تۇركىستان  وبلىسىندا قوقىس پوليگونى ماڭىندا تۇراتىن حالىق مۇڭكىگەن يىسكە تۇنشىعۋدا. پوليگوننەن كەلگەن كەسەل! تۇركىستان وبلىسىندا ەكى جىل بۇرىن پايدالانۋعا بەرىلگەن كۇل - قوقىسقا ارنالعان اۋماق سول ماڭداعى جۇرتتىڭ مازاسىن قاشىرىپ جاتىر. سايرام   اۋدانىنا قاراستى قارابۇلاق ەلدى مەكەنىنىڭ تۇرعىندارى تۇتىنگە تۇنشىعىپ، مۇڭكىگەن يىستەن مەزى بولعاندارىن العا تارتتى. ءتىپتى، مۇگەدەك بولىپ تۋىلعان سابيلەر دە بار ەكەن. بۇل تۋرالى Qamshy.kz اقپارات اگەنتتىگى حابارلايدى  ەۋرازيا ءبىرىنشى ارناسىنىڭ دەرەگىن نەگىزگە الا وتىرىپ.

بۇل - قارابۇلاق اۋىلىنىڭ ىرگەسىندەگى تۇرمىستىق زاتتار قالدىعىن تاستايتىن ورىن. اۋماعى اتشاپتىرىم جەردى الىپ جاتىر. اينالاسى پلاستيكالىق زاتتار مەن كۇل-قوقىسقا  تولىپ   قالعان. 
سايرام اۋدانىنا قاراستى 40 ەلدى مەكەننىڭ تۇرمىستىق زاتتار قالدىقتارى مىنە وسى پوليگونعا جەتكىزىلەدى. كەم دەگەندە كۇنىنە 10 اۆتوكولىك كۇل قوقىستى وسىندا اكەپ توگەدى. ارنايى تەحنيكانىڭ كومەگىمەن ونى اشىقتان - اشىق ساي سالاعا كومىپ جاتىر. تۇرعىنداردىڭ اشۋىن تۋعىزىپ وتىرعان دا وسى ماسەلە. ويتكەنى، وسى جەردەن تارايتىن كەيبىر ۋلى زاتتار ءبىزدىڭ بالالارىمىزدى ۋلاپ جاتىر دەيدى.

ارتىق ءقالجالىلوۆ، قارابۇلاق اۋىلىنىڭ تۇرعىنى: بالالاردىڭ بارلىعى ەرتەڭ مۇگەدەك بولادى. قازاقستان رەسپۋبليكاسىنىڭ ازاماتى رەتىندە قىزمەتكە جاراماي قالادى. سوندا ەرتەڭگى ۇرپاعىمىز نە بولادى.

ۇشقىن ءقالجالىلوۆ، قارابۇلاق اۋىلىنىڭ تۇرعىنى: 4 جىل ىشىندە مۇگەدەكتەرىمىز كوبەيىپ جاتىر. دەنەسىنە جارا شىعىپ كەتكەنىن كورسەتتى. كۇنى ەرتەسىنە ولار ءبىزدى قورقىتا باستادى. "ەگەر ايتساڭ ءۇيىڭدى بۇزامىز" - دەيدى.

پوليگون وسىدان جەتى جىل بۇرىن وبلىستىق قۇرىلىس باسقارماسىنىڭ تاپسىرىسىمەن سالىنعان. قازىنادان 49 ميلليون تەڭگە جۇمسالىپتى. ءاۋ باستا جەر كولەمى 6.5 گەكتارعا شاقتالىپ، كەيىن جاڭا تالاپقا سايكەس، ونىڭ 4.5 گەكتارى قىسقارتىلعان. سەبەبى، كۇل-قوقىس تاستايىن ورىن ەلدى مەكەننەن كەم دەگەندە ءبىر شاقىرىم قاشىقتىقتا بولۋى شارت ەكەن. ءسويتىپ، جەرگىلىكتى بيلىك الگى جەردى قايتا جاساقتاۋعا تۋرا كەلىپتى. 

ال، سايرام اۋداندىق تۇرعىن ۇي-كوممۋنالدىق شارۋاشىلىق ءبولىمىنىڭ باسشىسى ەربول سارىبەكوۆ بولسا ءقازىر، پوليگوننىڭ اۋماعى 2 گەكتار. 4.5 گەكتاردى قىسقارعانىن، سول جەرگە 49 مىڭ دانا اعاش كوشەتى ەگىلىپ، ول جەردە كوگالداندىرۋ، اباتتاندىرۋ جۇمىستارى ءجۇرىپ جاتقاندىعىن ايتادى.

الايدا، اكىمدىكتىڭ بۇل سوزىنە حالىق سەنەر ەمەس. شىندىقتى ايتىپ، شىرىلداعانداردى ءتۇرلى ايلا - امالمەن قورقىتىپ جاتىر دەيدى.  دەگەنمەن، بيۋدجەتتەن قىرۋار قاراجات جۇمساپ، ارنايى جاسالعان ورىندى ەندى باسقا جاققا كوشىرۋ مۇمكىن ەمەس. تەك، اينالاسىن اباتتاندىرىپ، تالاپقا سايكەستەندىرسە بولعانى دەيدى اكىمدىك قىزمەتكەرلەرى. سوندىقتان، جەرگىلىكتى جۇرتقا باسقا سالعانعا كونگەننەن باسقا امالى جوق.

ۇسىنعان: فاريزا جومارت قىزى