وزبەكستاننىڭ فەرعانا وبلىسىندا حيميالىق زاتتى، كاربيدتى،  ىشۋگە ماجبۇرلەگەن سىنىپتاستارىنىڭ كەسىرىنەن 9 سىنىپ وقۋشىسى كوز جۇمدى دەپ حابارلايدى Qamshy.kz اقپارات اگەنتتىگى tengrinews.kz سايتىنىڭ دەرەگىن نەگىزگە الا وتىرىپ.

بۇل قايعىلى وقيعا 16 اقپان كۇنى ۇشكى (ۋچكي) اۋىلىندا ورىن العانىمەن، تەك ناۋرىزدىڭ باسىندا عانا بەلگىلى بولعان.

«ول وتە اق كوڭىل بالا بولاتىن. بايدىڭ بۇزاقى بالالارى وعان حيميالىق زاتتى قيناپ جۇتقىزعان. ۇيگە كەلىپ، سۋ ىشكەننەن كەيىن، قاتتى ايقايلاي باستادى. ونى اۋرۋحاناعا جەتكىزدىك»- دەيدى قايتىس بولعان بالانىڭ تۋىسى.

فەرعانا اۋداندىق ءبىلىم بەرۋ باسقارماسىنىڭ قىزمەتكەرى وقۋشى قايتىس بولعانى تۋرالى  حاباردار ەتىلمەگەنىن مالىمدەدى. مەكتەپ مۇعالىمدەرىنىڭ ءبىرى مەكتەپتىڭ باسشىلىعى بۇل ماسەلەنى شەشۋگە تىرىسىپ جاتقانىن ايتادى.

«ولەر الدىندا بالاسى ءوز اكەسىنەن بۇل جاعدايدى قازبالاماۋدى ءوتىندى» - دەيدى بولعان وقيعاعا كۋا بولعان قايعى جامىلعان وتباسىنىڭ كورشىلەرى. اۋرۋحانادا جاتقاندا ول جابىرلەۋشىلەردىڭ ءبىرىنىڭ ەسىمىن اتاپ ۇلگەرگەن، ال قالعاندارىنىڭ ەسىمدەرى سول كۇيى بەلگىسىز بوپ قالدى.

توعىزىنشى سىنىپ وقۋشىسىنىڭ ءولىمى الەۋمەتتىك جەلىلەردە ۇلكەن نارازىلىق تۋعىزعان. فەرعانالىق جازۋشى نۇريللو وتاحانوۆ Facebook پاراقشاسىندا ءجاسوسپىرىمنىڭ قايتىس بولعانىن ەستىگەندە قاتتى ەسەڭگىرەپ قالعانىن جەتكىزەدى.

«الەمدە نە بولىپ جاتىر؟ نەلىكتەن ادامدار سونشالىقتى قاتىگەز بولىپ بارا جاتىر؟ مەن ءۇش-تورت كۇن بۇرىن ءبىزدىڭ ءۇيدىڭ ماڭىنداعى مەكتەپتە وقيتىن بالانى سىنىپتاستارىنىڭ قولىن بۇراپ، ونى كاربيدتى نەمەسە سوعان ۇقساس نارسەنى جۇتۋعا ءماجبۇر ەتكەنىن ەستىدىم.  بۇل جاعدايدى ۇمىتۋ مۇمكىن ەمەس، ءالى ەسىمدى جيناي الماي وتىرمىن. مۇنى جاساعان ءالى مەكتەپ جاسىنداعى بالالار ەكەن! زامان نە بوپ بارادى؟ »- دەپ جازادى جازۋشى.

سونىمەن قاتار وزبەكستاننىڭ باس پروكۋراتۋراسىنىڭ باسپا ءسوز قىزمەتى Gazeta.uz سايتىنا بەرگەن سۇحباتىندا،  ءجاسوسپىرىم جۇتىپ قويعان زات اسقازانىنا زاقىم كەلتىرىپ، اسقازاننىڭ كۇيۋىنە اكەلىپ سوققانىن مالىمدەدى.

مينيسترلىكتىڭ مالىمەتىنشە، وقۋشى 15 اقپاندا حيميالىق زاتتى قولدانعان، سونىڭ ناتيجەسىندە اۋرۋحاناعا ءتۇسىپ، 26 اقپان كۇنى جانساقتاۋ بولىمىندە كوز جۇمعان.

اۋدارعان: فاريزا جومارت قىزى