9 ناۋرىز اتىراۋ وبلىستىق اكىمدىكتە وبلىس اكىمىنىڭ ءبىرىنشى ورىنباسارى سەرىك شاپكەنوۆتىڭ قاتىسۋىمەن بالىقتىڭ جاپپاي قىرىلۋىن تەكسەرۋگە ارنالعان ۆەدومستۆوارالىق كوميسسيانىڭ ءماجىلىسى ءوتتى، دەپ حابارلايدى Qamshy.kz اقپارات اگەنتتىگى.
ءماجىلىس بارىسىندا ءمالىم بولعانىنداي، ەكى كۇن ىشىندە ارناۋلى اۆتوبازا، وبلىستىق ورمان شارۋاشىلىعى جانە جانۋارلار الەمى، بالىق شارۋاشىلىعى باسقارمالارىنىڭ قىزمەتكەرلەرىمەن جارتى تونناعا جۋىق (493 كگ.) ءولى بالىق جينالىپ، اكتىلەنگەن سوڭ، جويىلدى. مامانداردىڭ ايتۋىنشا، شارا كەزىندە الىنعان بارلىق مالىمەتتەر قۇقىققورعاۋ ورگاندارىنا تاپسىرىلىپ، اتالمىش فاكتى بويىنشا بۇدان بۇرىن كوتەرىلگەن قىلمىستىق ىسكە قوسىلادى ەكەن.
اتىراۋ وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلى حابارلاعانىنداي، «امانگەلدى» بالىق كووپەراتيۆىنىڭ كەمەسى دامبى مەن تەمىر جول كوپىرى ارالىعىنداعى وزەن بەتىندەگى مۇزدى جارىپ شىققان ەكەن. «بۇدان ءارى تابيعات پايدالانۋشى كاسىپورىنداردىڭ وزەندە پايدالاناتىن تەحنيكاسىمەن بۇكىل وزەننىڭ بويىنداعى ءولى بالىق جينالادى»،- دەدى ول.
اتىراۋ وبلىسىنىڭ ءبىرىنشى ورىنباسارى سەرىك شاپكەنوۆ جينالعاندارعا اتاپ وتكەنىندەي، ۆەدومستۆوارالىق كوميسسيا ءبىرقاتار جۇمىستى اتقارىپ، بولعان وقيعانىڭ سەبەپ-سالدارىن ءجىتى قاداعالاپ، جاعدايعا ناقتىلى قاداعالاۋ ورناتقان ەكەن. – ءارتۇرلى ارانداتۋشىلىققا جانە استىرتىن تۇردە كەدەرگى كەلتىرۋشىلەرگە جول بەرمەۋىمىز كەرەك. قازىرگى ۋاقىتتا تەرگەۋ قۇپيالىلىعىن ساقتاۋ ماقساتىندا كەيبىر ءجايتتاردى جاريا ەتە المايمىز. ەڭ باستىسى، نە بولعانىن حابارلاۋ ەمەس، جايىقتى قۇتقارۋ. وسىنى ەستەن شىعارمايىق. جاعداي وبلىستاعى بارلىق قۇزىرلى ورگانداردىڭ جانە ايماق باسشىلىعىنىڭ نازارىندا، - دەدى شاپكەنوۆ مىرزا.
بالىق شارۋاشىلىعى باسقارماسىنىڭ باسشىسى ارتۋر سادىبەك ۇلى حابارلاعانىنداي، وزەن جاعالاۋىن ءولى بالىقتان تازارتۋ ءۇشىن ماماندارعا كومەكتەسۋگە قوعامداعى بەلسەندى ازاماتتاردان باستاماشىل توپ قۇرىلىپتى.
بۇل وتە ورىندى جانە ۋاقىتىلى باستاما ەكەن، ولارعا قولداۋ كورسەتۋىمىز كەرەك. ءبىراق، ەڭ الدىمەنەن، قاۋىپسىزدىك جاعدايىن دا ەستەن شىعارماعان ابزال. جاعالاۋدا توتەنشە جاعدايلدار دەپارتامەنتى، ماماندار بالىقتى وزەننەن جيناۋى كەرەك، ال ەرىكتىلەر جاعالاۋدا، ءقاۋىپسىز ايماقتا تازارتقانى دۇرىس،- دەدى سەرىك شاپكەنوۆ.
ءماجىلىس قورىتىندىسىمەن 10 ناۋرىزدا وزەندى ءولى بالىقتان تازارتۋعا شىققان ادامداردىڭ ساعات 10. 00-دە جينالۋ ءۇشىن 4 ورىن بەلگىلەندى.
1ء-ىنشى ورىن: اينالما كوپىردەن بۇرىڭعى احاج (زاگس) كوپىرىنە دەيىنگى ارالىق (كوورديناتورى ايگەرىم دوسقالييەۆا، تەل. ءنومىرى: 8775 454 0490)؛
2ء-ىنشى ورىن: احاج كوپىرىنەن الييەۆ كوپىرىنە دەيىنگى ارالىق (كوورديناتورى شىنار ىزتەلەۋوۆا، تەل. ءنومىرى: 87017812968) ؛
3ء-ىنشى ورىن: ح. دوسمۇحامەدوۆ اتىنداعى ۋنيۆەرسيتەتتەن جيلگورودوك ىقشاماۋدانى ماڭىنداعى كوپىر ارالىعى (كوورديناتورى سارا جۇماقۇلوۆا، تەل. ءنومىرى: 8701 4343998)؛
4ء-ىنشى ورىن: جيلگورودوك ىقشاماۋدانى كوپىرى ماڭىنان بالىقشى ىقشاماۋدانىنا دەيىنگى ارالىق (كوورديناتورى مەيرامگۇل ەسنيازوۆا، تەل. ءنومىرى: 8775 0288336).
ۇيىمداستىرۋشىلاردىڭ حابارلاۋىنشا، بارلىق جەرلەردە دە توتەنشە جاعدايلار جونىندەگى دەپارتامەنتتىڭ، «ارنايى اۆتوبازا» ج ش س ماماندارىنىڭ كەزەكشى قوسىندارى قىزمەت كورسەتىپ، وزەندى تازالاۋ ءۇشىن تەحنيكامەن، قۇرال- جابدىقتارمەن قامتاماسىز ەتىلەدى.
(فوتونىڭ جايىق وزەنىنە قاتىسى جوق)
جانات ازاتوۆا
ۇسىنعان: گۇلىم جاقان
