الماتى قالاسىنىڭ اتاقتى ورتالىق مادەنيەت جانە دەمالىس ساياباعىندا ەجەلگى تۇرىك كۇنتىزبەسىن كورسەتەتىن ارحيتەكتۋرالىق مۇسىندەر ورناتىلماق. بۇل تۋرالى ساياباق ديرەكتورى ۆلاديمير كالينين ءمالىم ەتتى.

ەلباسىنىڭ «بولاشاققا  باعدار: رۋحاني جاڭعىرۋ» ماقالاسى جاريالاعاننان  بەرى قازاق جەرىنىڭ ءار تۇكپىرىندە تاريحتىڭ تاڭباسىن جارقىراتقان جاقسى قادامدار جاسالۋدا. سونىڭ ءبىرى مىنە الماتىنىڭ اسەم ساياباعىنا قويىلاتىن - ەجەلگى تۇركىنىڭ كۇنتىزبەسى. ونى ەكى جىلعا ءارتۇرلى اتاۋ بەرىپ، «مۇشەلمەن» ەسەپتەۋ تۇگەل تۇركىنىڭ سالتى دەسەك، ونىڭ قازاق جەرىندە قايتا جاڭعىرتىلۋى ابدەن قۇپتارلىق ءىس.

باسقاسىن ايتپاعاندا، اشارشىلىق پەن ساياسي قۋعىن-سۇرگىن قۇرباندارىنا ارنالعان ەسكەرتكىش الماتىنىڭ تورىنە قويىلعاندا، اكىم باۋىرجان بايبەككە جۇرتتىڭ العىسى ەرەكشە بولىپ ەدى. ال تۇركىنىڭ ءتۇپ قازىعى سانالاتىن الاش توپىراعىندا، ونىڭ ىشىندە، مىڭجىلدىق تاريحى بار الماتى شاھارىندا ەجەلگى تۇركى كۇنتىزبەسى قايتا جاڭعىرتىلىپ جاتقانى تىپتەن قۋانتارلىق ءىس بولدى. بۇل تەك قازاقستاندىقتاردىڭ ىنتىماق بىرلىگىن عانا ەمەس، ۇلى دالانى جاعالاي قونىستانعان الىس-جاقىنداعى كورشى مەملەكەتتەردىڭ دە كوز قۋانىشىنا اينالاتىنى ءسوزسىز.

–وسى ۋاقىتقا دەيىن مادەنيەت ساياباعىندا ءبىزدىڭ ۇلتتىق قۇندىلىعىمىزدى دارىپتەيتىن ەشبىر ءمۇسىن بولماعان. مەن قازاقستان ازاماتى رەتىندە ەلىمىزدىڭ تاريحىن ەرەكشە قۇرمەتتەيمىن. سوندىقتان دا ورتالىق ساياباقتا قازاق حالقىنىڭ مادەنيەتىنەن سىر شەرتەتىن ءبىر ءمۇسىن بولۋى كەرەك دەپ ويلايمىن، - دەيدى ساياباق ديرەكتورى ۆلاديمين كالينين.

ءاپ، بارەكەلدى! شىن مانىندە قازاقستان حالقىنىڭ بىرلىگى مەن بەكەمدىگى، بولاشاعى مەن كەمەلدىگىندە تەك مەملەكەتقۇرۋشى قازاقتىڭ عانا مۇددەسى بولماۋى ءتيىس. بۇل ماقسات قازاق جەرىندە ءومىر ءسۇرىپ جاتقان ءاربىر ازاماتتىڭ اسىل مۇراتىنا اينالعاندا عانا ەل امان، جۇرت تىنىش مامىراجاي تىرلىكتىڭ بولاتىنى ايتپاسا دا تۇسىنىكتى.

ال اتالعان ساياباققا تۇگەلدەي قايتا جوندەۋ جۇمىستارىن جۇرگىزىپ، وندا جوعارىداعىداي ايتا قالارلىق ەلەۋلى ەسكەرتكىشتەر ورناتىلىپ جاتسا، بۇل ارينە، تەك الماتىلىقتاردىڭ عانا ەمەس، بۇكىل قازاقستاننىڭ ماقتانىشى، ابىرويى  بولماق.

بەرىك بەيسەن ۇلى، «قامشى.kz» اقپارات اگەنتتىگىنىڭ باس رەداكتورى.