ەنەرگەتيكا ۆيسە-مينيسترى ءسابيت نۇرلىباي جايىق وزەنىنىڭ بەتىنە قالقىپ شىققان ولگەن بالىقتاردى دەرەۋ جيناپ، جويىپ جىبەرۋ كەرەكتىگىن ايتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

بىلتىر جەلتوقساندا جايىق وزەنىندە بالىقتاردىڭ جاپپاي قىرىلۋىنا بايلانىستى ارنايى ۆەدومستۆوارالىق كوميسسيا قۇرىلعان بولاتىن. كوميسسيا ءتوراعاسى – ەنەرگەتيكا ءمينيسترىنىڭ ورىنباسارى ءسابيت نۇرلىباي. بۇگىن نۇرلىباي باستاعان كوميسسيا مۇشەلەرى جاعدايدى ءوز كوزىمەن كورۋ ءۇشىن اتىراۋ وبلىسىنا ارنايى كەلگەن.

"ءقازىر كۇن جىلىنىپ، جايىق وزەنىنىڭ مۇزى ەرىپ جاتىر. سوندىقتان ولگەن بالىقتار سۋ بەتىنە قالقىپ شىعۋدا. بۇگىن ءبىز كاتەرگە وتىرىپ، دامبى اۋىلىن باردىق. وزىمىزبەن بىرگە سۇڭگۋىرلەردى دە الدىق. ولار وزەننىڭ ءتۇبىن ۆيدەوعا ءتۇسىردى. سەبەبى، سىزدەر بىلەسىزدەر، كەيبىر ب ا ق وزەن تۇبىندە قىرىلعان بالىقتار وتە كوپ دەپ حابارلاعان ەدى. ءبىز سۋ تۇبىندە ءولىپ جاتقان بالىق كورمەدىك. سول جەردە سۋدىڭ قۇرامى مەن ساپاسىن تەكسەرۋ ءۇشىن سىناما الدىق"، - دەدى ول بريفينگتە.

سونىمەن قاتار، ولار وزەن جاعاسىندا بالىق اۋلاپ وتىرعان بالىقشىلارمەن دە سويلەسكەن.

"وزدەرى اۋلاعان بالىقتى كورسەتتى، مىنە، بالىق بار دەيدى"، - دەيدى ۆيسە-مينيستر.

نۇرلىباي قازىرگى تاڭدا وزەننەن جينالعان 101 توننا ءولى بالىق جويىلعانىن اتاپ ءوتتى.

"بۇل، ارينە، جاقسى. ءبىراق وزەن جاعاسىندا ءيىسى شىققان بالىق جەتكىلىكتى. سوندىقتان اكىمدىكتەر، ەرىكتىلەر مەن كووپەراتيۆ وكىلدەرى بىرلەسىپ، ولگەن بالىقتاردى جيناپ، دەر كەزىندە جويۋى قاجەت. سول كەزدە ازاماتتار دا الاڭدامايدى. سوندىقتان اكىمدىك سول بالىقتاردى جيناپ، جويۋ بويىنشا جەدەل شارالار قابىلداۋى كەرەك"، - دەدى ءمينيستردىڭ ورىنباسارى.

ول اكىمدىك عىلىمي زەرتتەۋلەرگە قارجى ءبولىپ وتىرعانىن ايتتى.

"ءبىز زەرتتەۋلەردىڭ قالاي جۇرەتىنىن باقىلاپ، كەيىن حالىققا جايىق وزەنىندەگى جاعداي بويىنشا اقپارات بەرەمىز"، - دەپ سەندىردى نۇرلىباي.

ۇسىنعان: نازەركە لابيحان