الماتىدا 2018 جىلى 13 جاسار قىزدى زورلادى دەگەن ايىپپەن  ءۇش ءجاسوسپىرىم سوتتالعان بولاتىن. قازىرگى تاڭدا جابىرلەنۋشىلەر جازعان ارىزىن قايتىپ الىپ، زورلادى دەپ ايىپتالعان 3 جىگىتتى قايتا بوساتۋدى سۇراپ وتىر دەپ حابارلايدى Qamshy.kz اقپارات اگەنتتىگى Zakon.kz سايتىنىڭ دەرەگىن نەگىزگە الا وتىرىپ.

2018 جىلعى 16 قاراشادا الماتى قالاسىنىڭ مامانداندىرىلعان اۋدانارالىق سوتىندا سۋديا ك.ابدەلدينوۆ كامەلەتكە تولماعان سوتتالۋشىلارعا: ۆ.م. جانە ل.ۆ. 16 جىل، ش.ن. - 15 جىل بەرگەن.  ولار كامەلەتكە تولماعانداردى زورلاۋ جانە كامەلەتكە تولماعاندارعا قاتىستى جىنىستىق سيپاتتاعى زورلىق-زومبىلىق اكتىلەرى بويىنشا سەگىز جىلعا دەيىن باس بوستاندىعىنان ايرىلعان بولاتىن.

الايدا، ءىس بويىنشا جابىرلەنۋشى دەپ تانىلعان قىز جاسوسپىرىمدەردى جازالاماۋىن ءوتىنىپ جانە كەسىلگەن  ۇكىمدى قايتا قاراۋدى سۇراپ وتىر.

ماسەلەنىڭ انىق-قانىعى تۇسىنىكتى بولۋ ءۇشىن باسىنان باستايىق: 22 ناۋرىزدا بالالار دوستارىنىڭ تۋعان كۇنىن تويلاۋ ءۇشىن نيكيتانىڭ ۇيىنە قوناققا بارعان. 

— مەنى نيكيتانىڭ تۋعان كۇنىنە شاقىردى. ءبىز ىشىمدىكتەر الىپ، ءبىرىنشى رەت ءدامىن تاتىپ كورگىمىز كەلدى. باسىندا ءبارى كوڭىلدى، ويداعىداي بولعان. كەنەت مەنىڭ جۇرەگىم ايني باستادى. كيىمىمدى تازالاۋعا باردىم، ماعان دوستارىم كومەكتەستى. ودان كەيىن انام مەنى الىپ كەتتى - دەيدى 13 جاستاعى قىز.

ونىڭ اناسى كەشكە بارۋعا قىزىنا رۇقسات بەرمەگەن. قىزىنا قوڭىراۋ شالعاندا، ونىڭ ۇيالى تەلەفونى ءوشىرۋلى بولعان ەكەن.

— مەن سول كۇنى جۇمىستا قالعىپ كەتىپپىن . ۇيقىمنان تۇرا سالا بىردەن قىزىما باردىم. ونى ۇيگە الىپ كەلگەننەن كەيىن، قىزىمنىڭ الكاگولدىك ىشىمدىك ىشكەنىن بايقادىم. ونىڭ كيىمىن اۋىستىرىپ جاتىپ، ءىش كيىمىنىڭ جوق ەكەنىن بايقادىم. جاعدايدىڭ انىق-قانىعىن انىقتاۋ ءۇشىن بىردەن پوليسياعا حابارلاستىم. 

قىزدىڭ ايتۋىنشا ءدال سول كۇنى قىزدىڭ ايلىق بەلگىسى بايقالعان، سوندىقتان شالبارى قانعا بويالعان ەكەن. بۇل جاعداي اناسىن قاتتى ەسەڭگىرەتىپ جىبەرگەن. 

العاشقى كۇندەرى قىز ءوزىن ەشكىم زورلاماعانىن ايتقانىمەن، وعان نە اناسى، نە تەرگەۋشىلەر قۇلاق اسپاعان. سەبەبى، تەكسەرىس ناتيجەسى قىزدا زورلىق كورسەتۋدىڭ بەلگىسى بار ەكەندىگىن مالىمدەگەن. 

— تەرگەۋشىلەر ماعان زورلادى دەپ ايتۋعا ماجبۇرلەدى. ەگەر مەن ولاي ايتپاسام، ولار انامدى تۇرمەگە وتىرعىزاتىنىن ايتىپ قورقىتتى. مەن سول كۇنى ىشىمدىك ىشكەنىم ءۇشىن جانە باسقالاردى الداعانىم ءۇشىن قاتتى ۇيالامىن - دەيدى جابىرلەنۋشى قىز. 

مەديسينالىق ساراپشى كوركينا ءىش كيىمدە دە، جابىرلەنۋشى مەن كۇدىكتىلەردىڭ كيىمىندە دە ۇرىقتىڭ، سىلەكەيدىڭ بولماعاندىعىن انىقتاعان. تەرگەۋشى بۇل ساراپتاما ناتيجەسىمەن كەلىسپەي، قايتا تەكسەرىستەن وتۋگە  جىبەرگەن.

وقيعادان ءبىر اي وتكەننەن كەيىن، اناسى قىزىن باسقا گينەكولوگقا اپارىپ كورسەتكەندە، ول قىزىنا ەشقانداي زاقىم كەلمەگەنىن، سونداي-اق قىزدىق پەردەسىنىڭ دە ورنىندا ەكەنىن مالىمدەگەن. 

— ءبىزدى ەشكىم تىڭدامايدى. سەنبەيدى. مەن قاتەلەسكەن ەكەنمىن. سونىڭ كەسىرىنەن  كىناسىز جاسوسپىرىمدەر  زارداپ شەگىپ جاتىر. «ءبىز سوت ءىسى بۇل ءىستى قايتا قاراپ، ءادىل شەشىم شىعارعانىن تالاپ ەتەمىز »، - دەيدى 13 جاستاعى قىزدىڭ اناسى.

بۇل جاعدايدان كەيىن 13 جاسار قىز وز-وزىنە قول جۇمساماقشى بولعانىمەن، ادامدار ونى دەر كەزىندە بايقاپ، امان الىپ قالعان. وز-وزىنە قول جۇمساماس بۇرىن قىز اناسىنا ەگەر زورلادى دەپ ايپتالعاندار بوستاندىققا شىقپاسا، ارى قاراي ءومىر سۇرمەيتىندىگىن ايتقان. 

قازىرگى تاڭدا بۇل جاعدايدى سوت ءىسى قايتا قاراپ جاتىر، سوتتىڭ ءۇشىنشى وتىرىسى 15 ناۋرىزعا بەلگىلەندى. سونداي-اق  جالعان اقپارات بەرگەنى ءۇشىن دە ساراپتاما جاساۋشى كوركينا دا جاۋاپقا تارتىلاتىنىن حابارلادى.

اۋدارعان: فاريزا جومارت قىزى