لاس-ۆەگاستا اۋىر اتلەتيكادان جاسوسپىرىمدەر اراسىنداعى الەم چەمپيوناتىندا قازاقستاندىق كوماندا بەس التىن مەدال ۇتىپ الدى، - دەپ حابارلايدى Qamshy.kz اقپارات اگەنتتىگى اۋىر اتلەتيكا فەدەراسياسىنىڭ باسپا ءسوز قىزمەتىنە سىلتەمە جاساپ.

قازاقستان قۇراماسىنىڭ تاعى ەكى سپورتشىسى كوماندا قورجىنىنا التىن جۇلدە الىپ كەلدى. 81 كەلىگە دەيىنگى سالماقتا ولگا پاستۋحوۆا ەكى جاتتىعۋ قورىتىندىسى بويىنشا 215 (جۇلقا كوتەرۋدە - 92، سەرپە كوتەرۋدە - 123) كەلىنى باعىندىرىپ، الەم چەمپيونى اتاعىن كەزەكتى رەت الدى.

راحات بەكبولات تا الەم چەمپيوناتىندا ب ا ق سىنادى. 96 كەلىگە دەيىنگى سالماقتا سىنعا تۇسكەن ول قوسسايىس ناتيجەسى بويىنشا 323 كەلىنى (جۇلقا كوتەرۋدە - 144، سەرپە كوتەرۋدە - 179) كوتەرىپ، موينىنا التىن مەدال تاقتى.

"ءجاسوسپىرىم سپورتشىلارىمىز وسى سايىستاردا ءوز كۇش-قۋاتتارىن كورسەتە الدى. ارينە، كومانداداعى العاشقى جەڭىستەر ولگا مەن راحاتتى ودان سايىن جىگەرلەندىرىپ جىبەردى. ولار سول دەڭگەيدى تۇسىرمەۋ كەرەك ەكەنىن ءتۇسىندى. جاقسى كوڭىل-كۇي، تاباندى جاتتىعۋلارىمىز - وسىنىڭ ءبارى چەمپيوناتتا التىن مەدال الىپ كەلدى. كوماندامىزداعى ەڭ جاس سپورتشى راحات بەكبولات ءۇشىن بۇل دەبيۋت بولعان، ول ءبىزدى ناتيجەسىمەن قۋانتا الدى"، - دەدى جاستار قۇراماسىنىڭ باس باپكەرى باقىت احمەتوۆ.

جالپى ەسەپتە قازاقستان بەس مەدال ەنشىلەپ، سەنىمدى جەڭىسكە جەتتى.

جالپى ەسەپ:

1.قازاقستان - 5-0-0؛

2.وزبەكستان - 2-3-1؛

3.ۆەتنام - 2-0-1.

بۇعان دەيىن جاسوسپىرىمدەر اراسىنداعى الەم چەمپيوناتىندا قازاقستاننىڭ قورجىنىنا التىندى اقمولدا سايرامكەز (61 كەلىگە دەيىنگى سالماق)، سايحان تايسۋيەۆ (67 كەلىگە دەيىنگى سالماق) پەن ءساپي ەسەنگەلدى (81 كەلىگە دەيىنگى سالماق) اكەلگەن بولاتىن.

اۋىر اتلەتيكادان لاس-ۆەگاستا ءوتىپ جاتقان الەم چەمپيوناتى 15 ناۋرىزدا اياقتالادى. بۇل چەمپيوناتتا 50 ەلدەن 13-17 جاس ارالىعىنداعى ەكى جۇزدەن اسا سپورتشى قاتىسىپ جاتىر. قازاقستاننىڭ اتىنان بەس سپورتشى ونەر كورسەتتى.

ۇسىنعان: ماقپال سەمباي