"كەلينكا سابينا” ءفيلمى ارقىلى كوپشىلىككە تانىلعان  جان ءىزباسار ۇلى سال بولىپ تۋعان بالاسى مەن ايەلىن تاستاپ كەتكەن. بۇگىندە ول 4 جاسقا كەلگەن بالاسىن ىزدەمەيدى، ەشقانداي كومەك كورسەتپەيدى. العاشقىدا اليمەنت تولەۋدەن دە باس تارتقان. قۇزىرلى ورگاندار سوڭىنان تۇسكەن سوڭ عانا مىندەتىن ورىنداي باستاعان دەپ جازادى Qamshy.kz اقپارات اگەنتتىگى.

بۇل جايىندا جاننىڭ بۇرىنعى ايەلى نازگۇل “استارلى اقيقات” باعدارلاماسىندا بايانداپ بەردى.

نازگۇلدىڭ ايتۋىنشا، بۇرىنعى كۇيەۋى دە، ونىڭ اتا-اناسى دا ءۇش جىل ىشىندە بالانى ىزدەپ كەلمەگەن. ونىڭ جاعدايىنا دا مۇلدە الاڭداماعان. قازىرگى ۋاقىتتا اكتەر اليمەنت تولەپ تۇرادى ەكەن. 1 جىل ىشىندە بەرگەنى 114 مىڭ تەڭگە.

“قانشا قيىنشىلىقتان وتتىك. سول كەزدە قاسىمىزدان تابىلعان جوق، وكىنىشكە وراي”، – دەپ كۇرسىنەدى نازگۇل.
 

ال بالاسىنا كومەكتەسۋدەن باس تارتقان اكەنىڭ ايتقانى مىناۋ بولدى: مەن وعان ءبارىن بەردىم. ءۇي بەردىم، توي جاسادىم. كەلگەن كۇنىنەن باستاپ كيىندىردىم. كەز كەلگەن دارۋمەنى، ءدارىسى بار ما، جەمىسى بار ما، قالاعانىن الىپ بەردىم. ماندارين، بانان، انار دەگەندى جاشىكپەن الىپ كەلەتىنمىن. مەنەن تالاپ ەتىلەتىن نارسەنىڭ ءبارىن بەردىم. ءبىراق، سەنەن تۋعان بالا ساۋ ەمەس. ەندى مەن كەشىرىم سۇراۋىم كەرەك پە؟ نە ءۇشىن؟ مەنىڭ كىنام نە؟ مۇمكىن كىنارات مەنەن شىعار دەگەن وي بولعان، ءبىراق ولاي ەمەس. ودان كەيىن مەنىڭ ساپ-ساۋ بالام دۇنيەگە كەلدى. بالانى جاسايتىن كەزدە قىدىردىم دا، دوستارىممەن سىرا دا ءىشتىم.

دسپ دەرتىنە شالدىققان بالاعا بۇگىندە نازگۇلدىڭ اناسى قاراپ وتىر، اعاسى دا بارىنشا قول ۇشىن بەرىپ تۇرادى. نازگۇلدىڭ ءوزى قۇرىلىس كومپانياسىندا جۇمىس ىستەيدى. ارىپتەستەرى مەن كومپانيا باسشىلىعى بالانىڭ ەم-دومىنا كومەكتەسىپ، كەرەك كەزدە تۇسىنىستىك تانىتاتىندىعىن ايتىپ ريزاشىلدىعىن ءبىلدىردى نازگۇل. 

نازگۇلدىڭ ءوزى 8 جاسىندا اكەسىنەن ايىرىلعان. ال اناسى نۇرجامال العاشقىدا ونىڭ اكتەرگە تۇرمىسقا شىعۋىنا قارسى بولىپتى. الايدا جان ءىزباسار قىزىنىڭ قىر سوڭىنان قالماعان سوڭ، كەلىسۋگە ءماجبۇر بولعان. 
“قىزىم تۇرمىسقا شىعامىن، جىگىتىم بار" دەدى. ول كەزدە قىزىم قالادا جۇمىس ىستەپ ءجۇردى. جىگىت ۇيلەنەمىز دەپ، ونى جۇمىستان دا شىعارتىپ الدى”، – دەيدى اناسى. 

جان ءىزباسار اجىراسقان سوڭ بالانى وزىنە قالدىرۋعا ۇسىنىس جاساعانىن ايتادى. 

“اسىراي الماسا، مەن الايىن دەدىم. كەيىن ارتىق اڭگىمە بولماس ءۇشىن باس تارتسىن دەدىم”، – دەيدى اكتەر.
نازگۇلدىڭ اناسى مەن ونىڭ قۇربىسى اكتەردىڭ بۇل ءسوزىن راستاپ وتىر. الايدا جان بالانى العاننان كەيىن، ونى ارنايى ينتەرناتقا وتكىزبەكشى بولعان. سوندىقتان دا نازگۇل دە، ونىڭ اناسى دا بۇعان كەلىسپەگەن. 

اناسىنىڭ ايتۋىنشا، بالانىڭ ەمىنە ايىنا شامامەن 370 مىڭ تەڭگەدەي اقشا كەتەدى.  بالاعا بۇگىندە ۆەرتيكاليزاتور، ورتوپەديالىق ۇستەل، ميىن دامىتاتىن زاتتار مەن دارۋمەندەر كەرەك.

"ۇلىنىڭ قيىنشىلىعى اكەسىنىڭ باسىنا تۇسپەسە، ءامينا دەگەن اتىم قۇرىسىن"

جاننىڭ بەرگەن سۇحباتىن كورگەن باعدارلاما ساراپشىلارى ونىڭ وتە تومەن دەڭگەيلى ادام ەكەنىن اتاپ ءوتتى. ايەلى مەن بالاسىنا الىپ بەرگەن كيىمى مەن تاماعىنا دەيىن ءسوز ەتكەن ەركەكتەن قايىر جوق ەكەنىن دە ايتتى. بالا 1 جاسقا كەلگەنگە دەيىن وتباسىنا قامقور بولعانىن نازگۇلدىڭ ءوزى دە جاسىرمايدى. الايدا ۇلى ەكەۋى ءدال بۇگىن كومەككە ءزارۋ. 

بۇل ورايدا “پەرزەنت” بالالار ءۇيىنىڭ ءتورايىمى ءامينا تاجىبايەۆا قينالىپ وتىرعان اناعا كومەك كورسەتەتىن بولدى. 

“مەنىڭ ۇيىمە كەلشى، شەت مەملەكەتكە اپارىپ ەمدەتەيىن. وسى بالانىڭ قيىنشىلىعى سونىڭ باسىنا تۇسپەسە، ءامينا دەگەن اتىم قۇرىسىن. اققان سۋدىڭ دا سۇراۋى بار. بۇل دا ءبىر اللانىڭ سىناعى، سەندەر ونى بىرگە وتۋلەرىڭ كەرەك ەدى. ءبىر بولمەنى اناڭ ەكەۋىڭە بەرەمىن. ساۋد ارابياسىنا بارامىز. مىنادان كۇدەرىڭدى ءۇز، بۇل ادام ەمەس. بۇنىڭ كورەتىنى ءالى الدا. انانىڭ كوز جاسى جىبەرمەيدى”، – دەيدى ءامينا اجىبايەۆا . 

قوعامدا بۇل جاعدايدىڭ ورىن الۋىنا كىم كىنالى؟

"بۇل جەردە ءقازىر ءبىز ەڭ وزەكتى ماسەلەگە تاپ بولىپ وتىرمىز.  سونداي جان سەكىلدى بالالاردىڭ  تاربيەلەنىپ شىعىپ جاتۋى — اكەلەر مەكتەبىنىڭ وسال ەكەندىگىن كورسەتەدى. جاۋاپكەرشىلىگى جوق، ەر - ازامات رەتىندە ءپىسىپ جەتىلمەيدى. ۇلكەن قوعامدىق دەڭگەيدە قاراۋعا مىندەتتى ماسەلە دەپ ويلايمىن. تاربيە باسى بەسىكتە ەكەنىن ەسكەرسەك بۇل ءپاتريوتيزمنىڭ  ءتۇبى وتباسىندا، وتباسى وسىنداي بولاتىن بولسا وندا مۇنداي ادامنان  ءپاتريوتيزدى دە ۇلتجاندىلىقتى دا كورە المايمىز" - دەپ پىكىر ءبىلدىردى پسيحولوگ ءدىلدا ساقتاعانوۆا

ۇسىنعان: فاريزا جومارت قىزى