مەن كوپبالالى انامىن، ەسىمىم - گاۋحار تاناشيەۆا، جەكە كاسىپكەر جانە «قازاقستان بالالارى» قايىرىمدىلىق قورىنىڭ باسشىسىمىن. ءبىز جۇبايىمىزبەن 8 بالا تاربيەلەپ وتىرمىز، ونىڭ ىشىندە 5ء-ۋىن اسىراپ العانبىز، بىرەۋى بالا جاسىنان مۇگەدەك. ءبىزدىڭ وتباسىمىزدا وزىمىزدىكى نەمەسە تۋعان ەمەس دەپ ءبولۋ جوق، بالالارىمىزدىڭ بارلىعى بىرگە تۋعانداي سىيلاسادى.

سوڭعى 10 جىل ىشىندە جۇبايىمىز ەكەۋىمىز بالالار ۇيىندە تۇراتىن جەتىم بالالارعا كومەكتەسىپ كەلەمىز. ءبىرىنشى اسىراپ العان ۇلىم پايدا بولۋىمەن ءبىزدىڭ كوزقاراسىمىز دا وزگەردى. ەگەر بۇعان دەيىن كومەككە مۇقتاج بالالار بار ەكەنىن بىلگەن بولساق، ەندى ءبىز جاي قاراپ وتپەي، ارەكەت جاساپ، بالالاردىڭ ومىرىنە بەلسەندى تۇردە قاتىسا باستادىق. بالا ءۇشىن ەڭ جاقسى جانە وڭتايلى نۇسقا – وتباسى ەكەنىن تۇسىنە وتىرىپ، ءبىز بالا اسىراپ الۋ تۋرالى شەشىمگە كەلدىك.

ءبىز ءۇشىن بالانىڭ قانشا جاستا ەكەنى، ونىڭ گەنى قانداي،ياعني ونىڭ اتا-اناسى كىم ەكەنى ماڭىزدى ەمەس. مەنىڭ جۇبايىم ءاردايىم بىلاي دەيدى: «ەگەر ءبىز ءبىر بالاعا دۇرىس جولعا تۇرۋعا كومەكتەسسەك، ونى باعىتتاپ جانە ونى ادامگەرشىلىگى مول ازامات ەتىپ وسىرسەك، ءبىز بەكەر ءومىر سۇرمەدىك دەپ ساناۋعا بولادى».

شىنىمدى ايتسام، بويجەتكەن كەزىمدە، مەن كوپ بالالى انا بولۋدى جوسپارلامادىم، ءبىراق ءومىر باسقاشا جول قۇردى. مەن وكىنبەيمىن. كوپ بالالى بولۋ قازاق حالقىنىڭ ءسالت-داستۇرىنىڭ ءبىرى بولىپ قالا بەرەدى. مەنىڭ ويىمشا، اتا-انالار ءبىرىنشى كەزەكتە بالالارىنىڭ بولاشاعى ءۇشىن جاۋاپكەرشىلىكتى ويلاۋى ءتيىس. ءوز وتانىن سۇيەتىن، ءوز حالقىن جانە داستۇرلەرىن سىيلايتىن لايىقتى ادامداردى تاربيەلەۋگە تىرىسۋ كەرەك. دالەل رەتىندە كوپتەگەن تابىستى ادامداردىڭ كوپ بالالى وتباسىنان شىققانىن ايتقىم كەلەدى. ۇلكەن وتباسىندا بالالار تاتۋ، ۇيىمشىل، كوپشىل بولىپ وسەدى، ەرتە ەڭبەك باعاسىن تۇسىنەدى.جالپى قوعامدىق قور ارقىلى كوپ بالالى انالاردىڭ كوپتەگەن سۇراقتاردى 4 جىل بويى اينالىسىپ جاتىرمىز.

قالا اكىمىنىڭ كوپ بالالى انالارمەن كەزدەسۋىندە ءبىرقاتار وزەكتى ماسەلەلەر كوتەرىلدى.ولاردى شەشۋ ءۇشىن قۇرىلعان«باقىتتى وتباسى - الماتى» قورىنىڭ قامقورلىق كەڭەسىنىڭ قۇرامىنا مەن جانە مەنىمەن بىرگە ءبىرقاتار بەلسەندى كوپبالالى انالار ەندى.
بارلىعىمىز، ءارقايسىمىزدىڭ ومىرىمىزدە مورالدىق جانە ماتەريالدىق كومەك قاجەت ەتەتىن ساتتەر بولاتىنىن جاقسى بىلەمىز. ال كوپبالالى وتباسىنىڭ ومىرىندە مۇنداي ساتتەر ودان دا كوپ.

قازىرگى ۋاقىتتا ەلباسى پارتيانىڭ سەزىندە بەرگەن تاپسىرماسى اياسىندا رەسپۋبليكا جانە الماتى قالاسى بويىنشا از قامتىلعانكوپبالالى وتباسىلارعا كەشەندى قولداۋ بويىنشا كوپتەگەن شارالار جۇرگىزىلۋدە. ول جونىندە بۇگىنگى جينالىستا كەنىنەن ايتىلدى. ءبىراق اتا-انالار بالالاردىڭ بولاشاعى ءۇشىن نەگىزگى جاۋاپكەرشىلىك ولاردىڭ يىعىنا جاتاتىنىن ءتۇسىنۋى ءتيىس.

ماعان كەلەسىدەي سۇراقتاردى ءجيى قويادى: وسىنداي كوپ بالالار سانىمەن قالاي بيزنەس پەن قوعامدىق جۇمىستى قوسا اتقارۋعا ۇلگەرەسىز دەپ. مەنىڭ جاۋابىم قاراپايىم: «باستىسى ەڭبەك جانە ماحاببات. ءوز بالالارىڭا دەگەن ماحاببات. اينالىساتىن ىسكە دەگەن ماحاببات. تاڭداعان ماماندىققا دەگەن ماحاببات. سوسىن ەڭبەكتەنۋ، ەڭبەكتەنۋ جانە تاعى دا ەڭبەكتەنۋ».

ءبارىمىز كورىپ وتىرمىز – مەملەكەت قوعامىمىزداعى ءاربىر بالاقايعا شەكسىز قامقورلىق كورسەتىپ، بۇكىل مۇمكىندىكتەردى جاساپ وتىر.
بالا ومىرگە كەلەردە اتا-اناسىن تاڭدامايدى، ونى اتا-اناسى ءوز ساناسىمەن دۇنيەگە اكەلەدى. سوندىقتان، ءاربىر اتا-انا، ەڭ الدىمەن،ءوز بالاسىنىڭ تاعدىرى مەن بولاشاعى ءۇشىن ءوزى عانا جاۋاپتى ەكەنىن ەستە ۇستاعاندارى ءجون دەپ ويلايمىن.

وسى ايتىلعاننىڭ بارلىعىن تۇيىندەيتىن بولسام، كەلەسى 3 ماسەلەگە توقتالىپ وتكىم كەلىپ وتىر.

بىرىنشىدەن. جامان ايتپاي جاقسى جوق دەيدى. بولعان جاعدايعا بارلىعىمىزدىڭ قابىرعامىز قايىسادى. قۇدايعا شۇكىر، مەملەكەتىمىز قۇر الاقان، اش-جالاڭاش ەمەس. ەلباسى كەشەگى پارتيا سەزىندە ايتتى. انالاردى، كوپبالالى وتباسىلاردى قولداۋعا قىرۋار قارجى ءبولىنىپ جاتىر. وسىنى دۇرىستاپ يگەرۋ قاجەت.

ەكىنشىدەن. كەز-كەلگەن ازامات ەڭ الدىمەن ءوزى ءۇشىن ءومىر سۇرەدى. مەنىڭ 8 بالام بار. ونى ەشكىمگە دە مىندەت ەتىپ وتىرعان جوقپىن. مەنىڭ ويىمشا، مەملەكەت تەك جاعدايى جوق، بارار جەر، باسار تاۋى قالماعان ازاماتتارعا، ەشكىم دالادا قاراۋسىز قالماسىن دەپ شىن مانىندەگى مۇقتاجدارعا كومەكتەسۋى كەرەك. اسپانداعى ايدى الىپ بەرە عوي دەگەن ماسىلدىق بولماۋ كەرەك.

ۇشىنشىدەن. ءبىز بەرەكەلى ەلدە ءومىر ءسۇرىپ جاتىرمىز. ارينە بارلىعى بىردەي ەمەس. بىرەۋى بىلاي تارتسا، تاعى بىرەۋ ءوز جاعىنا تارتادى. ەلدە بىرلىك، بەيبىتشىلىك بولۋى كەرەك. ءبىر-بىرىمىزدى تىڭداي ءبىلۋىمىز كەرەك. بىزگە ەشكىم سىرتتان كەلىپ شەشىپ بەرمەيدى. سوندىقتان، ۇرىس-تالاسقا، ايقاي-شۋعا جول بەرمەي، ماسەلەنىڭ بايىبىنا بارىپ، اقىلداسا وتىرىپ شەشۋىمىز كەرەك.

انا زاتى تابيعاتىندا قاشاندا مەيىرىم شاشىپ تۇراتىن، بەيبىتشىل جاراتىلىس. مەنىڭ انا رەتىندە ايتاتىنىم وسى 3 ماسەلە.

ال بۇگىن ءبىزدى ەلەپ، پارتيا وتىرىسىنا شاقىرىپ، اڭگىمەمىزدى تىڭداپ وتىرعاندارىمىزعا راحمەت. مەن دە وسى باعىتتاعى جۇمىسقا ءوز ۇلەسىمدى قوسۋعا دايىنمىن.

گاۋحار تاناشيەۆا