ۆيسە-مينيستردىڭ ايتۋىنشا، اتاۋلى الەۋمەتتىك كومەك تۋرالى زاڭدا جەكە شارۋاشىلىقتى كىرىس رەتىندە ساناپ-ساناماۋدى جەرگىلىكتى اتقارۋشى ورگاندار وزدەرى شەشەدى.

ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا وتباسىنىڭ جيىنتىق تابىسىن ەسەپتەگەن كەزدە جەكە شارۋاشىلىقتى ەسەپكە الۋ ماسەلەسىنە قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

"شارۋاشىلىققا قاتىستى ساۋالدار ءجيى قويىلادى. نەگىزى اتاۋلى الەۋمەتتىك كومەك تۋرالى زاڭنىڭ 7-بابىندا جەرگىلىكتى اتقارۋشى ورگاندار جەكە شارۋاشىلىقتى كىرىس دەپ ساناۋ-ساناماۋدى وزدەرى شەشەتىنى كورسەتىلگەن. ولاردىڭ سونداي قۇقىعى بار"، - دەدى جاقىپوۆا ءماجىلىس كۋلۋارىندا.

ول قازىرگى تاڭدا رەسپۋبليكادا تەك ءبىر عانا وبلىس قوراداعى ءتورت تۇلىكتى ەسەپكە المايتىنىن اتاپ ءوتتى. الايدا ونىڭ قانداي ءوڭىر ەكەنىن ناقتىلامادى. 

"الداعى ۋاقىتتا بۇل ماسەلەلەردىڭ بارلىعى قايتادان قارالىپ، نەگىزگى شەشىمدەر قابىلدانادى. جۇمىس جۇرگىزىلىپ جاتىر"، - دەپ سەندىردى جاقىپوۆا.

قوراداعى مالدى وتباسىنىڭ كىرىسى دەپ ەسەپتەۋ قانشالىقتى دۇرىس دەگەن ساۋالعا ءمينيستردىڭ ورىنباسارى سيىر ۇستايتىن ەكى كورشىنى مىسال ەتىپ، جاۋاپ بەردى.

"ماسەلەن، ەكى كورشىنى الايىق. بىرەۋى 20 سيىر ۇستايدى، بالالارىنا ەتىن جەگىزىپ، ءسۇتىن ىشكىزىپ اسىراپ وتىر. ال قاسىنداعى كورشىسى سيىرلارى جوق، ونى ساتىپ الۋعا جاعدايى دا جوق. ءبىراق جاردەماقى تاعايىنداعان كەزدە، ەكەۋى دە سول كومەككە ىلىگەدى. بىرنەشە سيىر ۇستايتىن وتباسى دا بالالارىنا 21 مىڭ تەڭگە الادى، بىردە-بىر سيىرى جوق كورشىسى دە ءدال سونداي جاردەماقى الادى. سوندا ايتىڭىزشى، وسى ادىلەتتى مە؟"، - دەدى ۆيسە-مينيستر.

ۇسىنعان: نازەركە لاببيحان