دۇنيەجۇزىلىك دەنساۋلىق ساقتاۋ ۇيىمى قازاقستان تۇزدى ەڭ كوپ تۇتىناتىن ەلدەردىڭ ءبىرى ەكەنىن مالىمدەدى. بۇل تۋرالى بۇۇ جاڭالىقتار قىزمەتى حابارلادى.

سوڭعى جىلدارى ددسۇ قولداۋىمەن ءۇش زەرتتەۋ جۇرگىزىلىپ، قازاقستان الەمدەگى تۇزدى ەڭ كوپ تۇتىناتىن ەلدەردىڭ ءبىرى ەكەنى انىقتالعان. مامانداردىڭ ايتۋىنشا، ەلدە ءاربىر ادام كۇنىنە 17 گ تۇز تۇتىنادى، بۇل ددسۇ ۇسىنعان نورمادان ءتورت ەسەدەي ارتىق كورىنەدى.   

"قازاقستاندا تۇزدى تۇتىنۋ دەڭگەيىنىڭ جوعارى بولۋىنا تاريحي جانە زاماناۋي ۇردىستەر سەبەپ بولىپ وتىر. بۇرىن ادامدار تۇزدى ازىق-تۇلىكتى – اسىرەسە ەت پەن شۇجىقتى، سونداي-اق قۇرت، ايران سياقتى اشىتقى ءسۇت ونىمدەرىن ساقتاۋ مەرزىمىن ۇزارتۋ ءۇشىن پايدالاندى"، - دەپ جازىلعان ددسۇ حابارلاماسىندا.

زەرتتەۋ كورسەتكەندەي، ورتالىق ازيادا ءداستۇرلى تۇزدى تاعامداردى ءوندىرۋ ءۇردىسى ءالى دە جالعاسىپ كەلەدى، ال وڭدەلگەن ازىق-تۇلىكتەردىڭ پايدا بولۋى جاعدايدى ودان سايىن ناشارلاتىپ جىبەرگەن.

ددسۇ ازىق-تۇلىكتىڭ بۇل زياندى بولىكتەرى سوزىلمالى اۋرۋلاردىڭ كوبەيۋىنە اكەلەتىنىن ەسكەرتتى.

"دارىگەرلەر قازاقستان حالقى دۇرىس تاماقتانۋ، اسىرەسە تۇزدى تۇتىنۋعا قاتىستى ۇسىنىمداردى ەسكەرمەيتىن بولسا، بۇل جۇرەك-قان تامىرلارى اۋرۋلارى، سەمىزدىك، ەكىنشى ءتيپتى قانت ديابەتى مەن ونكولوگيالىق اۋرۋلاردىڭ ارتۋىنا اكەلەتىنىن ەسكەرتەدى"، - دەپ اتاپ ءوتتى ددۇ ماماندارى.

ۇسىنعان: گۇلىم جاقان