كەز كەلگەن ىسكە مۇقيات قاراساڭ، ءىستىڭ ناتيجەلى بولاتىندىعىن امەريكالىق دجوردجيا شتاتىنىڭ مەكتەپ ءمۇعالىمى دالەلدەدى. ول قۇجاتتاردى راسىمدەۋ كەزىندە ۇساق جازۋدى وقىعانى ءۇشىن 10 مىڭ دوللار ۇتىپ العان دەپ حابارلايدى Qamshy.kz اقپارات اگەنتتىگى  Tampa Bay Times  سايتىنىڭ دەرەگىن نەگىزگە الا وتىرىپ.

فلوريداداعى سانكت-پەتەربۋرگ قالاسىندا ورنالاسقان Squaremouth ساقتاندىرۋ كومپانياسى قۇپيا جارىس وتكىزگەن. ولاردىڭ  شارتتارى بويىنشا، شەتەلگە شىعۋشىلارعا قۇجاتتى راسىمدەۋ كەزىندە،  ۇساق ولشەممەن جازىلعان جازۋدى وقۋ كەرەك.

59 جاستاعى مەكتەپ ءمۇعالىمى دونەلان ەندريۋس  العاش رەت بۇل بايقاۋدى 400 دوللارعا ساقتاندىرۋ قاعازىن ساتىپ الار كەزىندە بايقاعان. ول زاڭدى قۇجاتتاردى مۇقيات وقي وتىرىپ، ونداعى ادەيى جازىلعان ارنايى تەرميندەردى بايقاپ قالادى. ال كومپانيا ۇيىمداستىرعان جارىستىڭ ءماتىنى بەرىلگەن قۇجاتتىڭ جەتىنشى بەتىندە بولعان.

«قۇجاتقا قول قويماس بۇرىن الدىمەن مۇقيات وقىپ شىعۋ كەرەكتىگىن ءتۇسىندىرۋ ءۇشىن ءبىز وسى بايقاۋدى ويلاپ تاپتىق. بەرىلگەن اقپاراتتى باسىنان اياعىنا دەيىن وقۋعا كەلىسكەن ادامدى ىنتالاندىرۋ ماقساتىندا وعان اقشا تولەدىك. قۇجاتتاعى ۇساق جازۋدى رەت-رەتىمەن ءبىرىنشى بولىپ وقىپ  شىققان ادامعا 10 مىڭ دوللار كولەمىندە سىياقىمىز بار ەكەندىگىن حابارلادىق» دەيدى جارىستى ۇيىمداستىرۋشىلار.

جارىستى جاريالاعاننان كەيىن اراعا 23 ساعات سالىپ مەكتەپ ءمۇعالىمى ۇيىمداستىرۋشىلارعا حابارلاسادى. ول ۇنەمى ۇساق ولشەمدەگى جازۋلاردى وقۋعا ادەتتەنگەنىن ايتادى. باعى جانعان ەندريۋست ۇتىپ العان اقشاعا ۇيلەنگەنىنە 35 جىل تولۋ مەرەيتويىنا وراي شوتلانديا ەلىنە ساياحاتاۋدى جوسپارلاپ وتىر.

اۋدارعان: فاريزا جومارت قىزى