋ دەپ تۇسىنەدى. بۇل ينكليۋزيۆتىڭ ماعىناسىن تولىق اشپايدى. سوندىقتان ءبىز باعدارلامادا ونى كەڭ اۋقىمدا قاراستىرىپ، كومەككە مۇقتاج بارلىق جانعا الەۋمەتتىك قولداۋ كورسەتىلۋىن قامتاماسىز ەتۋدى كوزدەپ وتىرمىز. سەبەبى، ەكونوميكالىق دامۋدىڭ يگىلىگىن ەلىمىزدىڭ بارلىق ازاماتى مەن ءوڭىرى بىردەي كورۋى كەرەك. ءۇشىنشى قاعيدا، باعدارلامانىڭ ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارىنا نەگىزدەلۋى، – دەدى ماۋلەن اشىمبايەۆ.

پىكىرتالاس بارىسىندا «Nur Otan» پارتياسى جانىنداعى ستراتەگيالىق باستامالار ينستيتۋتىنىڭ ديرەكتورى ءادىل قوجىقوۆ باعدارلامانىڭ مەملەكەتتىك باسقارۋدىڭ تيىمدىلىگىن ارتتىرۋ، ازاماتتىق قوعامدى ودان ءارى دامىتۋ جانە جاستاردى قولداۋ باعىتتارى بويىنشا تارقاتىپ ايتتى. ال اتالعان ينستيتۋت ديرەكتورىنىڭ ورىنباسارى ەۆگەنيي كوچەتوۆ باعدارلامادا ايتىلعان قازاقستاندىق وتباسىلاردىڭ جاعدايىن جاقسارتۋ، ساپالى ءبىلىمنىڭ قولجەتىمدىلىگىن قامتاماسىز ەتۋ، دەنساۋلىق ساقتاۋ سالاسىن ودان ءارى جاڭعىرتۋ، ينكليۋزيۆتى ەكونوميكا مەن بيزنەستى دامىتۋ جانە ازاماتتارعا جايلى جاعداي جاساۋ شارالارى تۋرالى ءسوز قوزعادى.

سونىمەن قاتار ءىس-شاراعا قاتىسقان پارلامەنت ءماجىلىسىنىڭ دەپۋتاتى البەرت راۋ مەن CSI كونسالتينگتى كومپانياسىنىڭ باسشىسى، ەكونوميست ولجاس قۇدايبەرگەنوۆ تە پارتيانىڭ جاڭا باعدارلاماسى تۋرالى پىكىرلەرىن ءبىلدىردى.

ايتا كەتەيىك، «Nur Otan»-نىڭ جاڭا باعدارلاماسى پارتيانىڭ تاياۋدا عانا وتكەن كەزەكتى XVIII سەزىندە قابىلداندى. قۇجاتتىڭ تولىق نۇسقاسىمەن پارتيانىڭ رەسمي سايتى ارقىلى تانىسۋعا بولادى.